Məlumat mübadiləsindən sonra hakimiyyət barədə söhbətlər edən zənginlər klubunun nümayəndələri ölkələri barədə bəzi ssenarilər müzakirə ediblər.
Rusiyadan ABŞa, Qazaxıstandan İsrailə qədər uzanan kompleks əlaqələr şəbəkəsi daxilində, Avrasiyanın gələcəyinin kimlərin əlində olacağına, bu işin bölgənin qaynaqlarıyla necə maliyyələşdiriləcəyinə, zənginlər klubunun istəkləriylə yeni iqtidar qurulmasına qədər bir çox məsələlər üçün qərarlar verilib.
Rusiyadan, Qazaxıstandan, Qırğızıstandan siyasətçiləri, biznesmenləri bir yerə toplayan beşgünlük yığıncağa, Rusiya, Qazaxıstan və Türkiyənin kəşfiyyat və təhlükəsizlik orqanları tərəfindən müdaxilə edilir. Normalda əl üstündə saxlanılan siyasətçilər, ən pis şəkildə alçaldılır, əməliyyat fahişəlik basqını olaraq qeydiyyata salınır, Qazaxıstan xarici işlər naziri və siyasətçilər gizli şəkildə ölkələrinə göndərilir, toplantı iştirakçılarından bəziləri nəzarətə alınır, bəziləri isə deportasiya edilir.
Milyardlarla dollarlara hökm edən bu şəxslərə qarşı niyə belə bir əməliyyat keçirildi? Hansı dövlət bu qədər tanınmış və iqtisadi gücə sahib şəxslərə qarşı belə bir münasibət göstərər? 14 hökumət səlahiyyətlisi və altı milyarder hansı məqsədlə alçaldıla bilər? Bu sualların cavabları barədə düşündükdə isə ortaya çox dərin, narahatedici, bu ölkələrin hakimiyyət orqanları üçün problemlər yaradacaq səviyyədə cavablar çıxır. Onların milyardlarla dollarlarının da necə və hansı yollarla xərcləndiyi və ya necə artdığı məlum olur. Demək, iqtisadi mənfəətlərdən tamamilə kənarda müəyyən hesablar var.
"Savarona" yaxtası həm Qazaxıstan, həm də İsrail vətəndaşı olan, Avrasiya Yəhudi Konqresinin banisi, Dünya Yəhudi Konqresinin üzvü, üzdə olan sərmayəsi 3 milyard dollardan artıq Aleksandr Maskeviç tərəfindən beş günlüyə kirayəyə götürülübmüş. 20 qonaq üçün xüsusi olaraq hazırlanıbmış. Tədbirin əyləncə hissəsinə də laqeydlik göstərilməyibmiş. Kirayəyə götürülən qadınlara 3-10 min dollar ödəniş edilibmiş. Rus, qazax yəhudi mənşəli biznesmenlərin də qatıldığı yığıncaq üçün lazım olan hər şey düşünülübmüş.
İştirakçılar Qazaxıstanın yeraltı sərvətlərini bölüşdürməkdən xarici işlər nazirini ölkənin rəhbərliyinə qədər gətirməyə, Qırğızıstanın gələcəyindən Orta Asiya-Xəzər enerji proyektlərinə qədər bir çox mövzunu müzakirə ediblər. Bunlardan başqa iştirakçıların daha hansı məsələlər barədə müzakirə apardığı haqda əlavə məlumat verilmir.
Yığıncağın, planların bir ucu ABŞa, digəri İsrailə uzanır. Donalt Trumpdan  (ABŞ-ın məşhur əmlak mütəxəssisi) başlayaraq, İsraildən qaynaqlanan pul axınına qədər.
Yaxşı, üç ölkə niyə belə bir əməliyyata ehtiyac duydu? Rusiya ən çox yəhudi mənşəli oliqarxlara qarşı illərdir sərt mübarizə aparır. Bir çoxları ölkədən çıxarıldı, bəzilərinin mülkiyyəti müsadirə edildi. Bəziləri Avropa və Amerika üzərindən Moskvaya qarşı sərt siyasi mübarizəyə başladı. Bu mübarizə ABŞ və Avropa ölkələrinin Rusiya ilə əlaqələrinə indi də müəyyən dərəcədə təsir göstərir. Qazaxıstan isə həm öz təbii ehtiyatlarının qorunması, həm də Qazaxıstanın gələcəyinə görə, öz siyasətçilərinin, xarici işlər nazirinin bu cür cinayətkar əməllərinin ortaya çıxarılmasını istəyib.
