“Bu günlərdə yayılan məlumatlardan aydın olur ki, yanacağın qiymətində dəyişiklik olacaq. Bunun nə qədər real olacağını deyə bilmərik. Amma onu deyə bilərik ki, Azərbaycanda bir şeyin qiymətinin artırılması ictimai rəy nəzərə alınmadan aparılır” – bu sözləri iqtisadçı ekspert Qorxmaz İbrahimli, yeni ilin başlanğıcında yanacağın qiyməti artırıla bilərmi – sualına cavab olaraq, FaktXeber.com-a bildirdi. Onun sözlərinə görə öncədən nə qədər qalxacağı haqqında proqnoz vermək çətindir: “Bir çox dünya ölkələrində yanacağın qiyməti bahadır. Bu qiymət Azərbaycanda isə təqribən orta həddə saxlanılır. Hər halda qiymətlərdə artım olmasa yaxşı olar. Amma əks halda biz heç nə deyə bilmərik. Çünki, nə bizim sözümüzə məhəl qoyan var, nə də ictimai qınaqdan qorxan”.

Q.İbrahimli hesab edir ki, qiymətlərin qalxa biləcəyini deyəndə, bunun üçün heç bir səbəb göstərmək olmur: “Qiymət artımı üçün konkret səbəb göstərmək mümkün deyil. Yeganə səbəb odur ki, avro standartlara keçirik. Bu zaman benzinin keyfiyyətində dəyişiklik ola bilər. Normal yanaşsaq, buna çəkilən xərcin maliyyəsi bahalaşacaq. Ona görə də qiymət qalxa bilər. Biz bunun maya dəyərini və bundan sonra nə qədər xərc çəkiləcəyini bilmədiyimizə görə nəsə deyə bilmərik”.

Azərbaycan neft ölkəsi olmasına baxmayaraq, benzinin keyfiyyəti çox aşağı səviyyədədir. Bir çox qonşu ölkələrlə müqayisədə onlarda benzin daha keyfiyyətlidir. Neft Şirkəti qiymətin qaldırılması ilə əlaqədar təkliflərini tarif şurasına göndərsə, demək olar ki, benzin bahalaşacaq – Q.İbrahimli bildirdi.

Yancağın maya dəyərini niyə bir iqtisadçı ekspert kimi bilmirsiniz – sualına gəldikdə, müsahibimiz vurğuladı: “Azərbaycanın dövlət strukturlarında hələ şəffaflıq yoxdur. O cümlədən, Neft Şirkətində də şəffaflıq olmadığı üçün bunu bilmirik. Əslində elektrik enerjisinin və digər yanacaqların maya dəyəri KİV-ə ötürülməli və ictimaiyyət də mətbuatdan məlumatlanmalıdır. Təəssüf ki, belə halları hələ görə bilmirik”.

Ekspert hesab edir ki, Azərbaycanda benzinin qiyməti qalxan kimi suyun da qiyməti qalxacaq: “Eyni zamanda elektrik enerjisinin qiyməti qalxan kimi istehsal mallarının hamısının qiyməti qalxır. Bunu heç nə ilə proqnozlaşdırmaq olmaz. Rusiya da Azərbaycan kimi neft ölkəsidir. Bu, o demək deyil ki, qonşuda neftin qiyməti qalxdı deyə, bizdə də bahalaşacaq. Əslində ərzağın qiyməti enerji daşıyıcılarının qiyməti ilə ölçülür. Əgər yanacağın qiyməti qalxarsa, siz təsəvvür edin ki, ərzağın qiyməti harada dayanacaq. Güman edirəm ki, yanacağın qiyməti qalxarsa, şübhəsiz ərzaq və digər məhsullar da bahalaşacaq”.

Qiymət artımında ictimai rəyin nəzərə alınmadığını vurğulayan ekspert əlavə etdi: “İctimai reaksiyanın necə olacağını deyə bilmərəm. Təbii ki, qeyri-hökumət təşkilatları, siyasi partiyalar və digər təşkilatlar öz etirazlarını bildirə bilərlər. Amma bu, Neft Şirkətinə və Tarif Şurasına nə qədər təsir edəcək? Bu günə qədər ictimai rəy nəzərə alınmadan, belə addımlar atılıb. Əslində Azərbaycanda normal vergi siyasəti yürüdülsə, qanunlara əməl olunsa, korrupsiya aradan qalxsa, bir çox sahələrdə heç qiyməti qaldırmağa ehtiyac qalmaz”.

Əli Mövlud