Ermənistan prezidentinin keçmiş müşaviri Jirayr Libaredyan Qarabağ münaqişəsi ilə bağlı açıqlama verib. O bildirib ki, “Ermənistan hakimiyyəti bu cür özünüaldatma yolu ilə elə təsəvvür yarada bilər ki, hər şey yaxşı gedir, dözəcəyik. Qarabağ məsələsində vaxt Azərbaycanın xeyrinə işləyir və Ermənistan status-kvonun uzanmasından fayda gözləməkdə yanılır”. Digər tərəfdən Azərbaycan rəsmiləri də daima Qarabağ münaqişəsi ilə bağlı fikirlər səsləndirərkən münaqişə vaxtının uzanmasının Azərbaycanın xeyrinə və Ermənistanın ziyanına işlədiyini bildirirlər.

Faktxeber.com-un “münaqişənin vaxtının uzanması doğrudanmı Azərbaycanın xeyrinə işləyir”, - sualına aydınlıq gətirən politoloq Zərdüşt Əlizadə, münaqişənin vaxtının uzanması ilə status-kvonun tədricən legitimləşdiyini bildirdi: “Artıq bir neçə müddətdən sonra böyük dövlətlər Azərbaycana deyəcəklər ki, sən Qarabağa yiyələnmək hüququnu itirmisən. 20 ildən artıqdır ki, Qarabağ bizdə deyil. Bu müddət 30 il olandan sonra deyəcəklər ki, Qarabağda artıq bütöv bir nəsil yetişib və Azərbaycan insanların yaşaması üçün əlverişsiz bir yerdir. Hazırda Azərbaycanda qeyri-demokratik və səmərəsiz bir rejim mövcuddur. Ermənistanın vəziyyəti nə qədər ağır olursa-olsun, hər halda Azərbaycandan fərqli olaraq Qərbin ermənilərə qarşı münasibəti daha yaxşıdır. Ona görə hesab edirəm ki, münaqişənin vaxtının uzanması Azərbaycanın ziyanına işləyir.”

Münaqişənin vaxtının uzadılmasının Azərbaycan hakimiyyətinin marağına xidmət etdiyini qeyd edən Zərdüşt Əlizadə, “ölkəyə gələn neft-qaz pullarının kimlərin cibinə getməsi hamıya məlumdur. Ciblərinə pul gedən şəxslərin hamısı varlanır və xalqa deyirlər ki, lazım gəlsə Qarabağı alacağıq. Xalq da oturub qulaq asır. Digər tərəfdən, vaxtın uzanması bölgəni idarə edən Rusiyanın da maraqlarına xidmət edir. Rusiya bu münaqişə ilə Azərbaycan və Ermənistanı özündən asılı vəziyyət salıb. Eyni halda, münaqişə imkan verir ki, Qərb öz mövqelərini regionda daha da möhkəmləndirsin. Münaqişənin bir neçə yerə faydalı olması, münaqişənin həllinin qarşısını alır”, - deyə bildirdi.