Hər bir ölkənin və xalqın  beynəlxalq aləmdə nüfuzunun yüksəldilməsi üçün onun xarici ölkələrdə fəaliyyət göstərən diasporası mühüm rol oynayır. Bununla bağlı düşmən ölkə olan Ermənistanı misal göstərmək olar.  Artıq xaricdə olan Ermənistan diasporasının apardığı fəaliyyət nəticəsində bu gün bütün dünya ictimaiyyəti çox rahat formada Türkiyəni soyqırımı törədən dövlət kimi, Qarabağı Ermənistan ərazisi kimi tanıyıb. Lakin Azərbaycanın  xarici diasporasına kifayət qədər maliyyənin ayrılmasına baxmayarq, bu qurumun fəaliyyəti heç bir halda qənətbəxş hesab olunmur. Demək olar ki, xarici diasporamız indiyə qədər heç bir nailiyyət əldə etməyib.
Azərbayvcanın xaric diasporasının bu vəziyyətdə olmasının əsas 3 səbəbi olduğunu deyən Müsavatın başqan müavini Arzu Səmədbəyli, mövzunu FaktXeber.com-a şərh edib.
“Birinci  səbəb Azərbaycanın xarici siyasətinin olmamasıdır. Yəni ölkənin xarici siyasətinin istiqamətləri müəyyənləşməyib. İkinci səbəb Azərbaycan diasporuna ayrılan pulların Azərbaycan dövlətinin, xalqının mənafeyinə deyil, Azərbaycan hakimiyyətinin təbliğinə, YAP hakimiyyətinin xaricdəki yerli strukturlarının formalaşmasına sərf olunmasıdır. Üçüncü səbəb isə xarici diaspora təşkilatları arasında ayrıseçkilik siyasətinin aparılmasıdır. Əsas səbəblər bunlardır. Əlbəttə ki, ayrılan bu pullar Azərbaycanın diasporasının xaricdəki fəaliyyətinin istiqamətləndirilməsinə, müxalifət və iqtidar ayrıseçkiliyi qoyulmadan Azərbaycanın xaricdəki vətəndaşlarını bir araya gətirərək, Qarabağ kimi dərdi olan bir ölkənin diasporasının  yüksəldilməsinə sərf olunsaydı, onda fərqli bir situasiya meydana gələrdi. Əlbəttə ki, biz 100 illərdir ki, erməni diasporasının formalaşdığını bilirik. Azərbaycan olaraq az bir müddət ərzində erməni diasporasını üstələməyimizi zənn etməyimiz illuziya olardı. Hər bir halda vəziyyət indikindən xeyli fərqli ola bilərdi. Eyni zamanda, xaricdəki diasporamız Türkiyənin xaricdəki diasporası ilə əlaqəli şəkildə uzlaşmış xarici siyasət yeridə bilərdi. Belə bir addım həm Türkiyənin, həm də bizim mənafeyimizə xeyirli olacardı. Bəli tamamilə doğrudur ki, erməni diasporası məhz fəaliyyəti nəticəsində Türkiyənin soyqırım törədən bir dövlət kimi tanıtdırmağı bacarıb. Lakin Türkiyə diasporasının xaric fəaliyyətinin düzgün təşkil olunması nəticəsində bu məsələ yavaş-yavaş Türkiyənin xeyrinə dəyişməyə başlayıb. Bir neçə müddət bundan əvvəl Bakıda Dünya Azərbaycanlılarının Qurultayı keçirildi. Bu qurultay heç bir məqsədi olmayan qeydiyyat xatirinə keçirlən bir qurultay idi. Belə bir halın baş verməsi Azərbaycan hakimiyyətinin işsizliyinin, gücsüzlüyünün və xarici siyasət kursunun olmamasından xəbər verir.  Eyni zamanda Azərbaycan hakimiyyəti təbliğ elədiyinin əksinə olaraq, öz fəaliyyəti ilə bütün dünya azərbaycanlılarının hakimi olmadığını göstərir.”