Noyabrın 25-də MİRAS Mədəni İrsin Öyrənilməsinə Kömək İctimai Birliyinin sədri, tarix üzrə fəlsəfə doktoru Fariz Xəlilli Qaradəniz Texniki Universitetində “Azərbaycan-Trabzon əlaqələri tarixdə və Azərbaycanda arxeoloji turizm” mövzusunda məruzə edib.
İctimai Birlikdən FaktXeber.com-a verilən məlumata görə,  tədbirdən əvvəl Universitetin rektoru, professor İbrahim Özen ilə görüşən Fariz Xəlilli MİRAS İctimai Birliyinin Azərbaycanda mədəni irsin öyrənilməsi, mühafizəsi və təbliği sahəsində gördüyü işlər haqqında məlumat verib. Rektor Azərbaycan universitetləri ilə əlaqələrinin olduğunu, Universitetdə 200-ə qədər azərbaycanlı tələbənin təhsil aldığını qeyd edib. O, Trabzonun tarixdə Azərbaycanla geniş əlaqəsinin olması və bu əlaqələrin öyrənilməsində birgə fəaliyyətləri dəstəklədiklərini vurğulayıb. Sərgilərinin Dünya Ticarət Mərkəzində davam etdiyini nəzərə çatdıran Fariz Xəlilli MİRAS İctimai Birliyinin fəaliyyətini əks etdirən kitab, jurnal və filmləri rektora təqdim edib.
Qaradəniz Texniki Universiteti Qaradəniz Araşdırmaları İnstitutunun direktoru, professor Kenan İnan, Tarix bölümü müəllim və tələbələri, Universitetdə oxuyan azərbaycanlı tələbələrin iştirak etdiyi tədbir Atatürk Kültür Mərkəzində keçirilib.
Universitetin müəllimi Sabahattin Usta tədbiri açdıqdan sonra Fariz Xəlillini təqdim edib. Trabzon və Azərbaycanın əlaqələrinin hələ Osmanlıların bu şəhəri fəthindən əvvəl olduğunu qeyd edən Fariz Xəlilli, Ağqoyunlu padşahı Uzun Həsən, anası Sara xatun və Osmanlı sultanı Fateh Mehmetin münasibətlərindən danışıb. Burada Ayasofiya Muzeyində nümayiş olunan Trabzon qala divarlarının bərpa kitabəsində Şirvanşahzadə Mirzə Məhəmmədin adına rast gəldiyini qeyd edən məruzəçi, Şirvanşah ailəsinin bu dövlətin süqutundan sonra yerləşdiyi yerlərdən birinin məhz Trabzon olduğunu deyib.
Azərbaycan və Türkiyə mədəni irs abidələrinin tanınması və təbliğində mədəni turizmin əhəmiyyətindən danışan Fariz Xəlilli, Azərbaycanda orta əsr Ağsu şəhərində AMEA Arxeologiya və Etnoqrafiya İnstitutunun Ağsu arxeoloji ekspedisiyasının tədqiqatlarından bəhs edib. Arxeoloji turizmin təbliği istiqamətində Mədəniyyət və Turizm Nazirliyi ilə birlikdə çalışdıqlarını vurğulayan məruzəçi Azərbaycan mədəni irsinin Türkiyədə yetərincə tanınmamasına təəssüflənmiş, qarşılıqlı mədəni əlaqələrin iki ölkənin hərtərəfli inkişafına xidmət edəcəyini qeyd edib.
Daha sonra MİRAS İctimai Birliyinin Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının donorluğu ilə çəkdiyi “Azərbaycan abidələr diyarıdır” filmi nümayiş olunub.
Qaradəniz Araşdırmaları İnstitutunun direktoru professor Kenan İnan ortaq mədəniyyətimizi tanıtması baxımından bugünkü tədbirin əhəmiyyətindən danışmış, birgə layihələrin həyata keçirilməsində maraqlı olduqlarını söyləyib.
Azərbaycanlı tələbələrin Azərbaycanın mədəni irsini Trabzon və ətrafında geniş şəkildə tanıtması üçün MİRAS İctimai Birliyinin dəstək verməyə hazır olduğu vurğulanıb.

Nərgiz Kazımlı