Azərbaycan Jurnalist Qadınlar Assosiasiyası Beynəlxalq Mətbuat Mərkəzi ilə birlikdə BMM-də “Tariximizi öyrənək” adlı layihəyə start verdi. Layihə çərçivəsində peşəkar tarixçilər tərəfindən master klasslar təşkil ediləcəkdir. Dekabrın 16-da layihənin təqdimat mərasimi keçirildi.
Faktxeber.com-un verdiyi məlumata görə, tədbiri giriş sözü ilə açan Azərbaycan Jurnalist Qadınlar Assosiasiyasının prezidenti Sevil Yusifova bildirdi ki, jurnalistlər bütün dünyanı gəzir və eyni zamanda həmkarlarımın yazdıqları məqalələr digər xalqlarda millətimiz haqqında fikir formalaşdırır: “Bizim nəsil jurnalistləri Azərbaycan tarixini əsasən rus imperiyasının bizə təqdim etdiyi dərsliklərdən öyrənib. Baxmayaraq ki, məktəb və universitetdə oxuduğumuz illər müstəqillik dövrünə təsadüf edirdi. O zaman yenicə azadlıq əldə etmiş dövlətimiz hələ doğru tarixi, gerçək tarixi araşdırıb ərsəyə gətirənə kimi bir neçə il gözləməli olduq. İndi isə artıq milli mütəxəssislərimiz tərəfindən Azərbaycan tarixi araşdırılıb yeni kitablar yazılıb, oxucuların ixtiyarına verilib. Lakin tariximizin hələ də açılmamış səhifələri və öyrənilməmiş məqamları qalmaqdadır.
Qeyd edim ki, orta məktəb tarix dərsliklərində problemlər var. Dərsliklər neçə dəfə təkrar işlənməsinə baxmayaraq, hələ də  qüsurlar qalmaqdadır. Bunlar isə insanlarımızı çaşdırır. Çoxlu sayda sual doğurur...
Mən xüsusilə bu yaxınlarda “Ümumrespublika II Uşaq Forumu”nda uşaqların müraciətlərindəki bir məqamı xatırlatmaq istəyirəm. Uşaqlar Təhsil Nazirliyinə üzlərini tutub dedilər ki, biz hər yerdə deyirik ki, Qarabağa, Qafqaza ermənilər köçürülüblər. Onlar bu torpaqlarda aborigen millət deyillər. Amma digər tərəfdən isə tarix dərsliklərimizdə erməni çarının süqutundan bəhs edən məqalə kitablarda yer alır... Bu uşaqların ortaya qoyduğu dərsliklərimizin qüsurudur. O zaman ortaya sual çıxır orta məktəb kitablarında tədris edilən bu cür dərs vəsaitini mənimsəyən  şagird və gələcəyin jurnalisti gerçək tariximizi neçə təlqin edə bilər? Bütün bu qüsurlardan doğa biləcək səhvlərin olmaması üçün biz jurnalistlər üçün “Tariximizi öyrənək” layihəsini həyata keçirməyi labüd bildik. Hələlik ona yaxın master klasların mövzusu dəqiqləşdirilib. Bunlar Güney Azərbaycan, Azərbaycanın tarixi-coğrafi və etnik sərhədləri, Dövlətçilik tariximiz, İdeologiya və sairədir.”
Təqdimat mərasiminin arxasınca isə magistr tarixçi Tariyel Faziloğlu birinci master klassını təqdim etdi. Mövzu: Milli kimliyimiz idi.
T.Faziloğlu bildirdi ki, milli kimliyimizdən danışanda ilk öncə baxılmalıdır ki, Azərbaycan Respublikasında yaşayanların arasında etnik çoxluq kimlərin üzərinə düşür? O zaman aydın olacaq ki, son statistik göstəricilərə görə Azərbaycan xalqının 94 faizini türklər təşkil edir. Bəs türklər kimlərdi? Türklər bura gəlmə, yoxsa yerli millətdir?
Altay nəzəriyyəsinə görə türklər bu yerlərə gəlmədirlər. Amma tarixi gerçəkliklər bunu təkzb edir. Tarixdən öyrədilən saklar, massagetlər, işquzların Qara dəniz sahillərindən bura yenmələri, bu ərazilərdə Skif çarının olması, Kuti dövlətinin mövcudluğu və sairə tarixi faktlar göstərir ki, Altay nəzəriyyəsi başdan ayağa səhvdir. Bundan başqa türklərin tarixindən bəhs edən Ergenekon dastanında türklərin məskənləri  barədə verilən məlumatlar Qafqaz və Anadolunu anladır.
Dinləyicilərin suallarına cavab verən T.Faziloğlu “azərbaycanlılar kimdir”- sualına aydınlıq gətirdi. O qeyd etdi ki, Azərbaycan Respublikasının bütün vətəndaşları azərbaycanlı adlanır. Belə ki, Azərbaycan Respublikasının bütün vətəndaşları birlikdə Azərbaycan xalqını təşkil edirlər və azərbaycanlı adlanırlar. Azərbaycanlı ifadəsi hüquqi termin olub, heç bir etnik mənsubiyyət bildirmir. Buna görə də, azərbaycanlı ifadəsini etnik mənsubiyyət kimi təqdim edilməsi yanlışdır.
Master klasın sonunda gələcək  görüşün  mövzusu dəqiqləşdirildi. Jurnalistlər üçün təşkil ediləcək növbəti master klasda ermənilər haqqında onların tarixi kökləri haqqında məlumat veriləcəkdir.

Nicat