ABŞ dövlət katibi Hillari Klinton Beynəlxalq İnsan Haqları günü ilə bağlı çıxışında Azərbaycanın adını dünyada insan haqlarının ən kobud şəkildə pozulduğu ölkələrdən biri olan Zimbabveyələ birgə çəkib. O, bildirib ki, Azərbaycandan tutmuş Zimbabveyə qədər siyasi məhbuslar öz ideyalarını, fikirlərini söylədiklərinə, müdafiə etdiklərinə görə, hələ də həbsxanalarda saxlanılır: “Bu gün biz bütün hökumətlərə müraciət edərək siyasi məhbusları dərhal və qeyd-şərtsiz azadlığa buraxmağa çağırırıq.”

Müsavat Partiyasının başqan müavini Arzu Səmədbəyli, Hillari Klintonun bu çıxışının Azərbaycanda nəyi dəyişəcəyi ilə bağlı FaktXeber.com-a açıqlama verib: “Bu çıxışlar həqiqəti əks etdirir. Söylənilənlər insan haqları müdafiəçisi olan təşkilatlar tərəfindən də səsləndirilib. Azərbaycan hakimiyyəti isə bu açıqlamalara çox esterik bir münasibət bəsləyərək, ölkədə siyasi məhbusların olmadığını bildirir. Hesab edirəm ki, Hillari Klintonun bu çıxışı Azərbaycandakı getdikcə sərtləşən vəziyyətə qarşı münasibətlərin ən son hədləridir. Azərbaycan hakimiyyətini xəbərdarlıq edən və yumşaq fonda danışan beynəlxalq təşkilatlar və Hillari Klinton, artıq bunun Azərbaycan hakimiyyəti üçün təsir etmədiyi fikrinə gəliblər. Artıq onlar gerçək mövcud vəziyyəti bildirməklə, bəlkə durumun düzələcəyinə ümid edirlər. Hakimiyyət bu günə qədər göstərilən münasibətlərdən heç bir nəticə çıxarmayıb. Dünya dəyişir və dəyişən dünyanın Azərbaycandan təsirsiz ötüşəcəyini düşünmürəm. Mütləqdir ki, Azərbaycan hakimiyyəti ya beynəlxalq təşkilatların ölkədə insan haqları və demokratiya durumu ilə bağlı səsləndirdiyi fikirlər qulaq asıb vəziyyəti dəyişməlidir, ya da ki, dünyada gedən proseslərin tərkib hissəsi olaraq özü dəyişəcək.”

“Hillari Klintonun çıxışına Azərbaycan hakimiyyətinin mövqeyi necə olacaq” sualına da aydınlıq gətirən Arzu Səmədbəyli, hakimiyyət tərəfindən təyin olunan növbətçi millət vəkillərinin bu çıxışı qınayacaqlarını bildirdi: “ABŞ dövlət katibinin bu fikirlərinə qarşı rəsmiləri tərəfindən sərt münasibətlər bildiriləcək. Təbii ki, rəsmilərin bu cür gülünc fikirlərinə rast gəlmək qaçılmaz olacaq. Çünki Azərbaycan hakimiyyəti inkarla olan münasibətlərə cavab verir və bunun da ziyanını çəkəcək.”