Standartlaşdırma, Metrologiya və Patent üzrə Dövlət Komitəsinin sədri Ramiz Həsənovla iqtisadi inkişaf naziri Şahin Mustafayev arasında qarşıdurma şiddətlənir. Komitənin tez-tez və əsassız yoxlamaları nazirin səbir kasasını doldurub. Rəsmi və qeyri-rəsmi müraciətlərə baxmayaraq, Ramiz Həsənov yoxlamaları daha da intensivləşdirib. Bu barədə “Yeni Müsavat”a İqtisadi İnkişaf Nazirliyindəki mənbə xəbər verib.

Ötən il R.Həsənovun əmri ilə komitədə inzibati xətalar haqqında işlərə baxmağa səlahiyyəti olan vəzifəli şəxslərin siyahısı təsdiq edilib. Sənədə əsasən komitənin sədri, aparatın rəhbəri, qanunvericilik və hüquq ekspertizası və daxili nəzarət şöbələrinin müdirlərinə müvafiq səlahiyyət verilib.
Komitənin ərazi dövlət nəzarəti idarələrinin rəisləri və müavinlərinə də inzibati xətalar haqqında işlərə baxmağa səlahiyyət verilib. Bu o deməkdir ki, komitənin səlahiyyətli şəxsləri istədikləri müəssisədə və istədikləri vaxt yoxlama apara bilər.
R.Həsənovun bu addımı müəssisələrdə yoxlamaların aparılmasına ümumi nəzarəti həyata keçirən İqtisadi İnkişaf Nazirliyinin haqlı narazılığına səbəb olub. Çünki qaydalara görə, belə yoxlamalarda mütləq nazirliyin təmsilçisi də iştirak etməlidir. Ancaq R.Həsənovun göstərişi ilə yoxlamalar nazirliyin xəbəri olmadan aparılır.
Mənbə deyir ki, qarşıdurma o qədər şiddətlənib ki, axırda R.Həsənov mətbuat vasitəsilə Ş.Mustafayevin iradlarına cavab verməyə məcbur olub: “Şahin müəllim deyir ki, digər qurumlar yoxlama aparan zaman orada mütləq İqtisadi İnkişaf Nazirliyinin də nümayəndəsi iştirak etməlidir. Amma mən bu fikirlə razı deyiləm. Çünki biz istehsal prosesinə yox, istehsal olunmuş məhsulun keyfiyyətinə nəzarət edirik, onun nə dərəcədə standartlara cavab verdiyini yoxlayırıq. Bir misal deyim: tutaq ki, elektrik şəbəkəsinin işçisi abonentin sayğacını yoxlayır. Əgər sayğaca müdaxilə olunubsa, yerində cərimə və sanksiya tətbiq edilir. Bu halda elektrik şəbəkəsi işçisinin kiminləsə birgə bu prosesdə iştirak etməsinə ehtiyac varmı? Bu, bir müqayisədir. Bir daha deyirəm ki, biz istehsal prosesini yox, hazır məhsulun keyfiyyətini yoxlayırıq. Əgər məhsul keyfiyyətli çıxırsa, ona sənəd veririk”.
Bununla da R.Həsənov faktiki olaraq Ş.Mustafayevə “bu yoxlamaların sənə dəxli yoxdur” cavabını verib. Mənbə deyir ki, bunun ardınca komitənin yoxlamaları daha da intensivləşib. Komitənin əsassız yoxlamaları ilə bağlı nazirliyə yüzlərlə şikayət məktubu daxil olub.
Əslində buna yoxlama demək də düzgün deyil. Komitənin səlahiyyətli şəxsləri müəssisələrə gələrək böyük məbləğdə “haqq” tələb edirlər, verməyənləri isə məhsullarını “saxta” və ya “keyfiyyətsiz” elan edəcəkləri ilə hədələyirlər. Sahibkarlar şikayət məktublarında belə “ödənişlərdən” bezdiklərini bildirirlər. Ancaq nazir Ş.Mustafayev hələ ki R.Həsənova təsir göstərə bilmir.
Mənbə deyir ki, Ş.Mustafayev sonuncu variant olaraq R.Həsənovun əməlləri barədə prezidentə məruzə etməyə hazırlaşır. Çünki qanunsuz “ödənişlərin” ağırlığına davam gətirməyib müflis olmaq təhlükəsi ilə üzləşən yüzlərlə müəssisə var. Onların müflis olmasının məsuliyyəti həm də Ş.Mustafayevin üzərinə düşür. Bu amili nəzərə alan Ş.Mustafayev həm özünü sığortalamaq, həm də R.Həsənovu ram etmək üçün prezidentə komitə sədrinin qanunsuz əməlləri ilə bağlı məruzə etmək niyyətindədir./Yeni Müsavat