Prezident Administrasiyasının ictimai-siyasi şöbəsinin müdiri Əli Həsənov müxalifətin ünvanına növbəti dəfə kəskin fikirlər səsləndirib. Ə.Həsənov ölkə müxalifətini vətənə xəyanət etməkdə, Azərbaycan dövlətinin gələcək inkişafı ilə bağlı fərqli fikirlərini özündə ehtiva edən proqramlarının olmamasında və digər məsələlərdə ittiham edib.
Müsavat Partiyasının başqan müavini Gülağa Aslanlı bu fikirlərə bağlı FaktXeber.com-a müsahibə verib.

- Gülağa bəy, ölkə müxalifətinin Azərbaycan dövlətinin gələcək inkişafı ilə bağlı hər hansı bir proqramının olmaması ilə bağlı fikri necə dəyərləndirirsiniz?
- Təbii ki, belə deyil. Müxalifət zaman-zaman öz proqramlarını açıqlayıb. Həm 2000-ci ildə keçirilən parlament seçkiləri zamanı, həm də ki, 2003-cü ildə müxalifətin vahid namizədliyini irəli sürdüyü İsa Qəmbər tərəfindən ölkənin inkişafı və gələcəyi üçün kifayət qədər proqramlar irəli sürülmüşdü. Hakimiyyət sadəcə hər hansı bir təklifi nəinki dəyərləndirmək, hətta baxmaq belə istəmir. Sonuncu dəfə İctimai Palata hakimiyyətə demokratiyaya yumşaq keçidin “Yol xəritəsi” adlı bir sənəd təqdim etmişdir. Bütün beynəlxalq təşkilatlara və ölkə başçısına göndərilmiş “Yol xəritəsi” sənədinə bu günə qədər hakimiyyətdən heç bir cavab gəlməyib. Sadəcə olaraq, qeyri-rəsmi olaraq özlərini hakimiyyətin sözçüsü elan eləmiş Siyavuş Novruzov və Mübariz Qurbanlı həmin sənədin guya divardan asılacaq bir sənəd olduğunu bildiriblər. Əminəm ki, adını çəkdiyimiz şəxslər heç onu oxumayıblar. Özlərini demokratik bir dövlətin nümayəndəsi kimi göstərmək istəyən hakimiyyət nümayəndələri, müxalifətin göndərmiş olduğu hər hansı bir sənədə ən azı rəsmi cavab yazmalıdırlar ki, ya siz bunu düz yazmamısınız, ya da ki, düz yazmısız. Halbuki, bizim yazdığımız o məsələlərdən artıq biri həll olunub. 10 ilə yaxındır ki, iqtidar nümayəndələri, hətta Əli Həsənovun özü deyirdi ki, eks-prezidentlər haqqında qanun hazırlamağa ehtiyac yoxdur. Bəs necə oldu ki, birdən-birə eks-prezidentlər barədə qanun çıxardaraq, 3 oxunuşdan sonra qəbul olundu.    

- Əli Həsənov bildirib ki, Yeni Azərbaycan Partiyasının hakimiyyətə gəlməsi ilə Azərbaycanda nümunəvi siyasi fəaliyyət ortaya qoyulub. Sizcə YAP bunu bacara bildimi?
- Hansı siyasi fəaliyyətdən danışırlar. YAP Azərbaycanda korrupsiya, təhsildə, səhiyyədə və digər sahələrdə olan rüşvətxorluqdan və məmur özbaşınalıqlarından başqa Azərbaycan üçün nə gətirib? YAP hakimiyyətə gəldikdən sonra nə vaxt siyasi diskussiya təşkil edib? Onların bəyənmədikləri Xalq Cəbhəsinin dövründə televiziyalarda siyasi partiyaların ən azı diskussiyaları təşkil olunurdu. Yadıma gəlmir ki, hazırkı iqtidar bu günə qədər hər hansı bir siyasi debat təşkil etsin. Əli Həsənov və digər hakimiyyət nümayəndələrinin istənilən biri ilə debata çıxmağa hazıram. Ən azı debata çıxıb siyasi prülarizm göstərsinlər ki, Azərbaycanda doğrudan da fikir azadlığı mövcuddur. Özləri istədikləri şeyi sifariş verir, sonra çalır və oynayırlar. Ona görə də YAP-ın Azərbaycana hər hansı bir siyasi mədəniyyət gətirməsi barəsində bir fikir söyləmək sadəcə baş qarışdırmaqdan başqa bir şey deyil.

- Eyni halda Əli Həsənov ölkə müxalifətinin xalqa və millətə xəyanət etdiyini bildirib. O, hazırkı müxalifətin xarici qüvvələrin dəstəyi ilə millətin və xalqın mənafeyinə xidmət etmədiyini qeyd edib. Bu fikirlərə münasibətiniz necədir?
- Əli Həsənov bu fikirləri səsləndirməklə ən böyük cinayət törətmiş olub. Heç bir əsas olmadan müxalifəti vətənə və millətə xəyanət cinayətində ittiham etmək, siyasi etikanın olmamasından irəli gəlir. Amma fakt faktlığında qalır ki, 20 ildir hakimiyyətdə olan Əli Həsənov və onun komandası Azərbaycanın bir qarış torpağını belə qaytara bilməyib. Azərbaycanın adı beynəlxalq təşkilatların yaratmış olduğu reytinq siyahılarında daima geri düşməkdə davam edir. Ən azı bir-iki gün bundan əvvəl “Amnesty İnternational” təşkilatı vermiş olduğu hesabat bir daha bunu göstərir ki, Azərbaycanda demokratiyaya və irəliyə doğru heç bir inkişaf yoxdur. Hakimiyyətin rəyinə görə, azadlıq qışqıran hər hansı bir şəxsə 3 il həbs cəzası verirlərsə, onda kimin xəyanətkar olduğu və kimin millətə xalqa, xəyanət etdiyi aşkar bilinir.