Ruslara qarşı döyüşdükdən sonra Türkiyəyə sığınan 3 çeçen səhra komandiri Türkiyədə küçənin ortasında qətlə yetirilib. Öldürülən çeçenlərdən birinin Qafqazdakı müqavimətin lideri Doku Omarovun Türkiyə nümayəndəsi olduğu bildirilir.

İstanbulda 2008-ci ildə 5 ay ərzində ard-arda sirli şəkildə öldürülən üç çeçen komandirindən sonra daha bir qətl hadisəsi həyata keçirilib. Zeytinburnunda Seyit Nizam məhəlləsi Mövlana prospektində yerli vaxtla saat 15.15-də baş verən qanlı hadisədə, Çeçenistan vətəndaşları Musəvi Berkkhazh, Rustam Altemiral və Zavrbek Amriev qətlə yetiriliblər. İddiaya görə, məsciddən çıxan çeçenlər, təxminən iki aydır yaşadıqları evin yerləşdiyi küçəyə doğru hərəkət edərkən, küçəyə girən qara rəngli maşından enən və əlində səsboğucusu olan silahlı şəxs, Berkkhazh, Altemiral və Amrievin başlarına üç dəfə atəş açıb. Çeçenlər güllə zərbəsindən sonra yerə yıxılıblar, qatil isə onların yanına gələrək, arxayınçılıq üçün onların hər birinə yenidən atəş açıb. Daha sonra isə gəldiyi maşına minərək hadisə yerindən qaçıb.

Avtomobil kirayə imiş

Hadisə yerinə çoxlu sayda polis və təcili yardım gəlib. Dərhal polis hadisə əməliyyat axtarış tədbirləri həyata keçirib. Sui-qəsdçilərin istifadə etdiyi maşın hadisə yerindən iki küçə kənarda atılmış vəziyyətdə tapılıb. Məlum olub ki, avtomobili firmaların birindən kirayə götürülübmüş və saxta nömrə istifadə edilib. Cinayətlərin 9 mm-lik silahla həyata keçirilib və bir silahdan istifadə olunub. Hadisə yerində 12 güllə gilizi tapılıb.

Hadisənin şahidi Serhat Kurt, "Parkda otururduq. Qara bir maşın gəlib dayandı. İçindən bir adam çıxdı, əlində səsboğuculu silah vardı. Üç nəfərin başından atəş açdı. Yıxıldıqdan sonra isə ölüb-ölmədiklərinə nəzarət üçün yenə atəş açdı. Sonra da avtomobilə minib qaçdı. Avtomobildə sui-qəsdçidən başqa sürücü də var idi" deyib.

Təxminən 2 ay əvvəl Zeytinburnundakı evi kirayəyə götürən üç çeçenin eyni evdə qaldıqları və ikisinin evli, birinin isə subay olduğu ortaya çıxıb. Çeçenlərin qaldıqları bina sahibinin qardaş oğlu Zəfər adlı şəxs də, "İki ay əvvəl gəlmişdilər. Üçü eyni evdə ailələriylə yaşayırdı. İkisi evli idi, evdə 3, ya da 4 uşaq var idi. Türkcə bilmirdilər. Telefonda tərcüməçi vasitəsilə danışıb razılaşdılar. Çeçenistandan işləri pozulduğu üçün gəldiklərini, burada dəri sənayesi ilə məşğul olacaqlarını söylədilər. Evə 750 TL kirayə verirdilər" deyə bildirib.

Üç çeçenin Çeçenistanda ruslara qarşı döyüşdükləri və müharibədən sonra Türkiyəyə sığındıqları məlum olub. Bir qarşıdurmada yaralanan Berkkhazhın təxminən 1.5 il əvvəl, Altemiral və Amrievin isə 1 il əvvəl Türkiyəyə daxil olduğu aydınlaşıb. Çeçen komandirlərdən Berkkhazhın, Qafqazdakı çeçen müqavimətinin lideri Doku Omarovun yeni Türkiyə nümayəndəsi olduğu və çeçen müqavimətçilər üçün Türkiyədən toplanan yardım pullarını koordinasiya etdiyi bildirilir. Omarovun daha əvvəlki Türkiyə nümayəndəsi Əli Osaev də Zeytinburnunda səsboğucu silahla qətlə yetirilmişdi.

Ümumilikdə isə rus sui-qəsd qrupları tərəfindən son 3 il ərzində İstanbulda öldürülən çeçenlər arasında 3 məşhur şəxs var. 2008-ci ilin sentyabr ayı: Çeçen polkovnik Qazi Adilsultanov (Başakşehir), 2008-ci ilin dekabr ayı: Çeçen ordusunun iki nömrəli generalı İslam Canibekov (Ümraniyə), 2009-cu ilin fevral ayı: Çeçen lideri Doku Umarovun Türkiyə nümayəndəsi Əli Osaev (Zeytinburnu)

Hər üç çeçenin də öldürülmə tərzi bir-birinə çox yaxındır. Hamısı ya evlərinə girərkən, ya da yolda naməlum şəxslər tərəfindən öldürülüb. İstifadə edilən silahlar və cinayətin işlənmə üsulu Rusiya xüsusi xidmətinə işarə edir. Rusiya baş naziri Putinin, Çeçenistan xaricindəki müqavimət tərəfdarı çeçenlərin öldürülməsi üçün külli miqdarda büdcə ayırdığı məlumdur. Hamısının öldürüldüyü silahın 7.62 millimetrlik "Qroza"dır. Rus mətbuatı, bu silahın 1970-ci illərdən bəri sui-qəsd silahı kimi rus hərbi kəşfiyyatı (QRU) tərəfindən istifadə edildiyini yazır.

Rusiya ordusunun tərkibində fəaliyyət göstərən QRU 1927-ci ildə Sovet lideri İosif Stalin tərəfindən yaradılıb. Məqsədi xaricə qaçan SSRİ müxaliflərini məhv etmək olub. Təşkilat Lev Trotskini 5 milyon dollara başa gələn təqibdən sonra öldürməyi bacarıb. 10 il əvvəlki məlumatlara görə QRU tərkibində 25 min agent işləyir.
İngilis "The Times" qəzeti də İstanbul və digər xarici ölkələrdə çeçen liderlərinə qarşı sui-qəsdlərin arxasında Kremilin dəstəklədiyi Çeçenistan prezidenti Ramzan Kadırovun olduğunu yazmışdı. Kadırovun, xaricə qaçan 300 çeçen müxalifləri üçün ölüm siyahısı hazırladığını iddia edən qəzet, sui-qəsdlər üçün xüsusi bir qrup yaradıldığını yazmışdı. Məhz buna görə QRU-nun hələ də fəaliyyətdə olduğu güman edilir.

Sui-qəsd silahı "Qroza-1"

Rus hərbi kəşfiyyat xidməti QRU üçün hazırlanan silah Moskva yaxınlığında yerləşən Tula vilayətindəki silah zavodunda hazırlanır. Qısa lüləli, səsboğuculu, uzun lüləli və qumbara atmaq üçün istifadə edilir. İstəyə görə silahın üzərinə gecəgörmə cihazı və ya binokl da yerləşdirilir. Arxasına əlavə olunan qurğu sayəsində 30 gülləli maqazin də istifadə oluna bilir.

XÜSUSİYYƏTLƏRİ:

Ağırlığı: 3.2 kiloqram
Maksimum atış məsafəsi: 700 metr
Lülə: qoşalüləli
Güllə: 7.62 mm (AK47 "Kalaşnikov" gülləsi)