Dünən Müsavat Partiyası PKK-nın tez bir zamanda hakimiyyət tərəfindən terror təşkilatı kimi tanınması ilə bağlı bəyanat verib. Məlum olduğu kimi bir neçə müddət qabaq ölkə prezident İlham Əliyev Türkiyənin baş naziri Rəcəb Tayyib Ərdoğanla görüşərkən, PKK-nı terror təşkilatı kimi tanıdıqlarını bildirmişdi. “Bu cür ziddiyyətlər nədən doğur? Ümumiyyətlə bu məsələnin Milli Məclisdə hər hansı bir təsdiqinin tapılmasına ehtiyac varmı?”
Mövzu ilə bağlı FaktXeber.com-a açıqlama verən millət vəkili Fəzail Ağamalı, bu cür bəyanatlarla müxalifətin məqsədinin ictimai rəyi çaşdırmaqdan başqa bir şey olmadığını bildirdi: “Müxalifətin bu cür bəyanatı ictimaiyyəti çaşdırmağa yönələn, iqtidara etimadsızlıq yaratmaq məqsədi güdən və Türkiyə-Azərbaycan münasibətlərinin kəskinləşməsinə xidmət eləyən bir yanaşmadır. Belə bir yanaşma çox qərəzli və qeyri-obyektiv yanaşmadır. Ona görə ki, ölkə prezidenti dəfələrlə PKK-nı terrorçu təşkilat kimi dəyərləndirib və hər zaman terrora qarşı mübarizədə Türkiyə ilə yanaşı olduğunu bildirib. Belə bir halda bununla bağlı parlamentdə xüsusi bir qərarın qəbul olunmasına heç bir ehtiyac yoxdur. Digər tərəfdən, parlamentdə ayrı-ayrı deputatlar dəfələrlə PKK-nı terror təşkilatı kimi ittiham eləyiblər. Hazırda dünyanın heç bir ölkəsinin parlament səviyyəsində PKK terror təşkilatı kimi tanınmayıb. Sadəcə olaraq terror təşkilatları ilə bağlı hər bir dövlətin rəsmi mövqeyi olur. Eyni halda da ölkə prezidentinin PKK-ilə bağlı səsləndirdiyi fikirlər dövlətin rəsmi mövqeyini əks elətdirir. Biz bu mövqeyi kifayət hesab edirik və düşünürük ki, müxalifətin bilərəkdən və ya bilməyərəkdən səsləndirdiyi bu bəyanatlar əsassızdır. Düşünürük ki, müxalifətin bu tipli bəyanatları qərəzli formada iqtidara qarşı apardığı mübarizənin tərkib hissəsinə daxildir. Bu cür əsası olmayan bəyanatlarla müxalifət özünün ictimai nüfuzuna daha ağır zərbələr vurur.”

Mövzu ilə bağlı müxalifət düşərgəsinin mövqeyi isə tamam fərqlidir. Prezidentin şifahi sözünün rəsmi sənəd olmadığını qeyd edən Müsavatın başqan müavini Gülağa Aslanlı, ziddiyyətlərin də elə bu səbəbdən baş verdiyini bildirdi: “Bu cür ziddiyyətlər ondan doğur ki, prezidentin bəyanatı və yaxud da ki, şifahi sözü rəsmi sənəd deyil. Prezident bu barədə fərman verməlidir, ya da ki, Milli Məclis bu haqda qərar qəbul eləməlidirlər. PKK-nı əgər terror təşkilatı kimi Azərbaycan hökuməti tanımaq istəyirsə, bunun üçün Milli Məclis qərar verməlidir. Əgər Azərbaycanda prezident hesab edir ki, mən bununla bağlı fərman verə bilərəm, qoy onda bu cür olsun. Biz bunu da keçəri hesab eləyə bilərik. Amma ortalıqda bununla bağlı heç bir sənəd mövcud deyil. Sənəd ortalıqda olmayanda isə, söz deyən şəxsin kimliyindən asılı olmayaraq, həmin söz beynəlxalq aləm üçün PKK-nın rəsmən terror təşkilatı tanınması kimi qəbul olunmur. Azərbaycanda ölkə prezidentinin hər hansı icra başçısına və ya nazirə olan göstərişi qanun kimi qəbul olunur. Lakin bu hal dünya təcrübəsində tamamilə fərqlidir. Belə ki, dünyada prezidentin hər hansı bir göstərişi  və ya qərarı qanun və sərəncam şəkilində olur. Biz bu günə qədər PKK-nı rəsmi olaraq terror təşkilatı kimi tanınması ilə bağlı Milli Məclisin və ya prezidentin imzaladığı hər hansı bir sənədi görməmişik. Biz hesab edirik ki, bununla bağlı hər hansı bir rəsmi sənəd qəbul olunmadığı üçün, bu məsələ sənədləşdirilməlidir. Əgər Azərbaycan bunu prezident səviyyəsində deyirsə bəs onda niyə rəsmiləşdirmirlər və niyə ehtiyat edirlər.”
Xəyal Şükür