Bu gün RATİ-də “Xural” qəzetinin redaksiya heyətinin və redaktorlar birliyinin təşkilatçılığı ilə millət vəkili Gülər Əhmədovanın şikayəti əsasında həbs olunan “Xural” qəzetinin baş redaktoru Əvəz Zeynallının hüquqlarının müdafiəsi ilə bağlı dəyirmi masa keçirilib. FaktXeber.com-un verdiyi məlumata görə, dəyirmi masada ölkənin tanınmış hüquq müdafiəçiləri, media rəhbərləri və ictimaiyyət nümayəndələri  iştirak ediblər. İlkin olaraq çıxış edən Turan İnformasiya Agentliyinin rəhbəri Mehman Əliyev, baş redaktorun həbsinə səbəb olan hadisə barəsində bütün sübutların toplanmasının zəruri olduğunu qeyd etdi. Əvəz Zeynallı ilə bağlı hazırda müdafiə komitəsinin lazım olmadığını qeyd edən Mehman Əliyev, baş vermiş olayla bağlı hər kəsin öz vəzifəsinə əməl etməsinin lazımlığını bildirdi.
Sonra çıxış edən “Yeni Müsavat” qəzetinin baş redaktoru Rauf Arifoğlu, hadisədən qabaq Gülər Əhəmdovanın ona günlərlə zəng elədiyini bildirdi. “Avqust ayının 2-si Gülər Əhmədova mənə zəng eləyərək çox böyük təkidlə xahiş elədi ki, Əvəz Zeynallıdan xahiş edim onun telefonuna cavab versin. Sonra Gülər Əhmədova mənə bildirdi ki, səndən qabaq 8-10 nəfərə yaxın adama müraciət eləmişəm. Əvəz heç birinin sözünə qulaq asmayıb. Bəlkə sənin sözünü yerə salmadı. Gülər Əhmədova mənimlə danışarkən bunun həyatı bir məsələ olduğunu qeyd etmişdi. Mən də bir fərd olaraq qadın həyatını təhlükədən qurtarmaq və insanlıq borcunu yerinə yetirmək üçün Əvəz Zeynallıya zəng eləyərək dedim ki, Gülər Əhmədovanın telefonunu götürsün. Bundan sonra baş verən hadisələrdən xəbərim yoxdur.”

Gülər Əhmədova barəsində qəzetdə yayımlanacaq materialın nədən ibarət olduğuna dair suallara aydınlıq gətirən Əvəz Zeynallının həyat yoldaşı Məlahət Zeynallı bunları bildirdi: “Əvvəllər Gülər Əhmədovanın rəhbərlik etdiyi “Mərkəz” qəzetində redaktor vəzifəsində fəaliyyət göstərən Nigar Almanqızı, Gülər Əhmədova ilə aralarında yaranmış problemə görə, qəzetdən uzaqlaşaraq Türkiyədə yaşamağa getmişdi. Nigar Türkiyədə olduğu müddətdə Əvəz Zeynallı ilə əlaqə saxlayaraq, Gülər Əhmədova ilə bağlı şok faktları “Xural” qəzetində açıqlamaq istədiyini bildirdi. Sonra Əvəz Zeynallıya bildirdi ki, qəzetin bu sayında belə bir məlumatın gedəcəyi ilə bağlı qısa anons verdik. Sonra biz qəzetdə gələn sayımızda belə informasiyanın getməsi ilə bağlı qısa anons verdik. Ancaq növbəti sayımızda Nigar Almanqızı dediyi informasiyanı göndərmədi. Əldə etdiyimiz məlumata görə, buna səbəb bir həftə ərzində Gülər Əhmədova ilə Nigar Almanqızı arasında olan razılaşma olub. Yəni “Xural” qəzetinin Gülər Əhmədova ilə bağlı problemi bu səviyyədə olub. Lakin bundan sonra Gülər Əhmədova çantasında diktafonu qoşaraq bizim ofisə gəlib və Əvəz Zeynallıya pul təklif edib. Hazırda əldə olunan səs yazmalarda yalnız Gülər Əhmədovanın səsi eşidilir. Qarşı tərəfin rüşvət istəməsi ilə bağlı heç bir səs yazısı yoxdur.”

Sonda tədbir iştirakçıları baş redaktorun həbsən azad olması ilə bağlı birgə fəaliyyət göstərəcəklərini bildirdilər.