Bakıda "Kibernetika və informatika problemləri" III Beynəlxalq konfransı öz işinə başlayıb.
07-09-2010
Konfransın təşkilatçıları qismində Azərbaycan Respublikası Rabitə və İnformasiya Texnologiyaları Nazirliyi, Azərbaycan Milli Elmlər Akademiyası, Azərbaycan Respublikası Təhsil Nazirliyi, "Abdus Salam" Nəzəri Fizika Beynəlxalq Mərkəzi, AMEA Kibernetika İnstitutu, AMEA İnformasiya Texnologiyaları İnstitutu, Bakı Dövlət Universiteti, Azərbaycan Dövlət Neft Akademiyası, Azərbaycan Texniki Universiteti çıxış edirlər.
Qeyd edək ki, konfrans Rabitə və İnformasiya Texnologiyaları Nazirliyinin dəstəyi ilə keçirilir. Giriş sözü ilə çıxış edən Azərbaycan Milli Elmlər Akademiyasının prezidenti, akademik Mahmud Kərimov tədbir iştirakçılarını salamlayıb və bu gün qloballaşan dünyada kibernetika və informasiya texnologiyalarının əhəmiyyəti barədə danışıb. Öz növbəsində konfransın proqram komitəsinin həmsədri, Azərbaycan Rabitə və Informasiya Texnologiyalar naziri, akademik Əli Abbasov çıxışında tədbir iştirakçılarını salamlayıb, bu tip tədbirlərin keçirilməsinin vacibliyini vurğulayaraq konfransın əhəmiyyətini qeyd edib.
Nazir qeyd edib ki, bu gün bütün dünyada olduğu kimi Azərbaycanda da dövlət tərəfindən elm tutumlu innovativ texnologiyaların inkişafına böyük önəm verilir və xüsusi diqqət ayrılır. Azərbaycanın bu istiqamətdə həyata keçirdiyi siyasətindən danışan Əli Abbasov təbii resurslara əsaslanan iqtisadiyyatdan texnoloji və innovasiya tutumlu iqtisadiyyata keçidə dair səylərini xüsusi olaraq diqqətə çatdırıb. Nazirin sözlərinə görə, elm yönümlü iqtisadiyyata dinamik keçidə nail olmaq üçün həm dövlət, həm özəl, həm də elm sektorlarının səyləri vacibdir.
Çıxışının sonunda Əli Abbasov bir daha konfransın məhsuldar olacağında əminliyini və bu tədbirin kibernetika və informatika sahələrinə öz töhfələrini verəcəyinə ümid etdiyini bildirib. Bundan sonra təbrik sözləri ilə konfransın bir sıra yerli və xarici iştirakçıları çıxış ediblər.
Dünyanın 16 ölkəsindən 40-dan çox alim və mütəxəssisin iştirak etdiyi “Kibernetika və informatika problemləri” III Beynəlxalq konfransı sentyabr ayının 8-dək davam edəcək. Tədbir çərçivəsində 10 plenar və 34 seksiya iclaslarının təşkil olunacağı nəzərdə tutulur.
