Artıq neçə vaxtı idi ki, “Xural” qəzetinin və onun baş redaktoru Əvəz Zeynallının fəaliyyətinə dair aidiyyəti orqanlar tərəfindən müxtəlif maneələr yaradılmışdır. Nəhayət dünən həmin proseslərin məntiqi sonluğu olaraq Əvəz Zeynallının həbsi baş verdi. FaktXeber.com-un  “Əvəz Zeynallının bu həbsini ölkədə ilin əvvəlindən başlayan siyasi repressiyanın davamı kimi qiymətləndirmək olarmı” və “İlin əvvəlindən bu günə qədər baş verən siyasi həbsləri nəzərə alsaq, ölkədə siyasətilə məşğul olan hər hansı bir partiya rəhbərinin və ya qəzet redaktorunun siyasi sığortalanmasına ehtiyac varmı” sualına münasibət bildirən “Azadlıq” qəzetinin baş redaktoru Qənimət Zahid, RATİ rəhbəri Emin Hüseynov və “Turan” İnformasiya Agentliyinin rəhbəri Mehman Əliyev maraqlı fikirlər səsləndirdilər.  

Qənimət Zahid: “Əvəz Zeynallı ortalıqda heç bir fakt olmadan həbsə atılıb. Sadəcə olaraq bir nəfərin rüşvət iddiası ilə kiminsə həbs atılması artıq adi bir hal alıb. Bu həbs üsuluna balta üsulu deyirlər və qabaqcadan planlaşdırılmış bir həbsdir. Ölkədə olan siyasi repressiyalar ilin əvvəlindən yox, 1993-cü ildən başlayan siyasi repressiyaların davamıdır. O ki, qaldı siyasi sığorta ilə bağlı suala, hüquqların və qanunların işləmədiyi bir ölkədə, sığortanın da işləməsi mümkün olmayacaq. Sadəcə olaraq özünü sığortalayan vətəndaş üçün həmin sığorta əlavə bürokratik problemə çevriləcək. Mən bu məsələyə o, qədər də ciddi yanaşmıram.”

Emin Hüseynov: “Əvəz Zeynallının qarşı tərəfi qıcıqlandırmasının əsas səbəbi, həftəlik çap olunan “Xural” qəzetinin gündəliyə keçməsi ilə bağlı oldu. Çünki hakimiyyət ölkədə olan nəzarətsiz qəzetlərin hamısını sıradan çıxartmaq istəyir. Bu gün nəzarətsiz qalan qəzet yalnız “Azadlıq” və “Müsavat” qəzetləridir. Bundan əvvəl də belə bir kampaniya  “Gündəm” qəzeti gündəlik nəşrə keçəndən sonra baş vermişdi. Əvəz Zeynallı bir neçə dəfə xəbərdarlıq alandan sonra qəzetin çapını dayandırmadı və bunun da məntiqi sonluğu onu uydurma ittihamlarla həbsə atılmasına gətirib çıxartdı. Siyasətlə məşğul olan şəxslər kimi ölkədə heç bir vətəndaş sığortalanmayıb. İlin əvvəllərindən başlayan siyasi repressiyasının əsas səbəbi ərəb dünyasında baş verən hadisələrlə bağlı idi. Ərəb dünyasında olduğu kimi Azərbaycanda da avtoritar və totalitar rejimin idarə üsuluna uyğun olaraq, ölkədə söz və mətbuat azadlığının qarşısı alınıb. Həbslərin hamısı başa düşülən idi. İqtidar öz hakimiyyətini qorumaq üçün bu həbsləri dayandırmayacaq. Onlar artıq bunun bir hissəsini həyata keçirdiblər. Həbslər həm ənənəvi müxalifətə qarşı aparılıb, həm də ki islamçılara qarşı. Əvəz Zeynallı da həbs sırasında olan şəxslərdən biri idi və bu həyata keçirildi.” 

Mehman Əliyevin:  “Bu həbsləri ilin əvvəlindən başlayan siyasi repressiyaların davamı kimi qiymətləndirmək olar. Bizdə hazırda siyasi sığorta ilə bağlı heç bir qanun yoxdur. Yalnız toxunulmazlıq statusu millət vəkillərinə aiddir. Belə bir toxunulmazlıq başqalarına şamil olunmur. Eyni halda siyasi partiya rəhbərlərinin və ya redaktorların təhlükəsizliyinə heç bir zəmanət verilmir.”