“Qüds günü İmam Xomeyni (r.ə) tərəfindən elan edilib. Yəni, Ramazan ayının sonuncu cüməsi müsəlmanlar tərəfindən Qüds günü kimi qeyd olunur. Əsas səbəbi isə İslam dünyasının ümumi problemlərinin gündəmdə qalmasıdır” – bu sözləri ilahiyyatçı Hacı Şahin Həsənli FaktXeber.com-a bildirdi. Onun sözlərinə görə müsəlmanlar ağrılı-acılı məsələləri unutmamaq və biganə yanaşmamaq üçün “bu gün” hər il Ramazan ayının sonuncu cüməsində qeyd olunur: “Bildiyimiz kimi Ramazan ayı müsəlmanlar üçün çox həssas vaxtdır. Bu zaman insanlar belə ciddi problemləri də unutmamalıdırlar. Çünki, İslam dinində fərdi ibadətə qatılıb, ictimai problemləri unutmaq, bəyənilən əməl deyil və digər müsəlmanların dərdini yaşamayan şəxsin fərdi ibadəti də qəbul olunmaz. Bu məzmunda çoxlu hədislər də var. Ramazanın son cüməsi ona görə Qüds günü kimi qeyd olunur ki, bütün dünya müsəlmanları Fələstinin işğal olunma məsələsini düşünsünlər və orada yaşayan insanların acı talelərini xatırlayıb, onların dərdini bölüşsünlər. Çünki, Ramazan ayı həm də həmdərdlilik deməkdir. Bu ayda insanlar bir-birinin problemlərini düşünməlidirlər. Buna görə də bu günün Ramazan ayına təsadüf etməsi olduqca əhəmiyyətlidir”.

Hacı Şahin hesab edir ki, Qüds günü haqqında verilən qərar özünü doğruldub: “Mən tam əminliklə deyə bilərəm ki, bu gün özünü doğrultdu. Məzhəbindən asılı olmayaraq bütün müsəlmanlar demək olar ki, bu günü qeyd edirlər və artıq hər il bunun aktuallığı artmaqdadır”.

Qüds günü sizcə Azərbaycanda hansı səviyyədə keçirilməlidir – sualına cavab olaraq, Hacı Şahin bildirdi: “Qüds günü təkcə bu mənaya deyil ki, yalnız Qüds və Fələstin xatırlanmalıdır. Bəlkə, İslam dünyasının və bəşəriyyətin bütün problemləri bu gündə yada salınmalıdır. Amma Fələstin probleminin özünə məxsusluğu da var. Buna baxmayaraq, bu gün müsəlmanların və insanlığın bütün dərdləri qeyd olunmalıdır. Azərbaycan xalqı da artıq on illərdir ki, bir problemin məngənəsində sıxılmaqdadır. Əraziləri təcavüzə məruz qalıb, torpaqları işğal olunub. Ona görə də Qüds mövzusu bəlkə digər müsəlman ölkələrindən daha çox aktual olmalıdır. Çünki, Azərbaycanın problemləri ilə Fələstin problemləri arasında paralellər olduqca çoxdur. Bu mənada Qüds gününün Azərbaycanda qeyd olunması xüsusi əhəmiyyət kəs edir. Azərbaycan cəmiyyəti təcavüzə məruz qalmış bir xalq kimi fələstinlilərin çəkdiyi acını daha yaxşı dərk edə bilər”.

Xatırladım ki, Azərbaycan cəmiyyəti Qüds haqqında tam məlumatlı deyil. İslami şüurun formalaşma prosesi hələ indi gedir. Mənəvi dəyər olaraq, bu dini qoruyub saxlasaq da, İslamın qaydalarına tam yiyələnməmişik. Bu mənada Qüds günü hələ Azərbaycanda layiqli dəyərini tapa bilməyib. Amma ildən ilə bu məsələ barəsində cəmiyyətdə məlumatlar çoxalır və bu günün mahiyyətini dərk edənlərin sayı artır – Hacı Şahin vurğuladı.