Bu gün dünaynı bürümüş haqsızlıq və zülmün acı nəticələrini hamı hiss etməkdədir. Zülm elə bir günahdır ki, hər bir sağlam insanın batinində və başqa sözlə desək vicdanında hamı onu hiss etməlidir. Əlbəttə, əgər o vicdan insada ölməyibsə. Allah-taala Quranda ən çox işarə etdiyi mövzulardan biri də zülmdür. Quranda zülmə, zalımla və zülmkarlara qarşı qəti şəkildə mövqe tutulub və zülmə qarşı mübarizəyə çox təkid olunub. Zülm sözü Qurnda dəqiq tərif olunmuşdur. İnsanın Allah-taalanın ona icazə verdiyi həddi aşması və təcavüz zülm adlanır. Quranda oxuyuruq: “Bunlar Allahın hədləridir (hökmləridir). Onlardan kənara çıxmayın. Allahın hədlərindən kənara çıxanlar, əlbəttə, zalımlardır.” (Bəqərə surəsi 229) Bəs zülm dedikdə ilk növbədə Allah-taala tərəfindən insana verilmiş hər hansı bir haqqın və hüququn pozulması nəzərdə tutulur. Qərbdən fərqli olaraq, biz müsəlmanlar insana verilmiş bütün haqların və hüquqularının kökünün Allahdan olmasını qəbul edirik. Ona görə də İslamda zülm və ədalətin ölçülərini və hüdudlarını Allah tərəzisi ilə ölçürük. Qərb və qərbpərəstlər isə adi insanları aldatmaqdan və öz mənafelərinə çatmaqdan ötrü bəzən hamının gözü önündə zülmü eyni ədalət və ədaləti isə zülm kimi qələmə verirlər. Bu da insanın Allahdan uzaq düşməsinin acı nəticələrindən biridir. Zülmün geniş mənada çoxlu mərtəbələri və növləri var. İnsanın istər özünə və istərsə də başqasına qarşı etdiyi bütün günahları bir növ zülm sayılır. Quranda zülmdən ad aparıldıqda hesab-kitabda zərrə qədər də nəzərə alınır. Bu haqda Quranın surələrinin birində oxuyuruq: “Kim zərrə qədər pis iş görmüşdürsə, onu (onun zərərini) görəcəkdir (cəzasını çəkəcəkdir).” (Zəlzələ surəsi -8). Belə bir pak məktəb heç vaxt köhnəlməz və sarsılmaz. İslam dinin sütunlarından biri ədalətdir. İslam dini heç vaxt zülmü qəbul etmir və zalımlarla əməkdaşlığa da icazə vermir. “Şübhəsiz ki, zalımlar nicat tapmazlar!” (Ənam surəsi 21) İslamın parlaq günəşlərindən olan İmam Hüseyn (əleyhissalam) zülmlə mübarizədə bütün həyatından, canından, malından, övladlarından və ailəsinin müxtəlif əziyyətlərə düşməsindən keçdi, təki zülm və zalımlar ifşa olunsun və xalq onları tanısın. İnsanlar yuxudan ayılsınlar və ətraflarına yaxşı-yaxşı baxsınlar, zülmə və zalımlara qarşı mübarizə aparsınlar. Yezid kimilərlə saleh insanları ayıra bilsinlər. Nə zərrə qədər zülm etsinlər və nə də zərrə qədər zülmü qəbul etsinlər. İslam nəzərində zalım və zülmkar insan kimliyindən asılı olmayaraq elə bu dünyada atəş içində yanır amma, bunu özü hiss etmir. Bu haqda Quranda oxuyuruq: “Zülm edənlərə (rəğbət bəsləməklə, kömək göstərməklə) meyl etməyin, yoxsa sizə atəş toxunar.” (Hud surəsi 113). Elə bu səbəbdən, Allah-taala əmr edir ki, heç vaxt günahkar və zülmkarın arxasında dayanmayın yoxsa siz də onunla birlikdə yanarsınız. Ona görə də həzrət Musa (əleyhissalam) Fironun zülmünü gördükdən sonra Quranda Allah-taala ilə razi-niyazında belə buyrur: "Ey Rəbbim! Mənə bəxş etdiyin nemətə and olsun ki, mən əsla günahkarlara (zalımlara) arxa olamayacağam!" (Qəsəs surəsi 17). Allah-taala bu dünyada zalımların tövbə edib zülmdən əl çəkmələrindən ötrü bəzi olacaq Qiyamət səhnələrindən Quranda söz açır. Bu haqda oxuyuruq: “O gün (zalım) günahkarları qandallanmış (zəncirlə bir-birinə bağlanmış) görəcəksən! Köynəkləri qətrandan olacaq, üz-gözlərini də atəş bürüyəcəkdir! Allah hər kəsə (dünyada) etdiyi əməllərin cəzasını vermək üçün belə edəcəkdir! Şübhəsiz ki, Allah tezliklə haqq-hesab çəkəndir!” (İbrahim surəsi 50)

