İslam Əməkdaşlıq Təşkilatının verdiyi qanun layihəsi BMT tərəfindən qəbul edilib. Yeni qərarda inanclarına, ya da dinlərinə bağlı şəxslərin məhdudlaşdırılması, damğalanması, təzyiqə məruz qalması, dözümsüzlük və ayrıseçkiliyə məruz qalmasıyla mübarizə aparılması nəzərdə tutulur. Digər tərəfdən din azadlığını qoruyan bu qərar İƏT üzvü olan 57 ölkədə İslam əleyhinə düşüncələri məhdudlaşdıracaq. Son illər ərzində ölkəmizdə İslama qarşı qadağaların baş qaldırdığını nəzər alsaq, BTM-nin bu qərarı Azərbaycan üçün nə vəd edəcək?

Mövzu ilə bağlı FaktXeber.com-a açıqlama verən Böyük Qurtuluş Partiyasının sədri, millət vəkili Fazil Qəzənfəroğlu, BMT-nin qəbul etdiyi yeni qərarın İslam və islamafobiyaya qarşı addımları ehtiva etdiyini bildirdi: “Hazırda müsəlman ölkələrində İslamın yanlış anlaşılması problemi mövcuddur. Xüsusilə də dini zəmində proseslərin gərgin olduğu dövlətdə bu problemlərin daha da aktual olduğu diqqət mərkəzindədir. Qərb və Şərqdə İslamın gerçək mahiyyətinin təbliğ olunması vacib amillərdən biridir. Çünki bu gün dünyada yaşanan İslamın böyük bir qismi yanlışdır. Hazırda dünyada İslamın ruhaniyyət modelindən çox, xilafət modelindən istifadə olunur. Bu baxımdan da həmin cəmiyyətlərdə təhrif olunmuş İslamdan, həqiqi İslama üz tutulmalıdır. Yəni bu tip cəmiyyətlərdə əsasən insanların düşüncələri dəyişdirilməlidir. Din vicdana, ağıla və duyğulara aid olan bir məsələ olduğuna görə, bunu hər hansı bir qanun və qərarla tənzimləmək mümkün deyil. Ona görə də bu cür qəbul olunan qanunlar uzun ömürlü olmurlar.”

“Nəzərə alsaq ki, ölkədə dini qadağaları ehtiva edən kifayət qədər qanunlar qəbul olunub və hazırda da dinə qarşı basqılar mövcuddur, belə olan halda Azərbaycanın BMT tərəfindən verilən qərara əməl etməməsi nə ilə nəticələnə bilər” sualına da aydınlıq gətirən Fazil bəy, ölkədə bütöv şəkildə dini məhdudlaşdırmadan söhbət getmədiyini bildirdi: “Azərbaycanda dini müəssisələrin fəaliyyətinin məhdudlaşdırılması ilə bağlı qadağalar mövcuddur. Dini müəssisələrin mövcudluğu dinin təsdiqi mənasına gəlmir. Kimsə il boyu ibadət etməyib hər hansı bir mərasimi yerinə yetirmək üçün məclisə gedirsə, bu din demək deyil. Belə bir hallar özfəaliyyətlərdir. Öz fəaliyyətlərin müəyyən bir qisminin din adı ilə cəmiyyətdə yer alması böyük cahilliyə və təhlükəyə gətirib çıxardır. Ölkədə dinlə bağlı yanlış işin tərəfi odur ki, gerçək dini bilgilərdən həm hakimiyyət, həm də cəmiyyətin böyük əksəriyyəti məhrumdur. Cəmiyyətin bir qismi öz adətlərini din kimi təqdim etməyə çalışırlar. Bunun da mənfi nəticələri cəmiyyətin üzərinə yönəlir. Məscidlərin bağlanması, ibadətlərin məhdudlaşdırılması və ibadət yerlərinin açılmaması deyilənlərin əlamətləridir. Ölkədə dinlə bağlı fərqli bir yol izlənilməlidir. Dinlə bağlı müəyyən maarifçilik proqramları qəbul edilərək, cəmiyyətə həqiqi dini dəyərlər çatdırılmalıdır.”