Xəbər verdiyimiz kimi Azərbaycan İslam Partiyasının lideri Mövsüm Səmədov və partiyanın digər funksionerlərinə hökm oxunub. Məhkəmə qərarı ilə AİP lideri və funksionerləri 10-12 il müddətinə qədər azadlıqdan məhrum olunublar. Mövsüm Səmədov yanvar ayının 2-də partiyanın Baş Məclisində hakimiyyətin ünvanına tənqidi çıxışından sonra bir neçə qondarma ittihamla həbs olundu.
FaktXeber.com-un “AİP lideri barəsində məhkəmənin verdiyi qərarı necə dəyərləndirirsiz” sualına münasibət bildirən ADP sədri Sərdar Cəlaloğlu və politoloq Ərəstun Oruclu bunları bildirdi.
Azərbaycan məhkəmələrinin ədalətli mühakimə həyata keçirtmək iqtidarında olmadığını qeyd edən Sərdar Cəlaloğlu, Azərbaycanda çox qüsurlu bir məhkəmə təcrübəsinin mövcud olduğunu qeyd etdi:
“Azərbaycan məhkəmələri ədalətli mühakimə həyata keçirmək iqtidarında deyil. Digər tərəfdən Azərbaycanda çox qüsurlu bir məhkəmə təcrübəsi mövcuddur. Bu da ondan ibarətdir ki, hakimlər qanunda tutulmuş cəzaların ağır tərəflərini tətbiq eləməklə əslində özlərinin fəaliyyəti zamanı baş verən korrupsiya faktlarını gizlətmək istəyirlər. Hakimlər adətən siyasi motivli işlərdə amansız olurlar və özlərini rejim qarşısında yaxşı göstərmək üçün vətəndaşların günahı olmadan onlara qarşı ən ağır cəzaları tətbiq edirlər. 2003-cü ildə biz həbs olunanda, bizə qarşı bu cür ədalətsiz hökm oxunmuşdu. Lakin biz sonradan Avropa Məhkəməsinə müraciət etdikdən sonra məhkəmənin nə qədər absurd və qondarma ittihamlarla bizi həbs etdiyi məlum oldu. Mənə elə gəlir ki, AİP lideri və funksionerlərinin məhkəmə prosesi dediyim eyni ssenari üzrə qurulub. Əgər islamçılar hər hansı cinayət törətmiş olsaydılar belə, qanunun ən ağır cəzasının verilməsinə heç bir ehtiyac yox idi. Çünki, həmin qanunun yüngülləşdirici halları mövcud idi. AİP sədrinin həbsi ölkədə olan islami kəsimin ciddi narazılığına səbəb olacaq və ölkədə vətəndaş həmrəyliyinə zərbə vuracaq. Eyni halda hesab edirik ki, AİP-ə qarşı irəli sürülən ittihamların hamısı uydurmadır. Bunun bariz nümunəsi budur ki, orada olan əsas ittihamlardan biri, guya AİP İsrail səfirliyini partlatmaqla bağlı hazırlıq işləri aparıb. İsrail səfirliyi isə bəyanat vermişdi ki, biz belə bir təhlükə hiss eləmirik. Azərbaycanda kifayət qədər bu cür uydurma və əsassız ittihamlar olub. Azərbaycanın məhkəmə tarixinə baxsaq biz görərik ki, ölüm cəzası verilmiş adamlar iki ildən sonra əfv ediliblər. Necə ola bilər ki, ən ağır bir cinayətlərə görə, tətbiq olunan ölüm cəzası əfv edilir. Ola bilər ki, ölüm cəzası ömürlük həbslə və ya 15-20 il azadlıqdan məhrum etməklə əvəz olunsun. Lakin ölüm cəzası almış adam cəzanın 1/3-ni belə yatmadan əfv olunması bunu göstərir ki, onlar barəsində irəli sürülən ittihamların hamısı tam olaraq əsassız olub. Sadəcə olaraq, hakimiyyət əfv vasitəsilə özlərinin qeyri-qanuni hərəkətlərini ört-basdır etmək istəyir. Mənə elə gəlir ki, islamçılar uzun müddət həbsxanada qalmayacaqlar. Beynəlxalq ictimaiyyətdə bu məsələ qarşısında sakit dayanmayacaq. Eyni halda ölkə ictimaiyyəti bu həbsləri siyasi repressiya kimi dəyərləndirir.”  
AİP liderinin və funksionerlərinin məhkəməsinin siyasi motivlə həyata keçirilən məhkəmə prosesi olduğunu qeyd edən Ərəstun Oruclu, Mövsüm Səmədovun həbsinin çıxışı ilə bağlı olduğunu qeyd etdi:
“Hesab edirəm ki, AİP liderinin və funksionerlərinin məhkəməsi siyasi motivlə keçirilmiş məhkəmə prosesidir. Mövsüm Səmədovun həbsinin səbəbi çox yüksək ehtimalla prezidentlə bağlı açıqlaması olub. Əgər Ramazan ayında oruc olan adamın cibinə narkotik qoyaraq həbs edirlərsə, belə olan halda mənim nə bu hakimiyyətin polisinə, nə də ki, məhkəməsinə etimadım var. Hesab edirəm ki, bu həbs siyasi bir həbsdir. Azərbaycanda azad və ədalətli məhkəmə yoxdur. Bu həbslərin hamısı siyasi sifarişlərlə həyata keçirilib. Əminəm ki, əgər sabah bu məhkəmə prosesi araşdırılsa və ədalətli məhkəmə qurulsa, məlum olacaq ki, bunların hamısı boş bir şeydir. Sadəcə olaraq bunu demək istəyirəm ki, çox təəssüflər olsun ki, Azərbaycanda aşağı təbəqəli məmurlar bu cinayətlərdə iştirak eləyirlər. Belə hallar çox dərin təəssüf hissi doğurur. Onlar unutmasınlar ki, zaman gələcək ki, bütün baş verənlərə görə cavab verməyə məcbur olacaqlar. Qeyd edim ki, bu işin təxribat olmasını sübut eləmək çox asandır.”

Xəyal Şükür