Misirdə «Ərəb baharı»nın çoxdandır geridə qalmasına baxmayaraq, bu ölkədə iğtişaşlar səngimir. Yenidən baş qaldıran etirazlar zamanı təhlükəsizlik qüvvələrilə nümayişçilər arasında hər gün toqquşmalar baş verir. Son bir neçə gündə qarşıdurmalar nəticəsində ölənlərin sayı 40 nəfəri ötüb, minlərlə yaralının olduğu bildirilir. Qahirəyə toplaşan geniş xalq kütləsi Ali Hərbi Şuradan parlament və prezident seçkilərinin keçirilməsini tezləşdirməyi tələb edirlər. Misirin müvəqqəti hökuməti isə etirazlara baxmayaraq, seçkilərin vaxtının dəyişdirilməyəcəyini bəyan edib. Misirdə yenidən başlayan proseslərə münasibətini öyrənmək üçün Azərbaycan İslam Partiyasının (AİP) sədr əvəzi Elçin Manafovla söhbətləşdik.
E.Manafov bildirdi ki, Hüsnü Mübarək hakimiyyəti devrildikdən sonra xalq diktatordan qurtulub, azadlığa çıxdığını düşünsə də, xarici qüvvələr Misirdə yenindən maraqlarına uyğun rejim yaratmağa çalışırlar: «Mübarək rejiminin devrilməsində Misir xalqının istəyi olsa da, prosesdə Amerika və Qərb də kifayət qədər rol oynadı. Ərəb ölkələrinin əksəriyyətinin başçıları, xüsusilə də Hüsnü Mübarək ABŞ-ın, Qərbin adamları idi. Ərəb xalqlarının getdikcə bunu dərk etdiyini və oyanışını görən Birləşmiş Ştatlar üçün təyin etdyi kadrlar yararsız hala düşdü. O baxımdan Qərb və bəzi Avropa dövlətləri ərəb dünyasında cərəyan edən hadisələrə dəstək verib, bundan yararlanmağa çalışırlar».
AİP sədri dedi ki, Hüsnü Mübarəkin İsrailin blokadasında olan Qəzzaya dəhliz açması onsuzda ABŞ-ı çoxdanıydı qəzəbləndirmişdi: «Bu və qeyd etdiyim digər səbəblərdən Mübarəkin hökmünü verən Amerika üçün Misirdə xalqın ayağa qalxması əlverişli şərait yaratdı. Lakin keçmiş rejimin süqutundan sonra misirlilərin müstəqil hakimiyyət formalaşdırmaq istəyi Vaşinqtonu qane etmir. İndi bu ölkədə hərbi xunta və müvəqqəti hökumətlə xalq arasında yaranan narazılıqlar, yenidən baş qaldıran qanlı toqquşmalar təsadüfi deyil. Yeni iğtişaşların yaranmasında, xalqın tələblərinə baxmayaraq, Ali Hərbi Şuranın parlament və prezident seçkilərinin vaxtını dəyişdirməkdən boyun qaçırmasında ABŞ və Qərbin əli olduğu göz önündədir».
E.Manafovun fikrincə, Birləşmiş Ştatlar Misirdə İraq variantını həyata keçirmək planını işə salıb: «Misir xalqını belə bir qənaətə gətirmək istəyirlər ki, o, Qərbin, Amerikanın dəstəyi olmadan yeni və güclü hakimiyyət formalaşdırmaqda acizdir. O vaxt İraq xalqı Səddamı devirəndə necə deyərlər, ağ günə çıxdığını düşündü. Ağ Ev bunu həmin ölkədə qurduğu qanlı oyunlar, həyata keçirdiyi təxribatlar nəticəsində edə bildi. Amma göründüyü kimi, ABŞ siyasəti iraqlılara baha başa gəldi. Birləşmiş Ştatlar ərəb xalqlarının azadlıq qazanmasını, müstəqil dövlət, hakimiyyət qurmasını, İslami qüvvələrin siyasi səhnəyə gəlməsini istəmir. Çünki bütün bunlar onun dövlət maraqlarına, xarici siyasətinə, iqtisadi maraqlarına ziddir. Xatırlayırsızsa, Misirdə inqilab başlayanda orada İslami idarəçilik sisteminin qurulması fikirləri səslənirdi. Bu fikrin özü də Vaşinqtonu rahat buraxmır. Təəssüf ki, xarici müdaxilə və təsirlər nəticəsində Misir xalqı yeni hökumətini yaratmaq arzusuna nail ola bilmir. Əgər orada Hüsnü Mübarək rejiminə oxşar bir hakimiyyət formalaşdırılsa inqilabın, tökülən qanların heç bir əhəmiyyəti olmayacaq».
Emin Nəsirli
