BMT korrupsiyadan qidalanan dövlətləri terrorun himayəçiləri qədər təhlükəli elan etmək istəyir. Bu barədə diplomatik mənbələr məlumat yayıb. Qərb ölkələri - ABŞ və Avropa BMT xətti ilə korrupsiyanı dünyaya təhlükə elan edəcək və rüşvətxorluğa qarşı mübarizə terrorla mübarizə ilə eyniləşdiriləcək. Bu o deməkdir ki, korrupsioner rejimlərin bərqərar olduğu ölkələrə hərbi müdaxilə variantları da tətbiq ediləcək. Qərb ölkələri - ABŞ və BMT Azərbaycanı bu siyahıya əlavə edəcəklərmi və ya belə olan halda  Azərbaycanı hansı aqibət gözləyə bilər? Mövzu ilə bağlı FaktXeber.com-a açıqlama verən  Avro-Atlantik Şuranın Təşkilat Komitəsinin sədri Sülhəddin Əkbər və hüquq müdafiəçisi Novella Cəfəroğlu bunları bildirdi:
Sülhəddin Əkbər:  “Mən dəfələrlə mətbuata demişəm ki, yeni dünya düzənini açıq cəmiyyətlər üzərində quran güclər anlayıblar ki, qapalı cəmiyyətlər və rejimlər bunun üçün başlıca təhdid mənbələridir. Beləliklə qərara gəliblər ki, bunlar demokratik rejimlərlə əvəz olunmalıdır. Qeyd edim ki, artıq bu istiqamətdə böyük miqyasda işlər görülməyə başlanılıb.  Qapalı rejimlər dünyada yeni təhdidlər adlanan narkobiznes, terrorizm, korrupsiya və çirkli pulların yuyulması üçün əsas mənbələr hesab olunurlar. Bu təhdidləri aradan qaldırmadan yeni dünya düzəninin bərpa olunması mümkün deyil. Ona görə də, bu rejimlərə qarşı mübarizəyə başlayıbdır. Digər tərəfdən korrupsiyanın terrorizmlə bir səviyyəyə qaldırılması məncə onunla bağlıdır ki, bütün cinayətlərin mənbəyi rüşvətdən qaynaqlanır. Belə ki, korrupsiya olan yerdə ortalığa xeyli miqdarda çirkli pullar çıxır. Çirkli pulların yuyulması üçün cinayət əlaqələrinə girmək tələb olunur.Bu zaman rejimlərin terrorist qruplarla əlaqəyə girməsi qaçılmaz olur. Böyük çirkli pullar da məhz qapalı rejimin olduğu ölkələrin iqtisadi və maliyyə sistemində yuyulur. Bildiyimiz kimi, Azərbaycanın tənqid olunduğu məsələlərdən biri də çirkli pulların yuyulmasına qarşı aparılan mübarizəyə lazımı dəstək verməməsidir. Əgər korrupsiya ilə mübarizə terrorizmlə mübarizə səviyyəsinə qaldırılacaqsa təbii ki, ilk növbədə rüşvət məsələsində öndə gedən ölkələr əsas hədəflərə çevriləcəklər. Qeyd edim ki, Azərbaycan dabu sahədə dünya ölkələri sırasında öndə gedən ölkələrdən biridir”.

Novella Cəfəroğlu: “Hesab edirəm ki, Azərbaycanda korrupsiya halları tüğyan edir. Məmurlar istədikləri formada xalqın sərvətindən istifadə edirlər. Amma bizim istəyimizdən asılı olaraq korrupsiya ilə bağlı qanun qəbul olunaraq komissiya yaradılıb. Komissiyaların bu yöndə necə fəaliyyət göstərəcəkləri isə tamamilə ayrı bir məsələdir. 5 ay bundan qabaq korrupsiyanın qarşısını almaqdan ötrü nə isə etmək istəyirdilər. Lakin alınmadı. Bunların rüşvətxorluqla mübarizə aparmaq üçün hər hansı bir mexanizmləri yoxdur. Yalnız güclü bir qanun vasitəsilə bu mənfi halın qarşısının alınması mümkündür. Korrupsiya ilə məşğul olan şəxslər öz millətinə qarşı teror edən şəxslərdir. O, ki qaldı adımızın siyahıya salınmasına, onu BMT və ABŞ səfirliyi bilərlər. İstəməzdim ki, Azərbaycanın adı o, siyahıya düşsün.”

Xəyal Şükür