FaktXeber.com-un verdiyi məlumata görə, Yaponiyadakı Fukuşima nüvə stansiyasında baş verən partlayışlar və sızıntının xatırlatdığı Çernobıl faciəsindən 25 il keçir. Ancaq fəlakətin vurduğu ziyan hələ də davam edir. Stansiyanın yaxınlığındakı qəsəbələr hələ də nüvə radiasiyasından əziyyət çəkirlər. Kievdəki Çernobıl muzeyində də nüvə fəlakətinin anatomiyası bütün detallarıyla sərgilənilir.
Ukrayna rəsmiləri, nüvə reaktorunun yaydığı təhlükəni tamamilə aradan qaldırmaq üçün hələ də işlərini davam etdirir. 1986-cı ildə baş vermiş bu qəzaya görə hələ də Ukrayna, Belorus və Rusiyanın bəzi əyalətlərindən 300 min nəfər öz evlərinə dönə bilmirlər. Qəzaya uğramış zavodun qalıqlarından Avropaya radiasiya dalğalarının yayılması təhlükəsi hələ də sovuşmayıb.
Bu məqsədlə, keçən həftə Ukraynada 55 ölkə məsələni müzakirə etmək üçün toplanıblar. Çernobıl Atom Elektrik Stansiyası üçün görülən tədbirlər daxilində 550 milyon avro yardım yığılıb. Bu pul ilə stansiyasının vurduğu zərərin qarşısının alınacağı gözlənilir.
Ancaq Ukraynanın nüvə enerjisi ilə olan pis xatirələri bu sahədə sərmayə qoyulmasına maneə olmur. Bu gün Ukrayna cəmi 15 reaktordan ibarət dörd nüvə stansiyaya sahibdir. Bu stansiyalar ölkənin elektrik ehtiyacının yarısını ödəyir.
Gələn 10 il ərzində Ukraynada təxminən daha 10 reaktorun istifadəyə verilməsi gözlənilir.
Xatırladaq ki, 1986-cı il aprelin 26-da Çernobıl AES-in dördüncü enerji blokunda partlayış baş verib. Partlayış nəticəsində dördüncü blokun reaktoru tamamilə dağılıb. Qəzadan sonra atmosferə 190 ton radioaktiv maddə yayılıb. Ekspertlərin məlumatlarına əsasən radioaktiv tullantıların ümumi miqdarı 50 milyon Küri təşkil edib ki, bu da 1945-ci ildə Xirosimaya atılan atom bombasından 500 dəfə güclüdür. Ukrayna, Rusiya və Belarusun 145 min kvadrat kilometrdən çox ərazisi radioaktiv təsirə məruz qalıb. Qəzadan sonra AES ətrafındakı 30 kilometrlik zonada yaşayan əhali - 115 mindən çox insan köçürülüb. Ümumilikdə 586 min nəfər radioaktiv təsirə məruz qalıb. Onlardan 200 mini qəzanın nəticələrinin aradan qaldırılmasında iştirak edənlər, 116 mini Çernobılda yaşayanlar, 270 mini isə Ukrayna və Belarusun radiasiyaya məruz qalmış rayonlarında yaşayanlardır. Fəlakətin ilk günlərində partlayış, yanğın və kəskin şüalanma nəticəsində 50 nəfər ölüb. Ölənlərin ümumi sayının gələcəkdə 4 minə çata biləcəyi proqnozlaşdırılır.
Dizayn :Networkbil.net . 2009 FAKTXƏBƏR . Dərc olunan materilların mətninə görə, redaksiya heç bir məsuliyyət daşımır. Saytdakı materiallardan istifadə edərkən istinad zəruridir.
