FaktXeber.com. Türkiyənin hazırki siyasəti ilkin baxışda ziddiyyətli nəzərə çarpır. Ancaq bu siyasətlərə diqqət yetirəndə onların qabaqcadan müəyyənləşdirilimiş siyasət olduğu ortaya çıxır. Elə buna görə də, Türkiyə məsələsində ekspertlər müxtəlif fikirdədirlər. Bir qrup siyasətçilər Ərdoğan hakimiyyətini həqiqətən islamçı və Fələstinin məzlum xalqının qəti müdafiəçisi bilir. Başqa siyasətçilərə görə isə Ərdoğan və onun komandası Amerika və İsrailin ən yaxın müttəfiqlərindən biridir. Onlar hesab edirlər ki, Ərdoğanın İsrailə qarşı olan siyasəti əslində zahiri xarakter daşıyır. Bunu İsrailə düşmən olan Suriyaya qarşı Türkiyənin atdığı addımdan, həmçinin Amerikanın istəyi ilə bu ölkədə raketdən müdafiə sisteminin yerləşdirilməsinə icazə verməsindən də müşahidə etmək olar.

Belə olan halda, Türkiyənin ziddiyyətli deyil, məhz məqsədyönlü siyasət yürütdüyünü anlaya bilərik. Ərdoğan və onun komandası keçmiş Osmanlı imperyasını diriltmək istəyir, Qərb və beynəlxalq sionizm isə bundan yararlanaraq Türkiyəni müsəlman dünyasında liderə çevirmək istəyir. Qərbə görə Türkiyənin belə bir arzusu heç zaman real ola bilməz. Azından ona görə ki, Yaxın Şərqin insanları Osmanlılara qarşı heç də müsbət fikirdə deyillər. Amma hər halda bu günkü gündə Türkiyəni önə çəkməklə İsrailə qarşı olan müqavimət öncüllərinə zərbə vurmaq məqsədəuyğun görünür.

Bundan əlavə müsəlman dünyasını ələ keçirmək və zəiflətmək məqsədilə yaranan İsrail rejimi getdikcə fiaskoya uğrayır. Elə buna görə də gələcəkdə məzhəb və milli zəmində təssübkeşliyini qızışdırmaq və bununla da sünni-şiə, fars-türk, türk-kürd və bu kimi digər amillərdən istifadə edərək Qərbin və İsrailin maraqlarını təmin etmək ən alternativ variant hesab olunur.