FaktXeber.com-un verdiyi məlumata görə, Türkiyənin məşhur yazarlarından olan Əmrə Uslu, bu yaxınlarda PKK-MİT (Milli Kəşfiyyat Təşkilatı) görüşməsi barədə yazmışdı. Yeni yazısında isə o, PKK-MİT görüşmələrinin internetə sızdırılması barədə ətraflı məlumatlar verib.

Məqalədə deyilir:
"Seçkilərdən əvvəl danışdığım bir dövlət səlahiyyətlisi mənə açıq şəkildə İsrailin adını verib MİT-PKK görüşlərinin İsrail kəşfiyyatı tərəfindən dinləndiyini və  seçkilər əvvəlində mediaya sızdırılaraq, AKP-yə qarşı  əməliyyat keçirilməsinin gözlənildiyini söyləmişdi.

Doğrusu, həmin zaman bu barədə yazmamaq mövzusundakı tərəddüdlərimin bir səbəbi də İsrailin adının olması idi. Çünki Türkiyədə "İsrailin əməlidir" deyə yazılan onlarla və yüzlərlə hekayənin heç birinə inanmamışdım indiyə qədər. PKK-nın İsrail tərəfindən dəstəkləndiyi iddia edildi, ancaq mən bunun üçün məntiqli bir səbəb olmadığını, İsrailin belə bir riskə girməsinin axmaqlıq olacağını söylədim həmişə. Etibarlı mənbəm isə müdafiə etdiyim tezislərin qarşısını kəsərək, "İsrail MİT-PKK görüşlərini dinləyib.  Seçkilər ərəfəsində açıqlayaraq AKP-ni vurmaq istəyirlər" məlumatını fantastik hesab edirdim.

Eyni mənbə daha da irəli gedərək, seçkilər ərəfəsində ODA TV-də, Hakan Fidan əleyhinə yayımlanan xəbərlərin də İsrail kəşfiyyat xidməti və onun MİT içindəki agentlərinin həyata keçirdiyi bir kampaniyanın parçası olduğunu iddia etmişdi. Həqiqətən də bir müddət ODA TV Hakan Fidanın qardaşının Fətullah Gülənin ən yaxın adamı olması barədə təbliğat kampaniyası aparırdı.

Fidanın xaricə getmiş və ya o adda bir qardaşı olmamasına baxmayaraq, ODA TV H.Fidanı hədəf kimi göstərirdi.

Eyni vaxtda ODA TV-də çıxan və sanki MOSSAD-ı qorumağa çalışan bu analizi də görmək lazımdır. ODA TV, MİT-PKK görüşünün MOSSAD tərəfindən sızdırılmasının mümkünsüzlüyünü isbat etmək üçün bunları səsləndirmişdi: "Baş nazir Ərdoğanın İsraillə əlaqələrindəki gərginlik MOSSAD-ı hərəkətə keçirmiş ola bilərmi?

Böyük siyasətə baxdıqda, dünya tarixi araşdırıldıqda, bu elə də bir nəticə yaratmayacaq sızdırmadır. Yəni bu məlumatdan "Baş nazirin istefası" nəticəsi çıxmaz. Belə düşünmək olar ki, "MOSSAD gücünümü göstərmək istəyir?" Bu ehtimal o qədər də inandırıcı deyil. Uşaq oyuncağı, bilək güləşi deyil bu, nəticəsi olmayan addımlar atmazlar. Belə olan halda belə bir sual da çıxır ortaya: Baş nazir də barmağını İsrailə tuşladığı bir mühitdə, ODA TV-nin tələm-tələsik MOSSAD-ı mühafizə mövqeyi haradan qaynaqlanır?

Bütün bunları nəzərə aldıqda, gəldiyim qənaət budur: indiyə qədər inanmadığım İsrailin Türkiyə daxilindəki əməliyyatlarına, heç olmasa sızdırılan MİT-PKK danışıqlarının İsraildən qaynaqlandığına mən də inanıram. Bu inancımı gücləndirən başqa hadisələr də var.

Məsələn, baş nazir Ərdoğan İsraili nəzərdə tutaraq, "Məlum ətrafların keçmişdə də Hakan bəyi hədəf aldığı bilinir. Sızma necə baş verib, onu araşdırırıq. Amma səhvi olsa da, Hakan bəyi xərcləmərik. Bu, sızdıranların içindəki mənfur niyyətini ortaya çıxardı və heç kimə bir şey qazandırmaz" açıqlamasını verdi.

Bu əməliyyatın arxasında İsrailin olduğuna inanmağımın ikinci səbəbi isə əlbəttə uyğun zamandır. Unutmaq lazım deyil ki, bu səs qeydləri İsrailin Ankara səfiri Türkiyəni tərk etdikdən bir həftə sonra, Ərdoğanın Orta Şərq səfəri ilə eyni anda və PKK-ya istiqamətli əməliyyatlarla eyni vaxtda internetdə yayımlandı.

Əlimdəki məlumatlardan çıxardığım nəticə isə budur: MOSSAD-ın Türkiyə daxilində əlaqədə olduğu bəzi qaranlıq otaqlar, öz strateji hədəfləri üçün o görüş qeydlərinin seçkilərdən əvvəl sızdırılmasını, beləcə AKP-nin seçkilərdə ciddi ziyan görəcəyini hesablamışdı.

Böyük ehtimalla, ən əhəmiyyətli əməliyyat işçiləri ODA TV istintaqı daxilində həbs edildikdə, revanş üçün o səs qeydlərinin seçkilərdən əvvəl sızdırılmasını istəyiblər.

Ancaq İsrail həm belə bir kasetin sızmasıyla AKP-dən xilas ola biləcəyini düşünmədiyindən - bu qeyddən sonra AKP yaxşı niyyətinə görə, kürd seçicilərinin çoxunun səsini alacaqdı, BDP alacağı səslərin çoxunu itirəcəkdi, həm də İsrailin öz mənfəəti baxımından daha əlverişli bir zaman gözləyib, səs qeydlərini bazarlıq üçün istifadə etmək istədiyinə görə, bu qeydləri daxildəki İsrail müttəfiqlərinin tələblərinin əksinə olaraq, seçkilərdən əvvəl deyil, İsrail baxımından kritik bu günlərdə yayımladı."