Hakimiyyət nümayəndələri partiyaların maliyələşdirilməsi ilə bağlı yeni təklif irəli sürüb. YAP və Prezident Administrasiyası iki fərqli təklif irəli sürüblər. YAP təklif edib ki, pariyalar parlamentdə təmsil olunana nümayəndələrinə uyğun olaraq maliyyəşdirilsinlər. Lakin Prezident Administrasiyası YAP-dan fərqli olaraq partiyaların topladıqları səs faizləri hesabına maliyləşdirilməsini təklif edib. Faktxeber.com-un "Prezident Administrasiyasının təklifinə uyğun olaraq qəbul olunacaq qanun layihəsinə uyğun olaraq parlamentdə təmsil olunmayan partiyaların maliyyəşdirilməsi nə dərəcədə reallığı uyğundur" sualını cavablandıran ADP sədri Sərdar Cəlaloğlu, Musavat Partiyasının başqan müavini Gülağa Aslanlı və AXCP-nin sədr müavini Nurəddin Məmmədli maraqlı açıqlamalar veriblər.
Sərdar Cəlaloğlu:
"Əvvəla onu deyim ki, bu paralament seçkilərində nəticələri əsasında partiyaların maliyyələşdirilməsi həm dünya səviyyəsinə, həm də məntiqə uyğundur. Amma bu prosedur o ölkələrdə tətbiq oluna bilər ki, həmin ölkələrdə seçkilərin nəticəsi həmin seçkidə iştirak edən partiyalar tərəfindən qəbul edilsin və beynəlxalq ictimaiyyət tərəfindən seçkilərin nəticəsi ədalətli hesab olunsun. Bildiyimizə kimi Azərbaycanda heç vaxt seçkilər düzgün hesab olunmayıb. Seçkilər həmişə saxtalaşdırılıb. Ona görə də bu seçkilərin nəticəsinə uyğun olaraq partiyaların maliyyəşdirilməsi qeyri-qanunidir. Çünki hüquqda belə bir prinsip var ki, qeyri-qanuni işlərin bütün nəticəsi də qeyri-qanunidir. Buna görə də əgər bu saxta seçkilər əsasında formalaşmış parlamentdə müxalifət partiyalarını maliyyəşdirilməyə çalışmaları tam olaraq ədalətsiz bir qərar olacaq. Hakimiyyətin bu addımı nə ölkə ictimaiyyəti, nə də ki, beynəlxalq ictimaiyyət tərəfindən bu partiyaların maliyyəşdirilməsi kimi dəyərləndirilməyəcək. Təbii ki, belə bir halda cəmiyyətdə kifayət qədər real gücə malik partiyalar da bu maliyyəşmədən kənarda qalacaqlar. Hazırda Azərbaycanda çıxılmaz bir vəziyyət yaranıb. Bir tərəfdən Azərbaycanda həddən artıq süni partiyalar yaranıb. Ədliyyə Nazirliyi tərəfindən qeydiyyatdan keçmiş 50-yə yaxın partiyanın hamısı dövlət tərəfindən maliyyələşdirilir. Partiyaların hamısı hakimiyyətin məqsədlərinə xidmət edirlər. Belə bir hal beynəlxalq hüquq prinsiplərinədə ziddir. Dünyanın inkişaf etmiş heç bir ölkəsin mövcud olan partiyaların heç biri hakmiyyət tərəfindən maliyələşmir. Ona görə mən düşünürəm ki, daha da ağıllı və qarışıq bir prinsipdən istifadə olunmalıdır. İqtidar hazırki variantla partiyaların maliyyələşdirsə, bu maliyələşmə iqtidarın öz tərəfdarlarını maliyyəşdirilməsi kimi görsənəcək."
Gülağa Aslanlı:
"Azərbaycanda qanun şah deyil, şah qanundur. Ona görə də, çox güman ki, Prezident Aparatından göndərilən təklif qəbul olunacaq. Əslində bu cür prosedura dünya praktikasında da tətbiq olunur. Hakimiyyət ona görə bu metodu seçib ki, 2010-cu ildə istədikləri saxtakarlıqla seçkilərdə öz səs faizlərini artırıblar və buna görə də ayrılacaq maliyyənin ən çox hissəsini YAP-a verəcəklər. Amma hər halda təklif olunan iki qanun layihəsinin ən əhəmiyyətlisi parlamentdə toplanan səsə görə olunan qanun layihəsidir. Azərbaycan hakimiyyəti hər hansı bir qanun layihəsi qəbul etdikdə heç kimə göstərmirlər. Guya qanun layihəsi Venesiya Komissiyasına göndərilir və orada müzakirə olunur. Azərbaycan hakimiyyəti bu qanun layihələrini Azərbaycan müxalifətindən başqa hər yerə göndərir. Bizim təklif olunan qanun layihəsi haqqında heç bir məlumatımız yoxdur. İP bununla bağlı Avropa şurasının Venesiya Komissiyasına məktub ünvanlayıb ki, Azərbaycan hakmiyyətini tərəfindən müzakirə üçün göndərilmiş qanun layihəsi haqqında məlumat versin.
Nurəddin Məmmədli:
"Əvvəla onu deyim ki, Azərbaycan parlamentində müxalifət yoxdur. Əgər orada müxalifət olsaydı həmin parlamentdə Musavat və AXCP-nin nümayəndələrindən də millət vəkilləri olardı. Artıq bunu beynəlxalq aləm də qəbul edir. Çünki parlamentdə müxalifə adına təmsil olunan şəxslərin heç bir seçilmə şansı olmayıb. Hakimiyyətin böyür-başına topladığı siyasi qüvvələr indiyə qədər hakimiyyətin ayrı-ayrı dairələri tərəfindən qeyri-qanuni əsaslar vasitəsilə maliyələşiblər. Maliyyələşmə haqqında yeni qanunun qəbulu, əvvəlcədən həyata keçirilən gizli maliyyəşməinin açıq müstəviyə keçirmək üçündür. Digər tərəfdən, YAP-ın və Prezident Administrasiyasının ayrı-ayrı mövqedən çıxış etmələri hakimiyyətin oyunudur. Bu gün parlamentdə təmsil olunan bəzi YAP "ideoloqları" var ki, onlar faktiki olaraq nə qanunu, nə imzaladıqları beynəlxalq konvensiyanın tələblərini, nə də ki, Azərbaycan xalqının əsrlər boyu formalaşmış mənəvi-əxlaqi dəyərlərini nəzərə alırlar. Bu qanun layihəsi sonda Prezident Administrasiyasının təklifinə uyğun olaraq qəbul olunacaq. Sadəcə olaraq parlament və Prezident Administrasiyası arasında olan bu fikir müxtəlilyi ona görədir ki, beynəlxalq aləmə Azərbaycanda demokratiyanın mövcud olmasını göstərmək istəyirlər. Sonda Prezident Aparatının göstərişinə uyğun olaraq qanun layihəsini forması təsis olunacaq. Azərbaycanda demokratik seçkilər keçirilmədiyinə görə, partiyaların maliyyəşləməsi ilə bağlı hər hansı qanun düzgün hesab edilə bilməz. Amma yenə də qismən də olsa alınan səslərin nəticəsinə uyğun olaraq maliyyəşməni normal saymaq olar.
Yeni qanun layihəsinə uyğun olaraq parlamentdə təmsil olunmayan partiyaların maliyyəşdirilməsini mümkün olan şərtlərdən biri kimi qəbul edirik. Amma hesab edirk ki, bu gün başqa kriteyalar da nəzərə alınmalıdır."
