2011-ci il media işçiləri üçün müxtəlif hadisələrlə yadda qaldı. Baş verən hadisələrin bəziləri sevindirici olsa da, əksər hissəsi basqılardan ibarət idi. Belə ki, ilin əvvəllərində 4 il müddətinə qanunsuz olaraq həbsdə saxlanıldıqdan sonra tanınmış jurnalist Eynulla Fətullayevin azadlığa buraxılması sevindirici hal olsa da, bir neçə yerli və xarici media nümayəndələrinin naməlum şəxslər tərəfindən döyülməsi, qəzetlərin məhkəmələr vasitəsilə külli miqdarda cərimə olunması, nəhayət “Xural” qəzeti bağlanaraq baş redaktorunun həbs edilməsi sevincləri ürəkdə qoydu.

Bəs 2011-ci il ölkənin tanınmış jurnalisti Zamin Hacı üçün nə ilə yadda qalıb. Mövzu ilə bağlı FaktXeber.com oxucuları ilə öz fikirlərini bölüşən Zamin bəy, bu ilin siyasi-ictimai həyatda gənclərin aktivliyi ilə yadda qaldığını bildirdi: “2011-ci il mart-aprel aylarında keçirilən etiraz aksiyaları və həmin aksiyalarda həbs olunan şəxslərin siyasi məhbusa çevrilməsi ilə yadda qaldı. Şəxsi həyatımda yadda qalan isə Norveçdə “Söz Azadlığı” ilə bağlı aldığım mükafat oldu.”

“Qarşıdan gələn illərdə ölkədə hər hansı demokratik islahatların həyata keçirilməsi mümkün olacaqmı” sualına da aydınlıq gətirən Zamin Hacı, “ümumiyyətlə mən nikbin insanam. Heç vaxt ümidimi itirmirəm. Ölkədə demokratik islahatların həyata keçirilməsinə nəinki ümid edir, hətta bu istiqamətdə bir jurnalist kimi əlimdən gələni əsirgəmirəm. Hesab edirəm ki, Azərbaycan tezliklə dünyanın demokratik və qabaqcıl ölkələri sırasına daxil olacaq”, -deyə bildirdi: “Çünki ölkədə bunun üçün potensial var və həmişə də mövcud olub. Çox sevindiricidir ki, bu il gənc hərəkatların yaranması ilə yadda qaldı. Bir çoxları bu cür hərəkatları ənənəvi müxalifətdən gözlədiyi halda, hərəkatların əksəriyyəti cəmiyyətin başqa üzvləri tərəfindən yaradıldı. Aksiya keçirən gənclik ölkəyə hakim olan qaydalarla yaşamaq istəməyəcək və bu qaydaları dəyişdirməyə nail olacaqdır.”

Xəyal Şükür