FaktXeber.com xəbər verir ki, bu gün Nərimanov Rayon Məhkəməsində "Hicaba azadlıq" aksiyası zamanı həbs olunan ilahiyyatçı Taleh Bağırov və dindar Elşən Abbasova hökm oxunub. Hakim Turqan Hüseynovun sədrliyi ilə keçirilən məhkəmə prosesində  təqsirləndirlən şəxslərin ittiham olunduqları maddələr elan edildi.

Son söz söyləyən EAbbasov ittihamın əsassız olduğunu bildirdi: “Şahidlərin yalançı ifadələrini hamınız gördüz. Bu qədər əssasız və yalançı şahidlərin olmasına baxmayaraq, dövlət ittihamçısı heç nəyi nəzərə almır. Özümü tam olaraq təqsirsiz bilirəm və ümid edirəm ki, məhkəmə tərəfindən ədalətli qərar veriləcək.”

Sonra ilahiyyatçı alim Taleh Bağırov çıxış etdi: “Ümid edirəm ki, möminlər bundan sonra da dini qadağalara qarşı öz mübarizələrini davam etdirərək, problemləri izzətlə həll edəcəklər. Dünən ölkə başçısı Əjdərbəy məscidinin açılışında çıxış edərkən bildirib ki, ölkədə islami dəyərlər təbliğ olunmalıdır. Yaxşı olardı ki, islamı dəyərlər Misir Mərdanov kimi nazirlərə təbliğ olunsun. Misir Mərdanova başa salınmalıdır ki, islamın ən vacib dəyəri hesab olunan hicaba qarşı orta məktəblərdə qoyulan qadağa aradan qaldırılsın. Ölkə başçısı ilk növbədə öz nazirlərinə təbliğ edərək islami dəyərləri başa salmalıdır."

8 ayda həbsdə olduğu müddətdə ibtidai istintaqdan tutmuş məhkəmə prosesinə qədər müxtəlif dindirmələr və şahidlərlə üzləşdiklərini bildirən T.Bağırov, bu günə qədər həbs edilmə səbəblərinin məlum olmadığını bildirdi: "İbtidai istintaq dövründə istintaq şöbəsinin rəisi polkovnik-leytenant Nazim İsmayılov, həbs olunmamışdan qabaq söz və ifadə azadlığımızdan istifadə edərək? iqtidara qarşı tənqid çıxışlarımızı bizə göstərib. Biz 8 aydır ki, dini qadağalara etiraza etdiyimizə görə həbs olunmuşuq. Hazırda da ölkədə dinə qarşı xəyanətlər davam edir. Artıq 1 ildən çoxdur ki, bizim hicablı bacılarımızı təhsildən ayırıblar. Bunun özü bir cinayətdir. İsmayılov çıxışlarımızda iqtidarın xalqa xəyanət etməsi haqqında səsləndirdiyimiz fikirləri aksiyada səsləndirilən şüarların yerinə salıb. Ölkə iqtidarı sağlam düşüncənin yayılmasından qorxu hiss keçirir. Və qorxu ilə öz hakimiyyətini idarə etmək istəyir. Çox şükür olsun Allaha ki, islamçılar öz mübarizələri ilə bu qorxunu dağıtdılar. İslamçılar bu mübarizələri ilə bildirdilər ki, biz sağlam düşüncəyə malikik. Dövlət ittihamçısı bizə 5 illik həbs cəzası istəyib. Bizi bu həbslərlə qorxuda bilməzsiz. Hətta 15 il və ömürlük həbs cəzası versəniz belə, biz mübarizədən çəkinməyəcəyik. Bizim üzümüzə duran polis əməkdaşlarının hamısı çox narahat idilər. Çox təəssüf ki, prokuror heç bir narahatçılıq keçirmədən şahidlərin yalançı ifadələrini qəbul edib. Mən istəyərdim ki, bizə böhtan atanlar Seyyid Fəramizin şahidinin başına gələnlərdən dərs alsınlar. Mən Seyyid Fəramiz kimi nifrin eləmək istəmirəm. Ancaq ürəyim yanır. Biz qarşı tərəfi əfv etməli olduğumuz halda, bizdən əfv olunmağımızı üçün ərizə yazmağımızı istəyirlər. Biz milli-mənəvi dəyərlərimizin mübarizəsi yolundan xalqımıza xəyanət edə bilmərik. Xalqın mənəvi dəyərlərinə qarşı uzanan əllərə görə susmaq ən böyük xəyanətdir. Bu əllər fərq eləməz kimlər tərəfindən uzanır. Bu gün həbs olunan islamçılar eyni ilə Şəhid Mübariz İbrahimova bərabər şəxslərdir. Bizim məktəbimiz M.İbrahimov kimi şəxsləri xalqımıza təqdim edib. Lakin qarşı tərəf isə Hacı Məmmədov kimi canilərin yetişməsinə səbəb olublar. Biz Allah, Peyğəmbər və İmam Hüseyn qarşısında söz veririk ki, son nəfəsimizə qədər, hətta əbədi zindan və ölüm olsa belə, öz dinimizi müdafiə edəcəyik."

Ruhani Tale Bağırovun vəkili Anar Qasımlı bildirib ki, məhkəmənin nisbətən yüngül cəza kəsməsi yəni 222.2 (1 il) və 233-cü (1 il) maddələrlə hökm çıxarması ədalətli qərar deyil. İki maddə birlikdə 1 il 6 aya endirilməsində ədaləti bərqərar etmədi. Biz Taleh Bağırovun günahsız olduğunu sübut etmişdik. Günahsız insanın 1il 6 ay həbs edilməsi ədalətli deyil. Biz yubanmadan elə bu gün Apellyasiya Məhkəməsinə müraciət edəcəyik.

Qeyd edək ki, “Hicaba Azadlıq” aksiyası bu il mayın 6-da Təhsil Nazirliyi qarşısında keçirilib. Aksiya ilə bağlı Bakı Şəhər Prokurorluğunda iş açılıb. İstintaq qrupunun rəhbəri Bakı şəhər Baş Polis İdarəsinin istintaq və təhqiqat idarəsinin rəisi Nazim İsmayılovdur. Ruhani Tale Bağırov Azərbaycan Respublikasının Cinayət Məcəlləsinin 221.2-ci maddəsi ilə (Bir qrup şəxs tərəfindən xuliqanlıq) və 233-cü maddəsi ilə (İctimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə), (3 ilə qədər həbs) ittiham olunur. Həbs edildikdən sonra Hacı Tale barəsində əvvəlcə 15 sutka, daha sonra isə 2 aylıq həbs qətimkan tədbiri seçilib və Kürdəxanı təcridxanasına göndərilib.

Xəyal Şükür