18 Oktyabr - Müstəqillik günü maraqlı bir müsahibə təqdim etmişdik. Müsahibimiz isə çoxlarına naməlum olan rəssam-dizayner, əməkdar incəsənət xadimi və Azərbaycan gerbinin müəllifi Rafiq Məmmədov idi. Amma bu müsahibənin yayımından sonra Azərbaycan gerbi ilə bağlı başqa bir iddia da ortaya atıldı. "Yeni Müsavat" qəzetində Füzuli Axundov adlı rəssam gerin üzərindəki "Allah" sözünün məhz ona məxsus olduğunu iddia etdi və nə qədər qəribə olsa da, öz həmkarı barədə sanki adi bir adamdan danışırmış kimi bəhs edir. Və ittihamla danışır ki, Rafiq Məmmədova verilmiş tapşırığı o yerinə yetirmədiyi üçün işi Füzuli Axundov özü davam etdirir. Bundan əlavə həmçinin 90-cı illərin əvvəllərində Rafiq Məmmədovun Azərbaycan gerbi üçün elan edilmiş müsabiqədə 3 dəfə qalib çıxmış gerb layihəsini də aşağılayaraq, orada çəkilmiş Səməndər quşlarını xoruza bənzədərək, bunu xoruz döyüşü adlandırır. Amma Rafiq müəllim fərqli düşünür. R.Məmmədov hazırladığı və 3 dəfə müsabiqədən keçərək qalib olmuş gerb barədə belə söyləyir: "Əvvəlcədən qeyd edim ki, Avropadan fərqli olaraq, Şərq rəmzlərində heç vaxt zahiri təmtəraq, ritorik əzəmət duyulmur. Əvəzində yığcamlıq və məna dərinliyi üstünlük təşkil edir. Gerbimizin layihəsi üzərində işləyərkən məhz bu xüsusiyyətlərdən və heraldika elminin zəngin materiallarından istifadə etmişəm. Gerb lövhəsinin ortasındakı vumpelin rəngləri bayrağımızdakı qammalara müvafiqdir: şərəf, şöhrət, etibar, səmimiyyət və türkçülük rəmzi göy rəng; adət, qüvvət, mərdlik, məhəbbət, cəsarət və müasirliyi təmsil edən qırmızı rəng; azadlığı, fərəhi ümid və sağlamlığı təcəssüm etdirən, eyni zamanda İslam dininə mənsubiyyəti bildirən yaşıl rəng.
Vumpeli dimdiklərində tutan quşlar da adi quşlar deyil: ən qədim dövrlərdən xalqımızın arzu və istəklərindən doğan, ən çətin məqamlarda insanlara həyan olan, şər qüvvələrə qalib gələn əfsanəvi Səməndərdir.
Həmçinin qeyd etməliyəm ki, 1501-ci ildən 1736-cı ilədək hökmranlıq edən Səfəvilərin dövlətinin də rəmzi Səməndər quşu olub. Və dövlət rəmzlərində quş təsvirləri ilk dəfə olaraq 375-454-cü illərdə Hun İmperiyasının bayrağında Harud quşunun çəkilməsi ilə başlayıb. Bu cür tarixi bir həqiqəti bilməyərək, demək olar ki, bütün xalçalarımızda, qədim mədəni irsimizdə öz əksini tapmış Səməndər quşunu xoruz adlandırana başqa nə deyə bilərəm ki?"
Rafiq müəllimin bundan əlavə dedikləri ilə isə video-müsahibədən tanış ola bilərsiz.
