Son vaxtlar Eynulla Fətullayev barəsində mətbuatda tənqidi fikirlər yazılıb. Bir neçə müddət bundan əvvəl Əhrar Partiyasının sədri Vaqif Hacıbəyli Eynulla bəyi siyasi məhbus mövzusunda cəmiyyətdə çaşdırıcı fikirlər yaymaqda ittiham etmişdi. Eyni zamanda «Azadlıq» qəzetinin redaktoru tanınmış yazar  Şahvələd Çobanoğlunun da fikrini bu qəbildən hesab etmək olar. Həbsdə olan müddətdə müdafiəsi yüksək formada təşkil edilən Eynulla bəyə qarşı ictimaiyyət nümayəndələrinin belə bir fikir yürütməsinin  əsas səbəbi nədir? Siyasi və vicdan məhbuslarının problemləri ilə məşğul olan bir şəxs nəyə görə müxalif kəsim tərəfindən tənqid edilir? Mövzu ilə bağlı Eynulla Fətullayevin fikirlərini öyrənməyə çalışdıq.

FaktXeber.com-a açıqlama verən Eynulla Fətullayev, hazırda ölkədə bolşevik təfəkkürünün formalaşdığını və həbs olunmamışdan öncə də özünə qarşı həmişə bu cür fikirlərin olduğunu bildirdi.

“ Mən həmişə bu cür əsassız və axmaq ittihamlarla üzləşmişəm. Əvvəllərdə deyirdlər ki, Eynulla Ziya Məmmədova, Kəmaləddin Heydərova işləyir. Bizim cəmiyyətdə xəstə bir bolşevik təfəkkürü mövcuddur. Mən belə təfəkkürü qəbul etməyərək,  buna qarşı həmişə mübarizə aparmışam. Bu insanlar artıq yaşlanmalarına  baxmayaraq, həyata yenə də maksimalist yanaşma tərzi ilə baxırlar. Ya ağ var, ya da ki, qara. Eyni halda həm qırmızı həm də ki, digər rənglər mövcuddur.  Bu insanlar həyatı yalnız bir rəngdə görürlər. Bunların fikirincə həbsxana ya yaxşı olmalıdır, ya da ki, pis. Hər hansı bir pozitiv irəliləyiş və yaxud nöqsanlar bu insanların leksikonunda yoxdur.Buna ancaq təəccüb etmək olar.”

Ölkədə kifayət qədər siyasi maarifçiliyə böyük ehtiyac duyulduğunu qeyd edən Eynulla Fətullayev, ictimai siyasi dünyagörüşün yüksəldilməsinin lazım olduğunu bildirdi.

“Bu insanların Avropa dəyərlərinə yiyələndikləri barədə səsləndirdikləri fikirlərinə mən ciddi şübhə edirəm. Çünki belə  bir şəxs heç vaxt katoqariq düşüncə tərzinə və qiymətləndirməyə, eyni zamanda tolerantlığa meyili olmaz. Avropa dəyərlərinin əsası tolerantlıqdır. Əgər bir nəfər kiminsə təəssüratını, fikirini və düşüncəsini inkar edirsə, onda onun hansısa dəyərə malik olmasından danışmağı yersizdir.”

Eynulla bəy hazırda fəaliyyət göstərən Əhrar partiyasını və onun sədri Vaqif Hacıbəylini tanımadığını qeyd edərək, “Əhrar partiyası Azərbayacanda 1918-cı ildə fəaliyyət göstərib. Onun sədri Aslanbəy Qardaşov çox nümunəvi bir insan olub. Bu partiya həmin dövrdə çox parlaq bir fəaliyyətə malik idi”,-deyə bildirdi.

“İndi mən özüm üçün Bonapart partiyası açıb, fəaliyyət göstərsəm, o demək deyil ki, mən bonapartam. Hazırda ölkədə fəaliyyət göstərən Əhrar partiyasını tanımıram.”

Xəyal Şükür