Artıq bir neçə müddətdir ki, Hörmüz boğazı ətrafında ciddi gərginlik yaranıb. İran tərəfi bildirir ki, özünə qarşı nəzərdə tutulan sanksiyaları tətbiq olunacağı halda, Hörmüz boğazını bağlayacaq. ABŞ tərəfi isə İranın bu addımı atacağı halda ona qarşı hərbi əməliyyata başlayacağını bildirib. İran rəsmiləri isə ABŞ-dan heç bir halda çəkinmədiklərini söyləyirlər.

Bəs Hörmüz boğazının bağlanacağı halda ABŞ-ın hərb əməliyyatlara müraciət etməsi nə dərəcədə realdır?

Mövzu ilə bağlı FaktXeber.com-a açıqlama verən politoloq Zərdüşt Əlizadə, İranın bu günə qədər hökumət səviyyəsində Hörmüz boğazının bağlanması ilə bağlı hər hansı bir bəyanat səsləndirmədiyini bildirdi: “İranın xarici siyasəti haqqında bəyanat vermək səlahiyyəti ya ali dini liderə, ya Xarici İşlər Nazirliyinə, ya da ki, prezidentə məxsusdur. Adını çəkdiyimiz şəxslərin və qurumun heç biri bu barədə hər hansı bir bəyanat səsləndirməyiblər. Azərbaycanda da ikinci dərəcəli rəsmilər çox şey deyə bilərlər. Lakin səsləndirilən fikirlər heç də ölkənin rəsmi mövqeyi hesab olunmur.”

ABŞ-ın İranı vurması ilə bağlı açıq-aşkar fikirlər səsləndirdiyini qeyd edən Zərdüşt bəy, “ABŞ bu fikirləri çoxdan səsləndirir. Səsləndirilən yeni fikirlərdə hər hansı bir qəribə şey yoxdur“, - deyə bildirdi: “ABŞ tərəfinin bu mövqedən çıxış etməsinin əsas səbəbi İranın malik olduğu zəngin neft və qaz yataqları və İranın ona tabe olmaması ilə əlaqədardır. O ki, qaldı İranın nüvə silahına malik olması ilə bağlı səsləndirilən fikirləri, bu iddialar nə MAQATE tərəfindən, nə də ki, ABŞ-ın Kəşfiyyat Naziri tərəfindən təsdiqlənib. Lakin dünyanın informasiya qələmi ABŞ-ın əlində olduğundan, istədiyi formada məlumat yayır. ABŞ-ın yeganə məqsədi İranda olan neft və qaz yataqlarına sahib çıxmaqdır.” 

“Bəs Hörmüz boğazı ətrafında baş verə biləcək hər hansı bir müharibə regiona, xüsusilə Azərbaycana nə kimi təsir göstərəcək”, - sualını da zavablandıran politoloq, “hər hansı bir qonşu evdə baş verən yanğın, digər qonşular üçün arzuolunmaz nəticələndiyi kimi, qonşu dövlətlərdə də baş verə biləcək müharibə ətraf ölkələr üçün ciddi problemlərə yol açır”, - deyə bildirdi.