Zülm və zülmkarlıq mövzusunda bir neçə məsələ çox mühümdür. Əvvəla, İslamda Quran və Əhli-Beyt (ə) məktəbində nə zülm var və nə də zülmü qəbul etmək. Ona görə də tarixdə müşahidə edirik ki, isti Kərbəla səhrasınada mövlamız İmam Hüseyn (əleyhissalam) düşmən tərəfin ordusunun yüz dəflərlə tamamilə üstün olduğuna baxmayaraq, belə bir şüarı həmişə dilində oldu “Heyhat! – zillət bizdən uzaqdar!” Yəni, ey düşmənlər! Bilin və agah olun ki, hər kəs Quran və Əhli-Beyt (ə) məktəbinin yolunu gedirsə və getmək istəyirsə, zülmü və zilləti qəbul etməz. Əsl müsəlman nə zülm etməli və nə də zülmə boyun əyməlidir. Bu xəttdən kənarda qalan və min bir bəhanələrlə İslamı özlərinin şəxsi mənafelərinə qurban verənlər isə, bizim yolumuzu hələ də yaxşı tanımamışdır. Hər bir müsəlmanın ən böyük günahlarından biri də kimliyndən asılı olmayaraq, zalım və zülmkarlarla bir olub onları müdafə etməsidir. Hər bir cəmiyyətdə zalımın və zülmkarın müdafiəsi əslində, bütöv bir ölkənin və xalqın məhvə doğru getməsidir. Müqəddəs Quranda bu haqda oxuyuruq: “Məgər özlərindən əvvəl neçə-neçə nəsilləri (ümmətləri) məhv etdiyimizi görmədilərmi? Onlara yer üzündə sizə vermədiyimiz imkanlar (qüvvət və sərvət) vermişdik. Göydən onlara bol yağış göndərmiş, (evlərin, saraylarının və bağçalarının) altından çaylar axıtmışdıq. Biz onları günahlarına (zülmkarlıqlarına) görə məhv etdik və onlardan sonra başqa yeni bir nəsil (ümmətlər) yaratdıq.” (Ənam surəsi 6) Digər bir surədə oxuyruq: “Sizdən əvvəl neçə-neçə nəsilləri (ümmətləri) peyğəmbərləri özlərinə açıq-aşkar möcüzələr gətirdikləri halda (onlara) zülm etdikləri və iman gətirmədikləri üçün məhv etdik. Biz günahkarları belə cəzalandırırıq.” (Yunus surəsi 13)
İslam düşmənlərinin müsəlmanlar arasında ən çox qorxduğu məsələ müsəlman xalqın İslam mərifəti əsasında, zalım və zülmkarları tanıması mövzudur. Onlar bilirlər ki, əsl müsəlman heç vaxt və heç bir bəhanə ilə nə zülmü və nə də zülakarlığı qəbul etməz. Əsl müsəlman cəmiyyətində kimliyindən asılı olmayaraq zülmkar və zalımlar, xalqın malın və sərvətin haram yollarla mənimsəyənlər qəti şəkildə pislənilir. Əmirəlmöminin Əlinin (ə) hakimiyyəti dövründə zülm haqqında buyurduğu hədis bugün də dünyada haqq aşiqlərinin heyrətinə səbəb olur. Həzrət başqasına və ya xalqa zülm haqqında buyrur: “Allaha and olsun, əgər yeddi iqlimi onların göylərinin altında olan bütün şeylərlə birlikdə mənə versələr ki, bir qarışqanın ağzından arpanın qabığını çıxarmaqla Allaha itaətsizlk edim (zülm edim), etmərəm. Həqiqətən, sizin dünyanız mənim yanımda çəyirtgənin ağzında çeynədiyi yarpaqdan da ucuz və dəyərsizdir.” (Nəhcül-Bəlağə, 51-ci xütbə) İslam və Əhli-Beyt (ə) məktəbində əsl müsəlmançılıq budur. İlahi! Bu gün bəzi zalım hakimlər və bu dünyada yalnız, vəzifəsinə və məqam ardınca olan bəziləri öz vəzifələrindən ötrü nəinki qarışqanın ağzındakı buğda dənəsini, bütün xalqını, torpağını, imanını, etiqadını, şərəf və ləyaqətini verməyə hazır olanlar var. Həmçinin, bu sahədə bəzi üzdəniraq alimlər və müsəlmansifətlər, İslam anlayışından tam şəkildə xəbrəsizlər də zalım və qaniçənlər qoşulmağa hazırdırlar. İslamda ən dəhşətli zülm və günahlardan biri də ictimai mövqeiyyətini və vəzifəsini qorumaqdan ötrü kimlərəsə yaltaqlanmaq və ya kimlərinsə zülmünü qəbul etmək və s. kimi böyük günahlardır. Bu mövzuda çoxlu Quran ayələri və hədislər var. Belə şəxslər bu dünyada ayıla bilməsələr də Axirətdə müdafiə etdiyi və ya zülmünü təsdiq etdiyi günahkar və zalımlardan çox sürətlə qaçmaq istəyəcəklər. Amma nə faydası, onlar artıq həmin zalım və zülmkarlarla bir yerdə qərar tutarlar. Çünki, zalımın zülmünü qəbul edən və ya onu təsdiqləyənin özü həm zalım və həm də günahkar saylır. Quranda oxuyuruq ki, günahkar və zülmkarları müdafiə edənlər Qiyamət günü belə deyərlər: “Nəhayət, o, (Qiyamət günü) hüzurumuza gəldikdə (günahkar onu yoldan çıxaran dostuna ) belə deyər: "Kaş ki, mənimlə sənin aranda şərqlə qərb arasındakı məsafə qədər uzaqlıq olaydı. Sən nə pis yolda imişsən!" (nida gələr ki) Bu gün (peşmançılığınız) sizə heç bir fayda verməz. Siz birlikdə zülm (küfr) etdiyinizə görə əzaba da ortaqsınız!» (Zuxruf surəsi 37)