Dünyanın ən zəngin təbii ehtiyatlara sahib ölkələrindən olan Qazaxıstan, bu qədər sərvətin başına bəla olacağını çox yaxşı bilir. Nursultan Nazarbayev baronlar toplantısını hakimiyyətinə qarşı bir sui-qəsd hesab etmiş ola bilər. Türkiyə isə Rusiya və Qazaxıstanla əlaqələrindən Orta Asiyada siyasi sabitliksizliyə, enerji proyektlərində mənfəətlərinə zərbə vurula biləcəyinə qədər bir çox səbəbə görə əməliyyatda iştirak edib. Demək hər üç ölkə toplantını iqtisadi və siyasi mənfəətinə qarşı təhdid hesab etmiş və birgə əməliyyat keçirmişdir.
Hadisəyə bir az geridən baxaq. Avrasiyaya istiqamətli Qərb hesabları (İsrail də daxil) ilə bu ölkələrin mənfəətləri artıq üst-üstə düşmür. Çindən Aralıq dənizinə qədər uzanan yeni əlaqələr şəbəkəsi, Türkiyə-Rusiya arasındakı iqtisadi əlaqələr, bu iki ölkəni qarşı-qarşıya gətirməyə istiqamətli provokasyon cəhdlər, İsraildən yalnız İrana deyil, Xəzər və Orta Asiyaya yönələn aqressiv çıxışlarla sözügedən baronlar toplantısı arasında bir əlaqə ola bilərmi?
Milyardlarla dollarlara hökm edən, hər birinin Qərbin sərmayə mərkəzlərində böyük payı olan bu şəxslərin, Rusiya və Orta Asiyaya qarşı yönəlmiş planların xaricində olmaları mümkün deyil. İsraillə əlaqələr barəsində cümlələr isə sual işarələriylə doludur. Türkiyə-İsrail arasındakı gərginliyi, Təl-Əvivin dünyanı Türkiyəyə qarşı ayağa qaldırmağa istiqamətlənmiş kampaniyasını, son olaraq Çindən Türkiyəyə qədər bütün bölgənin hərbi ittifaq qurduğuna dair Qərbi qorxuya salan ssenarilərini də xatırlatsaq, toplantının ilham mənbəyinin İsrail olmadığına şübhə yeri qalmır.
Bu hadisədə bağlı qalan məsələlərdən biri isə Azərbaycan hakimiyyətindəki bəzi oliqarxlarla sıx bağları olan ATS Telmanın adının o qədər də hallandırılmamasıdır. Rusiya mətbuatının yaydığı məlumata görə, Telman İsmayılov da sözügedən yaxtada olub və onun da polis idarəsində ifadəsi alınıb. Ancaq məlumdur ki, AST Telman Rusiya rəhbərliyi ilə pozulmuş münasibətlərini (Xatırladaq ki, münasibətlərin pozulması Türkiyədə 25 milyon dollara tikilmiş "Mardan Palace" otelindən sonra baş vermişdi. Və Rusiyanın baş naziri Putin AST Telmana məxsus olan illik dövriyyəsi bir neçə milyard dollarla ölçülən "Çerkizov" bazarını yerlə bir etdi. Bundan sonra isə Soçidə keçiriləcək Olimpiya oyunlarına gələcək qonaqların qarşılanması üçün tikiləcək otellərin maliyyələşdirilməsinin 50 faizi AST Telmanın üzərinə qoyuldu və beləliklə də onun Putinlə münasibətləri yenidən düzəldi - red.) təzəlikcə bərpa edib. Məhz bunu nəzərə alaraq, onun Rusiyaya qarşı yenidən hansısa addım atması ağlabatan deyil. Amma burada artıq onun kimisə təmsil etdiyi barədə şübhələr meydana çıxır. Bayaq qeyd etdiyimiz səbəblərdən dolayı T.İsmayılovun təmsil etdiyi şəxsin isə Rusiyadan deyil, məhz Azərbaycandan olması barədə fikir irəli sürməmək mümkün deyil. Bu şəxsin kimliyini araşdırmaq isə başqa bir yazının mövzusudur. Çünki T.İsmayılovun və onun Azərbaycanda sıx bağları olan oliqarxların bəzilərini məhz İsraillə əlaqələri birləşdirir.