Bit problemini həll edə bilməyən Azərbaycan ordusu Qarabağ problemini necə həll edə bilər?

Ordumuzda əsgərlərin təmizliyinə nə dərəcədə nəzarət olunur? Niyə ancaq Milli ordunun əsgərləru bit içində batır? Ordudakı şəraitsizliyə şəriat yaradanlar kimlərdir? Bit problemini həll edə bilməyən Azərbaycan ordusu Qarabağ problemini necə həll edə bilər? Mövzu ilə əlaqədar Faktxeber.com-un suallarını Silahlı Qüvvələrə Demokratik Vətəndaş Nəzarəti Azərbaycan Mərkəzinin direktoru Ələkbər Məmmədov cavablandırıb:

“Orduda natəmizliyin birinci arqumenti bitdir. Cəmiyyətdə belə fikir formalaşıb. Harada ki, bit var, demək orada natəmizlik var. Azərbaycan ordusunu bit basması Azərbaycan cəmiyyətinə çoxdan bəllidir. Bu məsələ dəfələrlə qaldırılsa da, həll olunmayıb. Rayonlarda, xüsusilə də cəbhə bölgəsində yerləşən hərbi hissələrdə natəmizlik baş alıb gedir. Həmin hərbi hissələrdə nəinki çimməyə, heç içməyə də su yoxdur. Əsgərlər uzun müddət çirkli qalırlar. Əsgərləri yuyunmağa aparıldığı hamamların özü də natəmiz formadadır. Məndə olan məlumata görə, əsgərlər, zabitlər hərbi hissədən qaçıb, yaxud icazəli formada mülki şəxslər üçün olan hamamlarda öz hesablarına çimmək məcburiyyətində qalırlar. Bundan əlavə, əsgərlərin paltarları mütamadi olaraq yuyulmur və təmiz geyimlə əvəz olunmur.

Ordu rəhbərliyi deyir ki, bu problemin olmasında günah şəxsi heyətin özündədir. Şəxsi heyət bunu edə bilər. Problem odur ki, bunu etmək istəsələr belə, etməyə də şərait yoxdur. Ordu heç kimin vecinə deyil. Hərə öz şəxsi marağını güdür. Orduda elə bir vəziyyət yaradıblar ki, psixoloji durum çox ağırdır. Əsgərlər, zabitlər arasında dostluq, səmimilik münasibətləri yoxdur. Rüşvət, korrupsiya, təhqir olunma ordunu bu vəziyyətə salıb. Bu işdə ordu rəhbərliyindən hərbi hissənin şəxsi heyətinə qədər hər kəs günahkardır. Ordu rəhbərliyi bu problemi aradan qaldırmaq üçün dövlət qarşısında müəyyən işlər görməlidir. Layihələr ortaya qoyulmalıdır. Bunlar yoxdur. Bunlar olmalıdır ki, hərbi hissədə komandirdən tələb etmək olsun. Bilirsiz ki, bizdə hərbi texnika Sovet dövründən qalmadır. Onlarla yanaşı, təmizliyi qaydada saxlamaq üçün müəyyən texnika, səyyar hamamlar var idi. Şəxsi heyəti hamama aparmaq mümkün olmayanda səyyar hamamlardan istifadə olunurdu. Bu gün onlar da yoxdur. Şəxsi heyətin paltarlarını yumaq üçün texnika var idi, indi o da yoxdur. Əsgərlərin yataq yerləri buxara verilirdi, bunu da bitə qarşı mübarizə üçün edirdilər. İndi bunların heç biri yoxdur. Çıxış yolu nədədir? Əgər bunlar yoxdursa, ay ordu rəhbərliyi, bu məsələni dövlət qarşısında qaldır. Beynəlxalq aləm sizə müəyyən təkliflərlə yanaşmaq istəyirlər. Onlarla müqavilələr bağlayın, pullar ayrılsın, onların mütəxəssislərini gətirin bu problemləri həll edin. Mən sizin “Bit problemini həll edə bilməyən Azərbaycan ordusu Qarabağ problemini necə həll edə bilər?” sualınızı ordu rəhbərliyinə vermək istərdim. Bu suala ordu rəhbərliyi cavab versin”.