Bu mövzuda digər bir mühüm məsələ bundan ibarətdir ki, İslamda zalımı, zülmkarı və zülmə razı olub zülmkarla bir olanları, həm Quranda Allah-taala və həm də hədislərdə Peyğəmbər (s) və Əhli-Beyt (əleyhimussalam) lənətləmişdir. Quranda oxuyuruq: “Bilin ki, zalımlar Allahın lənətinə gələcəklər!” (Hud surəsi 18) Hər gün ibadətlərdən sonra oxunmasının çox savabı olan Aşura ziyarətində zülm, zalım və zülmkarlar və onlarla birgə olanlar lənətlənir. Buna görə də özlərini Quran və Əhli-Beyt (ə) tərəfdarları və ya aşiqləri hesab edənlər gündəlik oxuduqları Aşura ziyarətinin bu sətirlərinə diqqət etməli yaddan çıxmamalıdır ki, kimliyindən asılı olmayaraq hər kəs Allaha, Qurana, Əhli-Beytə (ə), müsəlmanlara və ən nəhayət, insaniyyətə qarşı zülm eləsə, həm bu dünyada və həm də Axirətdə belə lənətlərə düçar olacaqdır. Ona görə də Quran və Əhli-Beyt (ə) sevərlərin bir şüarı var: “Heyhat! – zillət bizdən uzaqdır!”, “Biz ölərik, zülmə boyun əymərik!” Aşura ziyarətində oxuyuruq:

Allahın lənəti olsun o kəslərə ki, zülmün əsasını qurublar!
Allahın lənəti olsun o kəslərə ki, qatillərin cinayətlərinin müqəddəməsini hazırladılar!
Allahın lənəti olsun o kəslərə ki, özlərini zülm etməkdən ötrü hazırladılar!
Allahın lənəti olsun o kəslərə ki, zülmü eşidir və ona razı olurlar!
Allahın lənəti olsun o kəslərə ki, zalımlarla həmpeyman olub, onlarla birgə olurlar!

Faiq Vəlizadə

Əl-Mustafa (s) adına beynəlxalq İslam univeristetinin doktorantı