Dünən Azərbaycan İslam Partiyasının (AİP) sədri Hacı Mövsüm Səmədov, onun qayını Firdovsi Məmmədrzayev, əmisi oğlu Dəyanət Səmədov, partiya sədr müavini Vaqif Abdullayev və Astara rayon təşkilatının sədri Rufulla Axundzadə, ruhanilər Seyyid Fəramiz Abbasov və Zülfüqar Mikayılzadənin cinayət işi üzrə məhkəmənin növbəti iclası keçirilib.

Anar Qasımlı: «Gördülər ki, tək qohumla bu işi bitirmək olmaz, ona görə də Azərbaycanın müxtəlif rayonlarında, əsasən də cənub bölgəsində silahlar aşkar olur»

Məhkəmədə ilk olaraq Mövsüm Səmədovun və Rufulla Axundzadənin vəkili Anar Qasımlı çıxış elədi. O, ilk olaraq yanvarın 2-də Azərbaycan İslam Partiyasında Baş Məclisin iclası zamanı rayon komitələrinin və mətbuatın iştirakı ilə keçirilən iclasında Mövsüm Səmədovun məktəblilərə olan hicab qadağası ilə əlaqədar çıxışına toxundu: «Orta məktəblərə hicab qadağası daha çox ölkənin dindar təbəqəsi narazılıqla qarşılanıb. Əlbəttə, AİP də bu barədə öz münasibətini bildirib. Beynəlxalq Konvensiyaya görə tənqidə görə təqib qadağandır. Mövsüm Səmədovun çıxışı tənqid olsa da, səlahiyyəti çatmayan ekspertlər tərəfindən  dövlət çevrilişinə cəhd kimi qiymətləndirilir. Oxşar çıxışları  hər gün müxtəlif siyasətçilərin ağzından  mətbuatda görürük. Onlar da ölkənin digər məsələləri ilə əlaqədar bu cür tənqidi fikirlər səsləndiriblər».
A.Qasımlı yanvarın 7-də M.Səmədovun və digərlərinin sərnişini olduğu avtomobilin qanunsuz saxlanılmasına da toxundu: «Qanunsuz tabeçiliyə görə sürücü inzibati cəzaya tabe edilir. Burada isə sərnişinlər 10 və 13 gün müddətinə inzibati cəzaya cəlb olunur, sadəcə türk vətəndaşı Bülənt cərimə ilə buraxılır. Burdan belə nəticə çıxır ki, çıxışdan sonra müdafiə etdiyim şəxsin  əleyhinə ssenari qurulur. O, inzibati qaydada  həbs olunur, qanunsuz dindirilir. Bu cəza ilə isə onlar 10 gün vaxt udurlar.»

Məhkəmədən geniş reportajı buradan izləyin