Artıq Liviya hökuməti demək olar ki, devrilmə mərhələsindədirlər. Neçə aya yaxındır ki, çox böyük təlaş və demokratiya adı ilə ölkənin xarabalığa çevirən Qərbin və ABŞ-ın ordu koalisiyası artıq demək olar ki, istəklərinə çatmaq ərəfəsindədirlər. FaktXeber.com-ün “Sizcə Qərbin Liviyada yeni qurmaq istədiyi hökumət bu ölkəyə doğrudanmı müstəqillik və demokratiya gətirəcək” sualına cavab verən Yaşıllar Partiyasının həmsədri Mayis Güləliyev, demokratiyanın heç vaxt zor gücü ilə bərpasının mümkün olmadığını bildirdi: 
“Zor gücü ilə demokratiya gətirmək heç vaxt mümkün olmayıb. Digər tərəfdən Liviyada nə cəmiyyət, nə də ki, ölkənin iqtisadi vəziyyəti ölkənin demokratiya üçün hazır olmasına imkan verir. Nəzər almaq lazımdır ki, demokratik idarəetmə savadlı xalqın hakimiyyətidir. Demokratik idarəetmə forması savadlı və geniş dünya görüşlü, yaxşı təhsil görmüş xalqın sayəsində qurula bilər. Əgər bu gün Liviyada üsyançılar praktiki olaraq regionda baş verən hadisələri dərk etmirlərsə, özlərinin neçə illər ərzində yaratdıqları infrastrukturları dağıdırlarsa, daxili vətəndaşı müharibəsinə şərait yaradırlarsa və NATO kimi aqressiv bir qurum üçün Liviyanı dağıtmağa imkan verirlərsə, deməli bu xalq savadlı və təhsilli xalq olaraq hələ ki, formalaşmayıb. Belə olan halda, onun hər hansı bir demokratiya yaratması mənim nəzərimdə mümkün olan şey deyil. Xalq insan çoxluğundan təşkil tapır. Əgər bu insanlar savadlı deyilsə və praktiki olaraq Qərbin diktəsi və silahı ilə bir-birilərini qırırlarsa, həmin ölkədə hər hansı bir demokratik idarəetməyə ümid etmək çox sadəlövhlük olardı. Qərb pulu Liviya üçün ona görə xərcləməyib ki, orada demokratiya qurulsun və ya yeraltı-yerüstü sərvətə Liviya xalqı hakimlik eləsin və Qərbin Şimali Afrikada hegemonluğuna son qoysun. Qərb Liviyada xərclədiyi hər bir dollara görə, ən azı 15-20 dollar çıxartmasa ora hücum edərək investisiya qoymazdı. Bu gün Liviyada vətəndaş müharibəsinin yaradılması, dağıdılması, dövlət sistemin dəyişdirilməsi və Qəzzafi hakimiyyətinə son qoymaq üçün Qərb kifayət qədər investisiya qoyub. Qərb bundan sonra qoyduqları investisiyasını çıxartmaq üçün özlərinə uyğun elə bir hakimiyyət qurub, Liviyada elə bir cəmiyyət fomalaşdıracaqlar ki, həmin investisiyasını qaytara bilsinlər və gələcəkdə yeraltı-yerüstü sərvətlərini böyük miqdarda daşımaq üçün təhlükəsizlik bir şərait yaratsınlar. Liviya Əfqanıstan və İraqdan sonra üçüncü bir dövlətdir ki, faktiki olaraq dağıdıldı. Yaxın 10 il ərzində əvvəlki illərdə olan sabitliyini və iqtisadi infrastrukturunu bərpa etməsi mümkün olmayacaq. Necə ki, bu Əfqanıstanda və İraqda mümkün olmadı. Əlbəttə ki, Liviya hakimiyyəti və cəmiyyəti demokratik bir hakimiyyət deyildi. Orada reformaların aparılması üçün böyük tələbat var idi. Lakin reformaların aparılması və demokratik cəmiyyətin qurulması zərurəti, Liviyanın dağıdılması ilə də olmaya bilərdi. Mənim nəzərimdə son bir neçə ay ərzində baş verən hadisələr, Liviyanı dağıtmağa və onun yeraltı sərvətlərinə nail olmağa xidmət edirdi. Praktiki olaraq NATO vasitəsilə bu məqsədə çatıldı.”