Reportyorların Azadlıq və Təhlükəsizlik İnstitutu Türkiyənin Azərbaycandakı Səfirliyinin dekabrın 6-da hüquq müdafiəçisi İntiqam Əliyevin İstanbul hava limanında saxlanılması ilə bağlı mətbuata verdiyi açıqlamanı Azərbaycanda ifadə azadlığına qarşı  addım kimi qiymətləndirir.
FaktXeber.com-un verdiyi məlumata görə, bu barədə RATİ-nin yaydığı bəyanatda bildirilir. RATİ qeyd edir  ki, səfirliyin Azərbaycan mətbuatı barədə bu cür aqressiv tərzdə  açıqlaması, ifadə azadlığına hörmətsizliyin və dözümsüzlüyün nümunəsidir: “Türkiyə  səfirliyinin İntiqam Əliyevlə bağlı hadisənin rəsmi istintaqının və digər zəruri araşdırmaların nəticələri bəlli olmadan  Azərbaycan jurnalistlərini qeyri peşəkarlıqda və təxribatçılıqda  günahlandırması diplomatların etik davranış qaydalarına, Azərbaycan qanunvericiliyinə və Avropa İnsan Haqları Konvensiyasına ziddir. İntiqam Əliyevin İstanbul hava limanında üzləşdiyi qeyri-insani rəftarla bağlı Azərbaycan mətbuatında dərc edilən yazılarda peşəkarsızlıq elementləri yoxdur və jurnalistlərin bu  hadisəyə ən müxtəlif  baxışlardan  yanaşmasını  ifadə azadlığının təzahürü kimi qiymətləndirir. Türkiyə  səfirliyi  bu cür ittihamedici bəyanatları vermək əvəzinə İntiqam Əliyevlə bağlı hadisənin ədalətli araşdırılmasına yardımçı olması daha yaxşı olardı. Qardaş Türkiyə Cümhuriyyətinin Xarici İşlər Nazirliyini Türkiyənin Azərbaycandakı səfirliyinin Mətbuat Müşavirliyinin  Azərbaycan mətbuatına qarşı dözümsüz açıqlamasını araşdırıb  və buna qiymət verməyə çağırır”.