Türkiyənin ünlü pop-starı Tarkan Azərbaycana gəlir. Konsertin təşkili ilə birbaşa əlaqəsi olan şəxsin var.az-a verdiyi məlumata görə, pop-star fövqəladə hallar naziri Kəmaləddin Heydərovun oğlu Taleh Heydərovun seçki kampaniyasında iştirak etmək üçün gətirilir. Şəxsin sözlərinə görə, konsertin Qəbələ şəhərində reallaşacağı, həmçinin müğənninin məşhur “Səndən nigaranam” mahnısını ilk dəfə orada ifa edəcəyi planlaşdırılıb.

Bəlli oldu ki, son albomu “Adımı kalbine yaz” ilə səssizliyinə son qoyan Tarkanın Azərbaycana səfəri dəqiqləşib. O, həmişə olduğu kimi, bu dəfə də “SƏS organization” şirkətinin təşkilatçılığı ilə gətirilir. Şirkətin rəhbəri Nahid Emiloğlunun açıqlamasına görə, konsert oktyabrın ilk ongünlüyündə Heydər Əliyev adına sarayda olacaq: “Tarkanla danışıqlar hələ də davam etdiyi üçün dəqiq vaxt və qiymət bilinmir”. N.Emiloğlunun sözlərinə görə, Tarkan konsertdə sözləri Baba Vəziroğluna, musiqisi Kamala məxsus olan “Səndən nigaranam” mahnısını oxuyacaq. Konsertin Qəbələdə keçirilməsinə gəlincə, E.Nahidoğlu konsertin yalnız Bakıda keçiriləcəyini bildirib.

Konsertin dekorasiya işlərini təşkil edən “Sound Geek” şirkəti Tarkanın oktyabrın 2-3-də Bakıya gələcəyini söyləyir. Əvvəlcə hansısa bölgədə açıq havada konsert nəzərdə tutulub, sonradan təxirə salınıb. Şirkət dekorasiya işi üçün artıq sifariş alsa da, konsertin dəqiq harada baş tutacağını bilmir. Amma onlara məkan olaraq Heydər Əliyev adına saray və “Buta palace”nin nəzərdə tutulduğu deyilib.

Mətbuatda gedən məlumatlara görə, “fövqəlnazir”in oğlu Taleh Heydərov 72 saylı Yardımlı-Masallı seçki dairəsindən namizədliyini verir. Əgər belədirsə, onda T.Heydərov Tarkanı niyə namizədliyini verdiyi bölgəyə yox, Qəbələyə aparır? Əldə etdiyimiz məlumata görə, “fövqəlnazir”in oğlu seçimini tam qətiləşdirməyib: “Ola bilsin namizədliyini Qəbələdən versin. Çünki babası Fəttah Heydərovun builki seçkilərə qatılmaq niyyəti yoxdur. Amma bu, ehtimal olaraq qalır. Yəni dairədən də namizədliyini verə bilər”.