“Cenevrə Konvensiyasına görə, Ermənistan işğal olunmuş Azərbaycan torpaqlarında hər hansı bir iqtisadi və infrastruktur dəyişikliklərə səbəb olacaq fəaliyyət apara bilməz.” Bunu xarici işlər nazirinin müavini Araz Əzimov Kəlbəcərdə ermənilər tərəfindən magistral yolun çəkilməsinə münasibət bildirərkən söyləyib. Artıq neçə illərdir ki, Ermənistan hakimiyyəti Dağlıq Qarabağ ərazisində kifayət qədər iqtisadi və infrastruktur fəaliyyətlər həyata keçirdir. Bəs beynəlxalq təşkilatların Ermənistanın qeyri-qanuni həyata keçirdiyi fəaliyyəti qarşısında acizliyini və ya susqunluğunu nə ilə izah etmək olar? Mövzu ilə bağlı FaktXeber.com-a açıqlama verən Müsavatın Partiyasının başqan müavini Arzu Səmədbəyli Qarabağ münaqişəsinin bu səviyyəyə gəlib çıxmasının əsas səbəbkarının Azərbaycan hakimiyyəti olduğunu bildirdi: “Belə bir münasibət indiyə qədər olanların davamıdır. BMT-nin 4 qətnaməsinin heç birinə bu günə qədər əməl olunmayıb. Beynəlxalq təşkilatların heç biri erməniləri nə Qarabağdan çıxarası deyil, nə də ki, torpaqlarımızı alıb qaytaran deyil. Faktiki olaraq Qarabağ “de yuri” olaraq bizimdir, “de fakto” isə ermənilərindir. Ermənilər ürəkləri nəyi istəyir, onu da eləyirlər. Başlarını aşağı salaraq, öz işləri ilə məşğuldurlar. Dağlıq Qarabağın sadəcə olaraq beynəlxalq səviyyədə tanınması qalıb. Qalan məsələlərdə Ermənistan özünü faktiki olaraq Qarabağın sahibi kimi aparır. Ermənistan rəhbərliyi istədiyi vaxt işğal olunmuş torpaqlara gəlir-gedir və orada keçirilən seçkilərdə rahat formada iştirak edirlər. Bu cür hallara beynəlxalq birlik ya susqun qalır, ya da ki, çox yüngül formada münasibət bildirir. Çox təəssüf ki, son vaxtlar beynəlxalq birliklər tərəfindən Qarabağın Azərbaycan ərazisinin bir hissəsi olması kimi tanınması sevinclə qarşılanır. Bu çox təəssüfləndirici bir vəziyyətdir. Çünki biz bu məsələni yox, Qarabağla bağlı qətnamələrin yerinə yetirilməsi üçün Ermənistana qarşı tətbiq ediləcək sanksiyaları sevinclə qarşılamalıyıq. Hazırda ölkənin xarici siyasəti bu istiqamətdə qurulmalıdır. Hakimiyyətin seçdiyi xarici siyasətin nəticəsidir ki, Ermənistan özünü bu cür aparır və Dağlıq Qarabağ zonasında istədiyi infrastruktur layihələri həyata keçirdir. Beynəlxalq birliklər bu məsələdə ədalətsiz mövqe nümayiş etdirməsinə baxmayaraq, Qarabağ münaqişəsi ilə bağlı ən çox qınanan Azərbaycan hakimiyyəti olmalıdır. Beynəlxalq birliklər işğala məruz qalmışla, işğalçı arasında fərq qoymurlar. Belə bir halda heç vaxt Dağlıq Qarabağ münaqişəsinin ədalətli həllinə heç bir halda nail olmaq mümkün deyil.” 

Qarabağ münaqişəsinin həll olunmasının ən birinci şərtinin ölkə daxilində ümummilli bir ovqatın yaradılması olduğunu qeyd edən Arzu Səmədbəyli, hakimiyyətin demokratik qüvvələrlə birgə Qarabağ münaqişəsi ilə bağlı vahid mövqedən çıxış etməsinin zəruri olduğunu bildirdi: “Ölkədə birliyin yaradılması iqtidarın beynəlxalq səviyyədə mövqeyini möhkəmlədə bilər. Çox təəssüf ki, bunların heç biri yoxdur. İndiyə qədər olanlar yəqin ki, bundan sonrada davam edərək imitasiya xarakterli müharibə bəyanatları ilə ört basdır ediləcək.”