Kriminal aləmin "nüfuzlular"ı, "avtoritet"ləri, "oğru"ları və "lotu"larının həyatı son vaxtlar cəmiyyəti o qədər də maraqlandırmırdı. İlk baxışdan belə təəssürat yaranırdı ki, onların yaşamı hansısa başqa, paralel, hamımızın gerçəkliyi ilə heç bir əlaqəsi olmayan həyatdır.
Lakin son hadisələr göstərir ki, məhz bu səbəblərdən dolayı cinayətkar aləmin ən mütəşəkkil tabanının həyatının diqqətsiz qalması oradakı adamların özlərini çox rahat, hətta əməllərinə görə cəzasız hiss etmələrinə rəvac verib.

Hər şey qarışıb

Azərbaycanlı "oğru"ların tam əksəriyyəti, daha dəqiq olsaq, 89%-nin indi Rusiyada qarşılaşdığı problemlərdən yaxa qurtarmağa çalışsalar da, daha da dərinə batırlar. Çünki bu aləmdə büdrəyəni yıxır, zəifləyəni kənara itələyir, ümumi qəbul edilmiş "qaydalar"a riayət etməyəni və "böyük"lərə yetərincə "sayğı" göstərməyəni, ən başlıcası isə normal insan həyatı yaşamaq istəyəni vururlar.
İndi Rusiyanın kriminal aləmində burulğan yaşayır.
Hər şey qarışıb. Kimin harada, hansı düşərgədə olduğu müəyyənləşdirilir, "bizimlə olmayan bizə qarşıdır" kimi mənhus prinsip ən sərt çərçivədə həyata keçirilir, qətllər və "cəza"lar səngimək bilmir. Belə "oğru savaşı"ndakı hədəflər arasında azərbaycanlı "lotu"lar xüsusi çoxluq təşkil edirlər.
Rusiyanın kriminal aləmində baş verənlər zahirən maraqlı olaylar kimi görünsə də, batində qətllər, biznes maraqlarının bölüşdürülməsi, mütəşəkkil cinayətkar qruplaşmaların toqquşması, adam oğurluqları, maliyyə fırıldaqları -  bir sözlə, köhnə "lotu"ların çox ehtiyatla, ən son məqamda əl atdıqları olaylardır.

Azərbaycanlı "lotu"ların hədəfə alınmasının səbəbləri çoxdur, amma onların arasında ən başlıcası sırf biznes maraqlarıdır.
Normal obıvatellərin inanmaları çətin olsa da, hazırda Rusiyanın mütəşəkkil cinayətkar qruplaşmalarının hesablarında ən azı 30 dollar milyard var ki, həmin vəsaitə bank hesablarındakı pullar, aktivlər, şirkətlər, obyektlər, daşınmaz əmlak, qiymətli kağızlar və s. daxildir.
Azərbaycanlı "lotu"lara gəldikdə isə, onlar əsasən Moskva şəhəri və Moskva vilayətində bir çox biznes strukturlarına "hami"lik edirlər, xüsusilə də pərakəndə ticarət və bazarlarda fəaldır.
Rusiyanın hakimiyyət dairələrini isə belə situasiya təmin etmir.
Bunu ölkədəki mütəşəkkil cinayətkarlıqla mübarizəyə ömrünün 40 ilini vermiş polkovnik Yuri Qolovaçyov bizimlə telefon söhbətində təsdiqlədi.

Yuri Qolovaçyov: «Milli mənsubluq zəmində yaradılmış cinayətkar qruplaşmaları ləğvi çox mühüm məsələdir»

