Ölkədə baş verən intihar hadisələrinin sayı günü-gündən artmaqdadır. Ümumdünya Səhiyyə Təşkilatının apardığı hesablamalara görə, dünyada intihar edənlərin 1%-i Azərbaycanın payına düşür. Bu isə 9 milyondan çox əhalisi olan Azərbaycan üçün çox böyük göstəricidir. Xatırladaq ki, Azərbaycanda keçən il elə ay olub ki, həmin ayda 20-dən çox adam intihar edib. Azərbaycanda intihar edənlərin sayının artması və bunun səbəbləri ilə bağlı FaktXeber.com-un suallarını cavablandıran İnsan Hüquqları üzrə Maarifləndirmə İctimai Birliyinin sədri, hüquq müdafiəçisi İradə Cavadova son illərdə ölkədə intihar hadisələrinin sayının ifrat dərəcədə artdığını bildirdi: 
“Bizdə olan məlumatlara görə, son illərdə intihar faktları artıb. Azərbaycanda olan intihar hadisələri adətən məmur təzyiqləri və basqısından baş verir. Son dövrlərdə məmurların qeyri-qanuni rəftarları nəticəsində ölkədə bir neçə intihar hadisəsi baş verib. Məlum olduğu bir neçə müddət bundan əvvəl Şəkidə olan sahibkarlardan biri icra başçısı tərəfindən mülkiyyətinin sökülməsinə görə intihar etmişdi. Digər intiharlar isə adətən məişət zəminində baş verib.”
“Televiziyalarda yayımlanan proqramların insanların intihar etməsində nə kimi rolu var”, - sualına isə İ.Cavadovanın münasibəti belə oldu: “Düzdür, televiziyadakı bəzi verilişlərin intihar hadisələrinə təsiri barədə son illər çoxlu müzakirələr aparılır. Azərbaycan səviyyəsində mən deməzdim ki, intihar bu səbəblərdən baş verir. İntihar hadisəsi sırf psixoloji məqamlardan irəli gəlmir. Adətən intiharlar bezdirici hallardan baş verir. Bezdirici məqamlar adətən məmur özbaşınalığı, qanunsuz hər hansı bir hərəkətin baş verməsi, istintaq proseslərin düzgün aparılmaması istiqamətində müşahidə olunur. Digər tərəfdən, intiharlar bezdirici məqamlar qanunsuz yoxlamaların aparılması, mülkiyyətin əldən alınması, qanunsuz hədə-qorxu gəlməklə həbs olunma üzündən baş verir. İnithar hadisələri həmçinin məişət zəmnində də baş verir. Ailələrdə psixoloji durumların pozulması intiharlara gətirib çıxarır. Mən daha çox intihar hadisələrini bu istiqamətdə müşahidə edirəm. Düşünmürəm ki, Azərbaycan səviyyəsində nümayiş olunan filmlərin intihar hadisələrinə səbəb olsun.”