FaktXeber.com-un verdiyi məlumata görə, prosesdə müdafiə tərəfi olaraq Hacıyevin vəkili Sadiq Bağırov, ittiham tərəfindən isə dövlət ittihamçısı Mahir Abbasov iştirak ediblər.  Amma şikayətçi Hacıyev prosesdə iştirak etməyib. Vəkil S. Bağırov çıxışı zamanı hüquqlarını müdafiə etdiyi gənc fəalın məhkəmədə iştirakının təmin edilməsini məhkəmədən xahiş edib. Hakim İ. Hacıqayıbov isə bildirib ki, B. Hacıyevə bu barədə məhkəmə tərəfindən bildiriş göndərilib. Amma  Hacıyev  məhkəməyə gəlmək barədə arzusunu bildirməyib.

Daha sonra proses müdafiə tərəfin vəsatətləri ilə davam edib. Vəkil S. Bağırov hərbi xidmətlə bağlı qanunvericilik aktlarının Konstitusiyaya uyğunluğunun yoxlanılması haqqında Konstitusiya Məhkəməsinə müraciət edilməsi barədə vəsatət qaldırıb. Vəkil Konstitusiya ilə alternativ xidmətin nəzərdə tutulduğunu, amma “Alternativ xidmət haqında” qanunun indiyə qədər qəbul edilmədiyinə diqqət çəkib. Habelə vəkil gənc fəal barəsində seçilmiş həbs qətimkan tədbirinin ləğv edilməsi və ilkin instansiya, eləcə də apellyasiya məhkəmələrinin iclas protokollarının surətlərinin müdafiə tərəfinə təqdim edilməsi barədə də vəsatətlər qaldırıb.

Dövlət ittihamçısı M. Abbasov vəkilin dəlillərini  və verilən  vəsatətlərini əsassız  hesab etdiyini bildirərək, məhkəmədən Gəncə apellyasiya məhkəməsinin qərarının dəyişdirilmədən saxlanılmasını istəyib.

Nahar fasiləsindən sonra hakim İ. Hacıqayıbov kassasiya şikayətinin təmin olunmadığını elan edib.

Xatırladaq ki, Bəxtiyar Hacıyev barəsində cinayət işi yanvarın sonlarında açılıb. Elə həmin vaxt ondan yaşadığı yeri tərk etməmək haqqında iltizamnamə alınıb, fevralın əvvəllərində isə bu qətimkan tədbiri “polisin nəzarətində olma” ilə əvəz olunub.
Martın 4-də Hacıyev bir ay müddətinə həbs edilib.   18 may 2011-ci il tarixində Gəncə şəhər Nizami rayon Məhkəməsi  gənc fəal Bəxtiyar Hacıyevin  Cinayət Məcəlləsinin 321.1-ci maddəsi ilə (hərbi xidmətdən yayınma) təqsirli bilərək  2 il müddətinə azadlıqdan məhrum olunması  barədə hökm çıxarıb. 6 iyul 2011-ci il tarixdə bu qərardan verilən apellyasiya şikayəti təmin edilməyib.

Hüquq müdafiə təşkilatları hesab edirlər ki,  2010-cu il parlament seçkilərində deputatlığa namizəd olmuş gənc fəal  facebook-da gənclərin 11 mart “Böyük xalq günü” etiraz aksiyasını təyin edən qrupun üzvü olduğuna görə həbs olunub.

Nicat Xaliqoğlu