Dünən səhər Naxçıvana yola düşmüş hüquq müdafiəçiləri və jurnalistlər MTN-in yerli şöbəsində olub. Bunu bizə açıqlamasında nümayəndə heyətinə daxil olan “Yeni Müsavat”ın redaktoru Zabil Müqabiloğlu bildirib. Onun sözlərinə görə, onlar bir müddət öncə muxtar respublika (MR) MTN-in təcridxanasında ölmüş Tural Zeynalovla bağlı araşdırma aparmaq üçün oraya gediblər. Naxçıvanda ilk əvvəl onları gözlənildiyindən də yaxşı, normal qarşılayıblar.

Amma MTN mətbuat xidmətinin əməkdaşları jurnalistlərə deyiblər ki, “Yeni Müsavat”da və qafqazinfo.az saytında MR Ali Məclisinin sədri Vasif Talıbova qarşı məlumatlar getdiyindən jurnalistlərə heç bir informasiya verilməyəcək. MTN əməkdaşları onu da əlavə edib ki, MTN rəhbərliyi nümayəndə heyətini dialoq tərəfdaşı kimi tanımır. Z.Müqabiloğlu günorta müxbirimizlə söhbətində dedi ki, onların Naxçıvana səfərinə yumşaq münasibət var, hətta nümayəndə heyəti nahar yeməyini V.Talıbovun atasına məxsus restoranda yeyib (yeməyin pulu jurnalistlər tərəfindən ödənilib).
Nümayəndə heyəti Şərur Rayon Məhkəməsinə gedərək hüquq müdafiəçisi Həkimeldostu Mehdiyevin müqəssir kimi cəlb olunduğu prosesdə iştirak edib. Məhkəmə zalına daxil olarkən onların diktofon, fotoaparat və telefonları alınıb. Z.Müqabiloğlu xəbər verir ki, elə ilk müşahidələrdən Mehdiyevin məhkəməsinin tam qurama olduğu üzə çıxıb. İddiaçı tərəf müdafiə tərəfinin heç bir sualına cavab verə bilməyib.
“Turan” informasiya agentliyinin direktoru Mehman Əliyev də Naxçıvanda dövlət orqanları tərəfindən yox, MR-dəki məsləkdaşları tərəfindən qarşılandıqlarını dedi. M.Əliyev H.Mehdiyevin məhkəməsində ona qarşı ittihamların qurama olduğunun göründüyünü bildirdi. O, bütün bölgələrdə olduğu kimi, Naxçıvanda da hər şeyin üzərində monopoliya olduğunu dedi. Sahibkarlığın zəif inkişaf etməsi, işsizliyin yayılması, qapalı sistem problemi burada daha da ciddidir.
RATİ sədri Emin Hüseynov heyətdəki hüquq müdafiəçilərinin hüququ pozulmuş insanlarla görüşdüyünü dedi. Onun sözlərinə görə, 2 həftə öncə MTN-də baş vermiş ölüm halı ilə bağlı araşdırma aparmaq istəyən hüquq müdafiəçilərinin də arzusu baş tutmayıb. Çünki o şəxsin ailəsi bu araşdırmanın aparılmasını istəməyib. Hüseynov deyib ki, Naxçıvandakı bu qorxu atmosferinə görə hüquq müdafiəçiləri ilə digər bəzi narazı vətəndaşlar gizli görüşüb.
“Xural” qəzetinin baş redaktoru Əvəz Zeynallı musavat.com-a deyib ki, jurnalistlər səfər çərçivəsində Naxçıvan MR Ombudsman Aparatına gedərək ombudsmanla görüşmək istəyib: “Ombudsman Aparatının əməkdaşları həyəcan içində idi. Onlar əvvəlcədən müraciət etməməyimizi əsas gətirərək ombudsmanla görüşə bilməyəcəyimizi dedilər və oranı tərk etməyimizi tələb etdilər”.
Ə.Zeynallı dedi ki, Ombudsman Aparatından qayıdandan sonra saat 18:30-da Naxçıvan şəhərindəki parkların birində çay içmək istəyərkən MR Daxili İşlər Nazirliyi İctimai Təhlükəsizlik İdarəsinin Əziz adlı rəisi onlara yaxınlaşaraq deyib ki, sizdən şikayət var: “Əziz adlı polkovnik sərt şəkildə bildirdi ki, Ombudsman Aparatından Daxili İşlər Nazirliyinə müraciət daxil olub ki, guya biz orada olanda insident yaratmışıq. O, bizdən dərhal Naxçıvanı tərk etməyi tələb etdi. Ona bildirdik ki, biletimiz gecə saat 01:55-dədir. Cavabında söylədi ki, gedin, aeroportda gözləyin”.
Hazırda bir qrup jurnalistin Həkimeldostu Mehdiyevin Şərurun Cəlilli kəndindəki evinə getdiklərini deyən Ə.Zeynallı bildirdi ki, polislər onları təqib edir.
Qəzetimiz çapa hazırlanan vaxt - saat 21:00-a qədər son durum belə idi: heyət Şərurda təyyarənin yola düşəcəyi vaxtı, gecə saat 2:00-ı gözləyirdi. Z.Müqabiloğlunun deməsinə görə, Eldostunun evinin yaxınlığında polis postu qurulub.
Naxçıvana gedən nümayəndə heyəti bu gün saat 14:00-da RATİ-nin ofisində mətbuat konfransı keçirəcək. Xatırladaq ki, heyətə hüquq müdafiəçilərindən Novella Cəfəroğlu, Səidə Qocamanlı, Səadət Bənəniyarlı, Arzu Abdullayeva, Anar Məmmədli, Cəsur Sümərinli, Əsabəli Mustafayev, jurnalistlərdən Mehman Əliyev, Zabil Müqabiloğlu, Şahvələd Çobanoğlu, Asif Mərzili, Emin Hüseyn, Habil Vəliyev, Nurəddin Abbaslı, Əvəz Zeynallı, Əfqan Muxtarlı, İdrak Abbasov, Nemət Hüseynli, Seymur Kazımov, Ülkər Asifqızı və Elbrus Ərud daxil idi. Yeni Müsavat