Amma qəribədir ki, birbaşa Qərbin imperialist güclərinin nəzarətində olan media orqanları bu günə  kimi bir dəfə də olsun Liviyada mübarizə aparanların müsəlman olması ilə bağlı xəbər yayımlamırdırlar. Hətta İslam barədə belə danışmırdılar. Ancaq görünür indi vəziyyət dəyişib. Qəzzafinin yerinə Müvəqqəti Şuraya rəhbərlik edən Mustafa Əbdülcəlilin “ölkənin İslam qanunları ilə idarə olunacağını” söyləməsi onların narahatçılığını artırıb. Çünki 40 ildir dünyanın ən keyfiyyətli neftlərindən hesab olunan Liviya neftini sümürməyə tamarzı qalmış Qərb dünyası, yenidən belə bir təhlükə ilə üzləşəcəyindən narahatdır və bu narahatçılıqla da İslamı qorxunc bir din kimi təqdim etməyə başlayıb. Ancaq onlar bir şeyi unudurlar, İslam dini nəyinki ölünü, hətta diri insanı belə əla salmağı qadağan edir. Və ya bir insan küçədə “Allahu Əkbər” deyə qışqırırsa, Qəzzafinin meyitinin üzərindən oyana, bu yana atılıb şəkil çəkdirirsə, bu hələ o demək deyil ki, həmin şəxs müsəlmandır.

Bütün bunlara baxmayaraq, Qərbin gizlətdiyi bir neçə nüans da var. O da Qəzzafinin Avropa banklarında olan 200 milyard dollar pulu və İtaliyanın Liviyada törətdiyi qətliama görə rəsmi şəkildə Liviya xalqından üzr istəyərək, illərdir təzminat ödəməsidir. Görünür iqtisadi qüdrəti məhv olmuş İtaliya məhz bu təzminat məsələsinə görə, Liviyanın işğalında daha çox canfəşanlıq göstərirdi. Həmçinin Avropanın özü belə. Təsəvvür edin ki, heç nədən 200 milyard dollarlıq bir sərvət və yüksək keyfiyyətli neft əldə etmişdilər. Və həm də bu sərvəti bir nəfər də olsun əsgərinin burnu qanamadan qazanmışdılar. Əvəzində isə Liviyada silahlandırdığı xalqı üzbəüz qoyaraq, onları bir-birinə qırdırmışdı. Bu gün isə həmin qırğını müsəlmanların, dolayısıyla İslamın adına yazmaqla məşğuldur.

Amma bir şeyi unudur, bu gün İslam təkcə Orta Şərqdə qalmayıb, öz sərhədlərini Avropaya kimi genişləndirib. Həm də qan tökmədən, işğalçılıq niyyəti güdmədən, irqçilik siyasəti yürütmədən. Sadəcə və sadəcə mənəvi dəyərlərindəki üstünlüyü ilə, insanlara, irqlərə münasibətiylə, məzlumun yanında olmasıyla, haqlını müdafiə etməsiylə. Məhz bu üstünlüyüdür ki, bu gün Qərbin tanınmış mütəfəkkirləri İslama üz tuturlar. Və İslam ərəbin, türkün, farsın diliylə deyil, ingilisin, almanın, fransızın diliylə yayılır. Həm də çox sürətlə. Qəribin qorxduğu isə budur. Ona görə də öz qorxusundan, xəyalından xoxan düzəldir. Amma ha çalışsa da onu İslama yapışdıra bilmir. Yapışdıra bilməməsinin ən başlıca səbəblərindən biri isə, artıq dünya xalqlarının oyanması, yaxşını pisdən ayırması, ağa ağ, qaraya qara deməyi bacarmasıdır. Hər kəs artıq belə oyunların işğalçılıq niyyəti ilə həyata keçirildiyini izahsız da başa düşür.