FaktXeber.com-un verdiyi məlumata görə, MİRAS Mədəni İrsin öyrənilməsinə Kömək İctimai Birliyi yanvarın 16-da Beynəlxalq Mətbuat Mərkəzində yaranmasının 2 illiyinə həsr olunmuş tədbir keçirəcək.
Belə ki, MİRAS Mədəni İrsin öyrənilməsinə Kömək İctimai Birliyi mədəni irs abidələrimizin öyrənilməsi, mühafizəsi və təbliği sahəsində ictimai fəallığı artırmaq məqsədilə 2010-cu ilin yanvarında təsis edilib və 2010-cu ilin martında Ədliyyə Nazirliyində qeydiyyata alınıb.
İki il ərzində birlik bir sıra uğurlu layihələr həyata keçirib.
Birliyin Azərbaycanın mədəni həyatında, xüsusən də elm aləmində çox ciddi rezonans doğuran layihəsi Orta əsr Ağsu şəhərinin arxeoloji tədqiqi və konservasiya layihəsi olub.
Orta əsr Ağsu şəhəri arxeoloji turizm kompleksi layihəsinin son məqsədi Azərbaycanın turizm marşrutundan kənarda qalmış bu bölgəsinə ölkəmizin və dünyanın turistlərinin diqqətini çəkmək idi. Hər şeydən əvvəl 200 il əvvəl tərk edilmiş şəhəri yenidən oyatmaq lazım idi. Ağsu arxeoloji ekspedisiyası 2 il ərzində 9000 kv.m. ərazidə 3 qazıntı sahəsi qoyaraq qala divarı, cümə məscidi, hamam, sənətkar dükanları, yaşayış evləri, su xətləri, kanalizasiya sistemi, iri küçələri aşkar etməklə mərkəzi muzeylərdə belə oxşarı olmayan minlərlə eksponatı da gün üzünə çıxarıb. Layihənin ikinci mərhələsi aşkar olunmuş qalıqların konservasiyası və turistlərin yaxından görə bilmələri üçün nümayişə hazır vəziyyətə gətirilməsi idi. Az bir vaxtda III və IV qazıntı sahələrinin üzəri örtüldü və ətrafı abadlaşdırıldı, sərgi kompleks yaradıldı. Turistlərin rahat yetişə bilmələri üçün müasir Ağsu şəhərindən orta əsr Ağsu şəhərinə asfalt yol çəkildi. Layihənin paralel aparılan üçüncü mərhələsi 3 cildlik ikidilli “Ağsu şəhəri orta əsrlərdə” kitab-albomu, agsuexpedition.org internet səhifəsi, minlərlə eksponatın elektron pasportlaşdırılması, rayon, paytaxt və xarici ölkələrdə “Ağsu möcüzəsi” sərgilərinin keçirilməsi, III və IV qazıntı sahələrinin 3D formatında vizuallaşdırılması, İTV və ATV-nin tarixə dair silsilə verilişlərində nümayiş olunan televiziya sənədli filmlərinin istehsalı, KİV-lərin qazıntı yerinə infoturunun təşkil edilməsi, Bakıda universitet, orta məktəb, muzey və kitabxanalarda tanıtım seminarlarının keçirilməsi və s. təbliğat işləridir. Gənc və intellektual insanların geniş istifadəsində olan sosial şəbəkələrdə apardığımız təbliğat işləri bizim təşəbbüsümüz olmadan turist qruplarının bölgəyə səfərini də intensivləşdirib.
MİRAS 2011-ci ildə “Turizm ili” çərçivəsində Azərbaycan Respublikası Prezidentinin yanında QHT-lərə Dəstək Dövlət Şurasının maliyyə dəstəyi ilə “Arxeoloji turizmin inkişaf etdirilməsi və təbliği” layihəsini həyata keçirib. Layihə çərçivəsində “Azərbaycan abidələr diyarıdır” sənədli filmi çəkildi və filmdə 5 arxeoloji abidənin (Göytəpə, Qala, Qəbələ, Şəmkir və Ağsu) arxeoloji turizm baxımından perspektivlərindən bəhs edilib. Həmin abidələri əhatə edən “Azərbaycan inciləri” bukleti nəşr olunub və arxeoloji turizm haqqında maraqlı məlumatlarla zəngin archaeotourism.az internet səhifəsi hazırlanıb. Keçirilən seminarlar gənclərin bu sahəyə marağını artırıb.
Hazırda “Miras”ın təşəbbüsü ilə  “Avrasiya regionunda arxeoloji turizmin perspektivləri (Qədim dövrdən son orta əsrlərə qədər tarixi-mədəni irs əsasında)” mövzusunda IV Beynəlxalq Avrasiya Arxeologiyası konfransının Ağsuda keçirilməsi planlaşdırılır. Hesab edirik ki, bu konfrans bölgənin arxeoloji abidələrinin turizm məhsuluna çevrilməsində əhəmiyyətli rol oynayacaq.
“Miras” İB 2012-ci ildə və sonrakı illərdə daha maraqlı və keyfiyyətli layihələrlə fəaliyyətini davam etdirmək əzmindədir.
Biz də öz adımızdan “Miras” İctimai Birliyinə Azərbaycanın gələcək nəsilləri üçün bir miras qoymağı arzu edirik. Ad gününüz mübarək!