"İstənilən ölkədə cinayətkarlıq var və hüquq-mühafizə orqanlarının bütün səylərinə rəğmən, heç bir dövlət mütəşəkkil cinayətkarlıqdan xilas olduğunu deyə bilməz. Dünya praktikası indiyədək dəfələrlə sübut edib ki, əgər hər hansı ölkənin kriminal mühitində həmin ölkənin vətəndaşları olmayan şəxslərin sayı az deyilsə, üstəlik də onlar böyük nüfuza malik olaraq biznes strukturları və başqa sahələrə müəyyən nəzarət imkanlarına malikdirsə, bu hal kriminogen situasiya ilə yanaşı, milli təhlükəsizliyə də birbaşa təhdiddir. Məsələn, indi Rusiyanın kriminal dünyasında əslən Gürcüstandan olan şəxslər nüfuz sahibidir. Bu insanların nə zamansa Rusiyanın əleyhinə işləməyəcəkləri və ya artıq işləmədiklərini necə müəyyənləşdirə bilərik, bunun olmadığına təminat vermək olarmı?! Təbii ki, yox. Üstəlik, etnik cinayətkarlıq ölkədəki milli azlıqlara və miqrantlara pis təsir göstərir. Moskvadakı özbəklər, azərbaycanlılar, taciklər, gürcülər, ermənilər, çeçenlər və s. millət mənsubları elə öz millətindən olan cinayətkar elementlərin təzyiqlərinə məruzt qaldıqlarını deyirlər. Ona görə də Rusiyada milli mənsubluq zəmində yaradılmış müxtəlif cinayətkar qruplaşmaları ləğvi çox mühüm məsələdir. Bununla belə, ölkənin kriminal mühitində müxtəlif "nüfuzlu adam"ların öz qaydalarını yeridərək cinayətkarlığın sayını artırmasına da yol verilə bilməz".
Moskva Şəhər Daxili İşlər İdarəsinin yetkililəri isə şəhərdə azərbaycanlı "lotu"lara qarşı əlahiddə əməliyyatlar aparılmadığını söylədilər.

«Hər şeyi əlimizdən almağa çalışırlar»

Fəqət, Federal Təhlükəsizlik Xidməti və Narkotik Vasitələrin Qanunsuz Dövriyyəsi, habelə Federal Mübarizə Xidmətinin əməkdaşları adlarının çəkilməməsi şərti ilə bildirdilər ki, belə "ov" var. "Məqsəd yalnız azərbaycanlı "oğru"lar yox, ümumiyyətlə, cinayətkar aləmin bütün "köpəkbalıqları"nı zərərsizləşdirmək, onları həbsxanaya salmaqdır. Belə adamlar adi həyatda da həbsxana romantikası ilə yaşadıqlarından, normal yaşama heç cür uyğunlaşa bilmirlər və bu da vətəndaşlara bilavasitə təhlükədir. Son vaxtlar azərbaycanlı "oğru"ların arasında qətlə yetirilən və həbs edilənlərin sayının əvvəlki dövrlərlə çox olmasına gəldikdə isə, burada qeyri-di heç nə görmürəm. Deməli, bu dəfə növbə onlara çatıb: az sonra başqalarını zərərsizləşdirməyə başlayacağıq", - Moskvanın məşhur narkopolislərindən biri dedi.
Rusiya paytaxtındakı azərbaycanlı "lotu"lar onlara qarşı təqiblərin güclənərək az qala maksimum həddə çatdığını etiraf edirlər.
"İndiyədək heç zaman belə olmamışdı. Hər tərəfdən vururlar, milislə yanaşı, dünənədək bizə "qardaş" deyənlər də zərbələr endirirlər. Açıq deyirlər ki, Moskvadan və Rusiyadan çıxmalıyıq. Əlimizdə olan hər şeydən məhrum etmək istəyirlər. Müqavimət göstərəni də ya öldürmək, ya da həbsxanaya atmaq və orada oyuna salıb nüfuzdan salmağa çalışırlar. Çox oğlanlar indi nişangahdadır", - Moskvadakı azərbaycanlı "lotu"lardan biri əməkdaşımıza söylədi.
Onun özü mühafizəsini gücləndirmədiyini deyərək kimsədən çəkinməyə ehtiyac duymadığını söylədi.
... Kriminal aləmin romantikası "sarı media" ilə yanaşı, cəmiyyətin müəyyən qisminin arasında xeyli populyardı.
Fəqət, bu "romantika"nı yaşayanlar həyatla ölüm arasında məsafənin bəzən həddən ziyadə azalaraq bir tük həddinə çevrildiyini gözəl anlayırlar. "Güclə alınanla güc olmaz" - bu, oğru fəlsəfəsinin əsas qanunlarından biri olsa da, indi onların özlərinə qarşı işləməyə başlayıb.

Həsən Ağacan