Bu gün Avropa İttifaqının təhlükəsizlik və xarici siyasət üzrə ali nümayəndəsi Ketrin Eştonun Cənubi Qafqaz ölkələrinə səfəri başlayır. Onun cənubi Qafqaz ölkələrinin prezidentləri, xarici işlər nazirləri və digər rəsmilərlə, habelə vətəndaş cəmiyyəti təmsilçiləri ilə görüşləri planlaşdırılıb. Səfərdə əsas müzakirə mövzusu isə Dağlıq Qarabağ münaqişəsi olacaq. Rusiyalı analitiklər bildiriblər ki, ABŞ Ermənistan-Azərbaycan danışıqları prosesindən Rusiyanı sıxışdırmağa çalışır, bu məqsədlə Avropa ilə ortaq hərəkətə keçib. Mövzu ilə bağlı FaktXeber.com açıqlama verən politoloq Vəfa Quluzadə bildirdi ki, əgər belə bir cəhd bu dəfə mümkün olmasa, gələn dəfə baş tutacaq: “Rusiya Qarabağ münaqişəsi ilə bağlı hazırda mürtəce rol oynayır. Rusiya hazırda Ermənistanı qapazaltı eləyərək, koloniya vəziyyətdə saxlayır. Ermənistanın bütün siyasi və iqtisadi iradəsi Rusiyadan asılıdır. Hazırda ölkənin bütün məmurları Rusiya tərəfindən təyin olunur. Yəni Rusiya Ermənistanı heç nə edərək, Qarabağ məsələsinin sülh yolu ilə həllinə maneçilik törədib. Belə olan halda, ABŞ Rusiyanı sıxışdıraraq bu məsələdən kənarlaşdırmaq istəyir ki, Azərbaycan və Ermənistan bir masa arxasında oturub razılıq əldə etsinlər.”              

“ABŞ istəyinə nail olacağı təqdirə, bunun Qarabağ münaqişəsinin həllinə nə kimi faydaları olacağı” ilə bağlı suala isə V.Quluzadənin cavabı belə oldu: “Bu məsələni çox adam başa düşmür. Bizim regionda sülhün böyük əhəmiyyəti var. Beynəlxalq hüquqa əsasən, işğal edilmiş torpaqlarımız bizim olacaq. Ona görə də hesab edirəm ki, ABŞ-ın cəhdləri bizim və ermənilərin xeyrinə nəticələnəcək.”

Xəyal Şükür