Astara rayonu, Pensər kənd sakini Nadirov Ehtiram Şəmşir oğlu qarşılaşdığı məmur özbaşnalığı, qardaşının faktiki fiziki qüsurlu olmasına baxmayaraq hərbi xidmətə aparılması barədə faktları “Faktxeber.com”a danışıb: “Mən, Nadirov Ehtiram Tovuz rayonunda, döyüş bölgəsində hərbi xidmıətimi fəxri fərmanla yüksək səviyyədə yerinə yetirmişəm. Nəslimizdə heç kim hərbi xidmətdən yayınmayıb. Biz iki qardaşıq, atam rəhmətə gedib, anam isə xəstədir. 2011-ci ilin oktyabr ayının 4-də kiçik qardaşın Extiyar Nadirovu hərbi xidmətə çağırdılar. Qeyd edim ki, qardaşım anadangəlmə kardır. Eşitmə qabiliyyəti qüsurlu olan qardaşımı ordu sıralarına apardılar. Astara rayon Hərbi Komissarlığında 4-cü bölmənin rəisi Vüqar Mirzəyev bizdən pul istədi. Bildirdi ki, pulun varsa, məsələni burada həll edək. Atam təzə rəhmətə getmişdi, bizdə isə heç imkan yox idi. Ona pul verə bilmədim. Onda dedi ki, biz Extiyarı göndəririk, ola bilsin ki, düşdüyü hərbi hissədən geri qaytarsınlar. Qardaşımı Gəncədəki N saylı hərbi hissəyə apardılar. Bir həftədən sonra qardaşım görür ki, yoldaşlarının gülüş hədəfinə çevrilib. Hamı ona gülür, lağa qoyurlar. Hərbi hissədə kapitan Vəzirovla görüşdüm, çox yaxşı insandır, qardaşımın vəziyyətini nəzərə alıb onu Gəncə rayon Hərbi Hospitalına göndərdi. Naməlum səbəblərdən qardaşımı hospitaldan hərbi hissənin tibb məntəqəsinə qaytarıblar. Tibb məntəqəsinin rəisi Tofiq Yağnəlizadəyə zəng vurdum, qardaşımın vəziyyəti ilə maraqlandım. O mənə dedi ki, qardaşım həqiqətən qüsurludur və bizim pulumuz yoxdur: “Sən gəl pul gətir, biz də onu orduya yararsız edib ordudan tərxis edək. Mənim üçün 50 manatlıq kontur al göndər, mən də onu satıb qardaşını Bakıya hospitala göndərim”. Mən də məcbur qaldım 50 manatlıq konturu onun nömrəsinə göndərdim. Ondan sonra qardaşımı bir dəfə Bakıya göndəriblər. Sonra isə naməlum səbəblərdən qardaşımı Tərtərə, döyüş bölgəsinə göndərdilər. Qardaşım sağlam olsaydı əsgəri xidmətini mənim kimi başa vurardı. Mənim atam yoxdur. Mən indi haradan pul tapıb göndərim ki, qulağı eşitməyən qardaşım erməni gülləsinin qurbanı olmasın. Qardaş namaz qılandır, ona namaz qılmağa da qadağa qoyublar. Hal-hazırda Respublika Hərbi Prokurorluğunun müstəntiqi Yavər Allahverdiyev bu işlə bağlı guya araşdırma aparır, faktiki işi uzatmaqla məşğuldur. Xəstə adamı əsgər aparmaq cinayətdir, bu cinayəti törədənlərə hələ də cinayət işi açılmayıb. Qardaşım hal-hazırda Müdafiə Nazirliyinin Mərkəzi Hərbi Hospitalındadır. Xəstə olduğu halda onu hələ də ordudan tərxis etmirlər. Bununla əlaqədar Prezident İlham Əliyevdən, Müdafiə naziri Səfər Əbiyevdən, Hərbi Prokuror Xanlar Vəliyevdən kömək istəyirəm”.