Rusiyada parlament seçkiləri artıq sona çatıb. Keçirilən parlament seçkilərində Vladimir Putinin başçılıq etdiyi Birləşmiş Rusiya Partiyası 49 faiz səslə birinci sırada olub. Artıq ölkə ərazisində seçkilərin nəticələrinə etiraz olaraq kütləvi aksiyalar keçirilib və kifayət qədər həbs olunan var. Keçirilən seçkilərin nəticələri və aksiyaları ilə bağlı FaktXeber.com-a açıqlama verən politoloq Fikrət Sadıqov, keçirilən seçkilərdə müəyyən qədər saxtakarlıqların olduğunu bildirdi: “Seçkilərdə baş verən etirazlar onu göstərir ki, seçkilər zamanı müxtəlif saxtakarlıqlar olub. Rəsmi Moskva özü də bu saxtakarlıqları etiraf edərək, həmin seçki məntəqələrindən yenidən seçkilərin keçirilməsinə dair göstəriş verib. Eyni zamanda bu da reallıqdır ki, Vahid Rusiya Partiyası, əvvəlki illərə nisbətən az səs toplayıb. Çünki əvvəlki illərdə əgər bu göstərici 60%-dən yuxarı idisə, hazırda bu göstərici 50%-dən aşağıdır. Deməli bu partiyaya qarşı etiraz edənlərin də sayıq artıb. Lakin onu da nəzərə almaq lazımdır ki, etiraz edənlərin arasında kifayət qədər millətçi qruplaşmalar var. Onlar təkcə bu seçkilərlə bağlı öz etirazlarını bildirmirlər. Onlar eyni zamanda digər millətlərə qarşı təhqiramiz ifadələr işlədirlər. Təbii ki, bu cür qüvvələr vəziyyətdən istifadə edib, öz prioritetlərini irəli sürmək istəyirlər. Bu məsələ həm Rusiya, həm də ki, orada yaşayan millətlər üçün kifayət qədər ciddi bir məsələdir”

ABŞ-ın seçkilərin qeyri-demokratik keçməsi ilə bağlı səsləndirdiyi fikirlərin Rusiya tərəfindən ciddi narazılıqla qəbul olunduğunu söyləyən Fikrət Sadıqov, ABŞ-ın belə addım atmasının səbəbinin Rusiyaya qarşı düşmənçiliyindən doğduğunu bildirdi: “Belə hal iki böyük dövlət arasında olan qarşılığın nəticəsidir. Rusiya hökuməti etiraz edənlərlə təbii ki, bir araya gələrək müəyyən kompromislərə getməlidir. Əgər bu mitinqlər davam etsə, heç də rəsmi Moskvanın xeyrinə olmayacaq. Artıq aksiyalar bir neçə şəhəri əhatə edib. Rusiya hökuməti aksiyaların qarşısını iki yolla ala bilər. Ya müxalifətlə dil tapmalıdır, ya da ki, zor gücü ilə aksiyaları yatırtmalıdır. Əks halda bu aksiyalar arası səngiməyəcək və etirazlar davam edəcək.”