Dünən İctimai Palata növbəti dəfə izdihamlı sessiya keçirdi. Sessiyada ölkənin ictimai həyatında olan mühüm mövzulara toxunularaq hakimiyyətə qarşı ciddi bəyanatlar səsləndirilib. Belə ki, parlamentin buraxılması və ölkə başçısının istefası kimi tələbləri buna misal göstərmək olar.

Amma bütün bu sadalananların baş verməsi üçün cəmiyyətin proseslərə aktiv qoşulması lazımdır. Lakin Azərbaycan cəmiyyətində aktivlik müşahidə edilmir. Bəs İP cəmiyyətin bu proseslərdə aktivləşməsi ilə bağlı hər hansı tədbirlər görürmü?

Mövzu ilə bağlı FaktXeber.com-a açıqlama verən Müsavat Partiyasının başqan müavini Gülağa Aslanlı İP-nın təsis olunduğu gündən etibarən bu istiqamətdə kifayət qədər işlər gördüyünü bildirdi: “Bu tədbirlərə misal olaraq etiraz aksiyalarının keçirilməsi ilə bağlı qərarların verilməsi, eyni halda dəyişiklərin dinc yolla həyata keçirilməsi üçün hakimiyyətə demokratiyaya yumşaq keçidin “Yol xəritəsi”nin göndərilməsi və regionlarda İP-nın təşkilati şöbələrinin yaradılmasını göstərmək olar.”

Bütün bunların hamısının cəmiyyətin aktivləşməsinə xidmət eləyən addımlar olduğunu qeyd edən Gülağa bəy, “cəmiyyətdə olan aktivlik izlədiyimiz səviyyədə olmasa belə, hər halda cəmiyyətin əksər hissəsi bu hakimiyyətdən narazıdır. İP təsis olunduqdan sonra Ziyalılar Forumunun aktivləşməsi də buna bir işarədir. Cəmiyyət hələ ki, bu dəyişiklərə tam hazır olmasa da, insanlar sanki bir məqamı gözləyir”, - deyə bildirdi.

“Cəmiyyətin aktiv ictimai fəaliyyətdən passiv duruma düşməsi nə ilə bağlıdır” sualına da aydınlıq gətirən başqan müavini, bunun cəmiyyətin iqtidardan müəyyən gözləntiləri ilə bağlı olduğunu bildirdi: “Cəmiyyətin iqtidardan müəyyən gözləntiləri var idi ki, hakimiyyət insanların həyata səviyyəsinin yaxşılaşdırılması üçün müəyyən addımlar atacaq. Lakin gözləntilər özünü doğrultmadı. Son illər də insan haqlarının, mülkiyyət hüquqlarının və sərbəst toplaşmaq azadlıqlarının pozulması göstərdi ki, hakimiyyət bu istiqamətdə hər hansı bir addım atmaq istəmir.”

Sonda əhalinin yaşayış səviyyəsinin günü-gündən pisləşdiyini qeyd edən Gülağa Aslanlı, “büdcə təşkilatlarında işləyən şəxslərin əmək haqlarının 10% artması və ölkədə olan 14%-lik inflyasiyaya bərabər olmaması insanlarda hakimiyyətə qarşı kifayət qədər narazılığın formalaşmasına gətirib çıxardıb”, - deyə bildirdi.

Xəyal Şükür