SSRİ dağıdıldıqdan bir müddət sonra keçmiş sovet ölkələri Rusiyanın təklifi ilə MDB adlı ittifaqda yenidən bir araya gəldilər. Təbii ki, Rusiya bu addımı ilə SSRİ xəyalını yenidən qurmaq istəyirdi. Lakin ittifaqla bağlı ilkin olaraq uğurların əldə olunmasına baxmayaraq, sonradan bir neçə ölkənin ayrılmaları müşahidə olundu.
Amma sonrakı proseslər göstərdi ki, Rusiya istəyini həyata keçirmək üçün başlatdığı bu prosesdə uduzmağa başladı. Və görünən odur ki, MDB artıq süqut astanasındadır.
Mövzunu FaktXeber.com-a şərh edən politoloq Zərdüşt Əlizadə, Rusiyanın MDB ilə bağlı atdığı addımın vəziyyəti sabitləşdirmək üçün etdiyini bildirdi: “Sabit müstəmləkəçi dövlətlər vaxtı ilə müstəmləkəsi olan ölkələrlə əlaqə qurarkən heç də imperiyanı bərpa etmək xəyalında olmurlar. Onlar sadəcə olaraq vəziyyəti sabitləşdirmək və münasibətləri hüquqi məcrada davam etdirmək niyyətindədirlər. Vaxtı ilə Britaniya imperiyası dağıldı, lakin bu günə qədər Britaniya millətlər birliyi davam edir. “

Bəzi dövlətlərin MDB-dən uzaqlaşmasının əsas səbəbinin həmin dövlətin hakim dairələrinin özəl maraqları ilə bağlı olduğunu qeyd edən Zərdüşt bəy, “obyektiv olaraq Gürcüstanın Rusiya ilə bağlı maraqları kifayət qədərdir. Gürcüstanın təhsili, sənayesi və insani əlaqələrinin Rusiyadan kifayət qədər asılı olmasına baxmayaraq, Gürcüstanın elitası hakimiyyət uğrunda mübarizədə qərbyönlü bayrağını qaldıraraq, Rusiyadan üz çevirdi və ərazisinin bir hissəsini itirdi”, - deyə bildirdi: “Eyni halda Azərbaycanın da elm, texnologiya və idman sahəsində olan bütün uğurları Rusiya ilə bağlıdır. Lakin bunlara baxmayaraq, Azərbaycan müxalifəti Türkiyə və Qərb bayrağını qaldırdı. Nəticədə torpağını, elmini və texnologiyasını itirdi. Təbii ki, Rusiyanın da bu məsələlərdə məkrli siyasətinə görə itirdikləri çox oldu. Rusiya bu proseslərdən sonra öz nüfuzunu və gücünü itirməkdə davam edir. Sabiq sovet ölkələrinin uğradıqları tənəzzüllərin hamısı, həmin ölkələrdə olan hakim zümrələrə görə baş verib.”

MDB bundan sonrakı taleyinə də aydınıq gətirən Z.Əlizadə, Rusiyanın baş naziri Vladimir Putinin MDB haqqında söylədiklərini xatırlatdı: “Putin bildirmişdi ki, MDB sovet ölkələrinin mədəni, dinc boşanma mexanizmidir. Boşanma bundan sonra da davam edəcək. Türkmənistan hazırda MDB-nin de-fakto üzvüdür. Gürcüstan rəsmi sürətdə MDB-dən imtina edib. Azərbaycan isə “xala xətrin qalmasın” deyə MDB-də özünü göstərir. Azərbaycanla Rusiyanı bir-birilərinə bağlayan kifayət qədər amillər vardır. Azərbaycanda 150 min rusun, Rusiyada isə 2 milyondan çox azərbaycanlının yaşaması iki dövləti bir-birilərinə bağlayan əsas amillərdən biridir.”