Gəncənin 400 yaşlı məşhur Çökək Hamamı yeni təmir olunmasına rəğmən çox bərbad vəziyyətdədir. Burada yerləşən Dekorativ Tətbiqi Sənət Mərkəzinin rəhbəri Qalib Bağırov deyir ki, 6 il öncə aparılan restovrasiya işləri abidəyə xələl gətirməkdən başqa bir işə xidmət etməyib, hətta onun öncəki görünüşü də pozulub. 

«Bu binada müsəlman memarlığında olmayan element əmələ gəldi, bu karniz deyilən bir şey firlandı, onunla da kümbəzlərin körkəmi pozuldu, bunun dam örtüyünün möhkəmləndirilməsi, texniki vəziyyətinə demək olar ki, əl vurulmadı. Etdikləri iş də vəziyyəti daha da korladı və o nəmişliyi, o suyun içəri hopması daha da artdı. Eyni zamanda bu Çökək Hamamın pəncərələrində bu plastic aynalar gülməli görsənir. Harda görünüb ki, tarixi abidəyə müasir plastic pəncərələr vurulsun». 

Kümbəzlərin üzərindəki bu qondarma lülə də abidəyə sonradan əlavə olunub. Təmirdə buraxılan səhvlər səbəbindən nəm çəkən binada eroziya getdikcə sürətlənir. Bu isə 20-ci əsrdə Gəncədə təşəkkül tapan və ölkəmizin maddi-mənəvi naliyyətlərindən birinə çevrilən çini sənətinin 1000-ə yaxın nümunələrinin saxlanıldığı Sənət Mərkəzinin də şəraitini çətinləşdirir.

Mütəxəssislər deyir ki, 400 ildən çox yaşı olan Çökək Hamamın son illər restovrasiya adı ilə başına gətirilənlər onun ömrünü əksinə bir qədər də qısaltmış oldu. Abidə bu gün yenidən restovrasiya olunur. Lakin bu işlərin də onun taleyi üçün necə nəticələnəcəyi narahatçılıq doğurmaya bilmir.

Yerli Mədəniyyət və Turizm İdarəsində isə əmin edirlər ki, bu dəfəki bərpa nəinki digərindən yüksək keyfiyyəti ilə fərqlənəcək, yeni zamanda abidənin ilkin, original görkəmini də özünə qaytaracaq. 

“Bərpa layihə institutu onun əsl tarixi görkəmini, sxemini axtarıb tapıb və o köhnə qaydada bütün o yeni tikililəri aradan götürməklə, necə olub elə də onu təmir edəcəklər” - Gəncə şəhər Mədəniyyət və Turizm İdarəsinin rəisi Mina Məlikova belə deyir.

Üzeyr Hacibəyovun məşhur qəhərmanı Məşədi İbadın toydan əvvəl getdiyi  qədim hamamlar tipinə məxsus, düz 20-ci əsrin 60-cı illərinədək insanlara xidmət etmiş bu Çökək Hamam deyilənə görə restovrasiyadan sonra yenidən öz təyinatı üzrə fəaliyyət göstərəcək.

“Bizim ulu babalarımız onu hamam tikibdirsə biz onu təyinatı üzrə istifadə eləməliyik”- deyə, Mina Məlikova bildirdi. 

Odur ki, bir zamanlar gəncəlilərin hamamdan sonra burada keçirilən xoş anlara görə işlətdiyi “saatların olsun” kəlməsi yenidən dillərə düşəcək. Çünki şəhər hamamları sakinlərin tək təmizlənməyə olan ehtiyaclarını ödəmək üçün deyil, həm də istirahət və ünsiyyət məqsədi ilə üz tutduqları məkanlar olub.