"Məqsədim Azərbaycanı yaxın gələcəkdə üzləşə biləcəyi siyasi xaosdan xilas etmək, düzgün yol göstərməkdir" Bu sözləri Azərbaycan parlamentinin keçmiş baş spikeri Rəsul Quliyev, yaratdığı Müqavimət Hərəkatı haqqında məlumat verərkən bildirib.     
Bakıda mövcud siyasi müxalifətdən məsafə saxlamasını sabiq spiker “onların konkret plan və proqramının olmaması ilə” əlaqələndirib. R.Quliyevin fikirləri münasibət bildirən Müsavat Partiyasının başqan müavini Gülağa Aslanlı və KXCP sədri Mirmahmud Mirəlioğlu, FaktXeber.com-a açıqlama veriblər.

Müsavat Partiyasının başqan müavini Gülağa Aslanlı Rəsul Quliyevin addımını təqdirəlayiq hal kimi qiymətləndirdi: “15 il ABŞ-da yaşayıb, Azərbaycanda baş verən hadisələri müşahidə eləməklə məşğul olan və vacib məqamda ölkəyə gəlmək imkanı olan halda, buna cürət etməyən şəxsin siyasətə qayıtmasını müsbət qiymətləndiririk. Onun Azərbaycanı dəyişmək istəyi də müsbət şəkildə təqdir olunmalıdır. Müxalifəti hər hansı bir proqramının və strategiyasının olmamasında ittiham eləmək, ölkədəki durumu bilməməkdən irəli gəlir. Belə bir məlumatsızlıq siyasətə qayıtmaq istəyən adam üçün heç də müsbət hal kimi qəbul edilə bilməz. Azərbaycan siyasətinə qayıtmaq istəyən adam ölkənin durumunu yaxşı başa düşməlidir. Ən azında İP-nın “Yol Xəritəsi” ilə tanış olmalıdır.”

Azərbaycan müxalifətinin konkret olaraq plan və strategiyası olduğunu qeyd edən Gülağa Aslanlı, “Azərbaycandakı vəziyyətin dəyişdiyini və xalqın mübarizəsini görüb ölkəyə qayıdan istənilən şəxs xalqın rifahını və hakimiyyəti dəyişmək üçün hər hansı bir iş görəcəksə, biz onu təqdir eləyəcəyik”, - deyə bildirdi.

Sonra Gülağa bəy, Rəsul Quliyevin hazırkı ölkə müxalifəti ilə məsafə saxlamasının bir neçə səbəbi olduğunu qeyd etdi: “R.Quliyevin müxalifətlə bu qədər ara məsafəsi saxlamasının əsas səbəbi ölkənin daxili proseslərindən məlumatsız olmasıdır. Ola bilsin R.Quliyevə informasiya ötürən adamlar, birtərəfli məlumatlar verirlər. Digər səbəbi isə R.Quliyevin malik olduğu gücü ilə bağlıdır. Hazırda onun hansı qüvvəyə və gücə malik olduğunu həm Azərbaycan xalqı, həm də ki, ölkə müxalifəti çox gözəl bilir. Əgər o bundan sonra gəlib öz tərəfdarlarını ətrafına toplaya bilərsə, biz bu halı təqdir eləyəcəyik. Lakin uzaqdan dayanıb  kimlərisə tənqid eləmək, hakimiyyətin xoşuna gəlmək kimi anlaşıla bilər. İstəməzdik ki, bizdə belə düşünməyə məcbur olaq.”

KXCP sədri Mirmahmud Mirəlioğlu isə bu məsələ barəsində R.Quliyevin özünün daha yaxşı cavab verə biləcəyini qeyd etdi: “Mən sizdən fərqli düşünərək bunu deyərdim ki, R.Quliyev siyasətdən getməmişdi ki, qayıtsın. R.Quliyev siyasətdə idi. Bundan başqa məsələlər barədə heç nə bilmirəm.”

Eks spiker tərəfindən müxalifətin ünvanına səsləndirilən “ölkə müxalifətinin konkret plan və proqramı yoxdur” fikrinə də aydınlıq gətirən Mirmahmud bəy, “R.Quliyev bu fikirləri söyləməklə konkret adamları nəzərdə tutub. Lakin onların adını çəkmir”, - deyə bildirdi.