Rusiya prezidenti Dmitri Medvedev Başkırdıstan Respublikasının paytaxtı Ufada Mərkəz Məscidini ziyarət edib.
FaktXeber.com-un Rusiya mediasına istinadən verdiyi məlumata görə, ayaqqabılarını çıxarıb məscidinin içinə girən Medvedev, Rusiya Müsəlmanları Mərkəzinin müftisi Talqat Tacəddindən ətraflı məlumat alıb. Rusiya Müftilər Şurası başçısı Ravil Qaynuddin və digər bölgə müftiləri ilə bir görüşən Medvedev, Rusiya müsəlmanlarının problemlərini dinləyib. Rusiya lideri, Sovetlərin devrilməsindən sonra müsəlman cəmiyyətlərinin dini təhsil mərkəzləri və məscidlər tikməsinin məmnuniyyətverici olduğunu söyləyib.

Rusiyanın çoxdinli və çoxmillətli quruluşuna diqqət çəkən Medvedev, Rusiyanın gələcəyi olan uşaqların mənəvi və əxlaqi baxımdan təhsillərinin əhəmiyyətinə diqqət çəkib. Rusiyada müsəlman cəmiyyətin aktiv olduğuna toxunan Medvedev, əhəmiyyətli sözlər söyləyib: "1990-cı illərin əvvəlində Rusiyada 90 məscid vardı. Dini təhsil verən heç bir məktəb yox idi. İndi isə 7 mindən artıq məscid var. Müsəlman din xadimi yetişdirən 96 cəmiyyət və 7 universitet var. Yalnız son dörd ildə 320 yeni məscid tikilib. Bu işlər Rusiyanın hər yerində həyata keçirilir."

Rusiya müsəlmanlarının həcc ibadətinə də böyük maraq göstərdiklərini söyləyən Medvedev, bu il 22 min 500 vətəndaşın bu ibadəti yerinə yetirdiyini, bu rəqəmin əksəriyyəti müsəlman olan bir çox ölkədən daha yüksək olduğunu söyləyib.

Rusiyada ənənəvi İslamın inkişafı və radikalizm tərəfdarlarına qarşı mübarizənin vacibliyini vurğulayan Medvedev, "dini məlumatsızlıq ikiqat təhlükəlidir. Bu yalnız fikirdə deyil, əməldə də səhv istiqamətlərə səbəb olur. Cinayətkar təşkilatlar öz hərəkətlərində dini şüarlar istifadə edir. Qafqazda radikalçılara qarşı olan din adamlarının öldürüldüyünü görürük. Bu da din adamlarının doğru dinlə təhrif edilmiş olan arasında ayrı-seçkilik etmələrinin nə qədər əhəmiyyətli olduğunu göstərir", - deyə bildirib.

Məktəblərdə 21 ayrı bölgədə seçimlə din təhsilinin başladığını, gələcəkdə bu işlərin bütün Rusiyaya yayılacağını söyləyən Medvedev, İslami nəşrlər üçün də büdcədən 1 milyard ruble (33 milyon dollar) ayrıldığını xatırladıb.

Babək