Hazırda Bakı şəhərinin mərkəzi küçələrində təmir-tikinti, kanalizasiya xətlərinin çəkilməsi, asfaltlama, yol ötürücüsü və yeraltı keçidlərin tikintisi aparılır. Bu səbəbdən də həmin istiqamətlərdəki yollarda avtomobil tıxacları yaranıb. Son günlər paytaxt Bakıda sadaladığımız problemlərlə bağlı yaranmış tıxaclara aydınlıq gətirən BYPİ-nin mətbuat xidmətinin rəisi, polis polkovnik-leytenantı Vaqif Əsədov FaktXeber.com-un suallarını cavablandırıb.   

- Vaqif müəllim, BŞYP idarəsi yaranmış tıxaclarla bağlı hər hansı bir tədbir görürmü?
- Artıq neçə vaxtdır ki, paytaxt Bakının mərkəzi küçələrində təmir-tikinti və yenidən qurma işləri aparıldığına görə, avtomobillərin hərəkəti üçün müəyyən maneələr yaranıb.  Buna baxmayaraq, yol polisi hərəkətin təhlükəsizliyini təmin edir və bundan sonra da təmin edəcək.  Eyni zamanda gördüyümüz işlərlə bağlı gündəlik olaraq KİV-lər məlumatlandırılacaq.

- Yollarda olan sıxlıq və tıxaclar əsasən hansı səbəblərdən yaranır?
- Yollarda sıxlığın yaranmaması üçün yol mədəniyyətinin formalaşmasına ehtiyac var. Tıxaclar əsasən yol hərəkəti qaydalarının pozulması nəticəsində yaranır. Tıxaclar əsasən günün pik saatlarında əmələ gəlir. Bir və ya bir neçə sürücünün yol hərəkət qaydasını kobud şəkildə pozması nəticəsində tıxaclar baş verir. Tıxaclar zamanı əhali polis əməkdaşlarını təcili olaraq əraziyə göndərilməsini tələb edirlər. Belə olan halda isə sual meydana gəlir ki, biz nə vaxta qədər polis əməkdaşının köməyindən istifadə edərək, öz hərəkətlərimizi tənzimləyəcəyik? Bu gün paytaxt ərazisində avtomatik idarəetmə sistemi yaradılıbsa və paytaxt yollarında yol hərəkət qaydalarını pozan sürücüləri çox rahat formada aşkar edilərək inzibatı cəzaya cəlb olunursa, belə olan halda nəyə görə, yol polisi yolda duraraq yol hərəkət qaydasını tənzimləməlidir? Azərbaycan dünyəvi dövlətdir desək, heç də yanılmarıq. Bütün halda kimliyindən asılı olmayaraq, hər bir hərəkət iştirakçısı yol hərəkəti haqqında qanunun tələblərini bilməli və bu tələblərə düzgün şəkildə əməl etməlidir ki, ən azından özünün və digərlərin təhlükəsizliyini təmin etmiş olsun.

- Qadağan olunmuş yerlərdə avtobus saxlayan sürücülərə qarşı hər hansı inzibati cəzalar tətbiq edilirmi?
- Polis əməkdaşlarımızı gündəlik olaraq dislokasiya üzrə təhkim olunduqları ərazilərdə yol hərəkət qaydalarını kobud şəkildə pozan avtobus sürücülərinə qarşı mübarizə aparırlar. Yanvarın 1-dən bu günə qədər 900-ə yaxın avtobus sürücülərinə qarşı yol hərəkət qaydalarını pozduqlarına görə, inzibatı protokol tərtib edilib. Avtobus sürücüləri tərəfindən yolun hərəkət hissəsində, ikinci cərgədə, dayanacaqdan kənarda və yaxud yol ayrıclarının keçmə qaydalarını pozan, eyni zamanda müvafiq kateqoriya olmadan avtomobil idarə edən sürücülər əməkdaşlarımız tərəfindən aşkar edilərək məsuliyyətə cəlb olunublar.